ସୁନା, ରୁପା କିମ୍ବା ଅନ୍ୟ ମୂଲ୍ୟବାନ ବସ୍ତୁ ଚୋରି ହେବା ଘଟଣା ବର୍ତ୍ତମାନ ସଧାରଣ ହୋଇଗଲାଣି। କିନ୍ତୁ କଦାପି ଶୁଣିଛନ୍ତି, ଚୋରମାନେ ବିମାନ ବନ୍ଦରରୁ ବିମାନ ହିଁ ଉଡାଇ ନେଲେ। ଏଭଳି ଏକ ଘଟଣା ୨୦୦୩ରେ ମେ’ ୨୫ ତାରିଖ ଆଙ୍ଗୋଲା ରାଜଧାନୀ ଲୁଆଣ୍ଡାର କ୍ୱାଟ୍ରୋ ଡି ଫେଭେରେରୋ ବିମାନ ବନ୍ଦରରେ ଘଟିଥିଲା। ୧୯୭୫ରେ ନିର୍ମିତ ବୋଇଂ ୭୨୭-୨୨୩ ବିମାନ ୨୫ ବର୍ଷ ଧରି ଆମେରିକାନ ଏୟାରଲାଇନ୍ସ ପାଇଁ ସେବା ଯୋଗାଇଥିଲା। ପରେ ଏହାକୁ ଲିଜ୍ରେ ନେଇଥିଲା ଟ୍ୟାଗ ଆଙ୍ଗୋଲା ଏୟାରଲାଇନ।
ଘଟଣା ଦିନ ଅର୍ଥାତ ୨୫ ତାରିଖ ସନ୍ଧ୍ୟାରେ ଦୁଇ ଜଣ ଲୋକ ବିମାନରେ ପ୍ରବେଶ କରିଥିଲେ। ସେମାନଙ୍କ ମଧ୍ୟରୁ ଜଣେ ଥିଲେ ଆମେରିକାନ ପାଇଲେଟ୍ ତଥା ଫ୍ଲାଇଟ୍ ଇଞ୍ଜିନିୟର ବେନ ସି. ପଡିଲା। ଅନ୍ୟ ଜଣଙ୍କ ନାମ ଥିଲା ଜନ ଏମ୍. ମୁଟାଣ୍ଟୁ। ସେ ଥିଲେ ଜଣେ ମେକାନିକ୍। ଦୁହେଁ ବିମାନ କକ୍ପିଟ୍ରେ ପ୍ରବେଶ କରିବା ପରେ ଲାଇଟ୍ ଅନ କରି ନ ଥିଲେ। କଣ୍ଟ୍ରୋଲ ଟାଓ୍ବାର ସହିତ ବିନା କୌଣସି ଯୋଗାଯୋଗରେ ହିଁ ରନଓ୍ବେରେ ପହଞ୍ଚିଥିଲା। ଏହାପରେ ଦକ୍ଷିଣ-ପଶ୍ଚିମ ଦିଗରେ ଆଣ୍ଟଲାଟିକ୍ ମହାସାଗରେ ଉପରେ ଟେକ୍ଅଫ୍ କରିଥିଲା ବୋଇଂ ୭୨୭-୨୨୩। ଚୋରି ହେଲା ବେଳକୁ ବିମାନରେ ୫୩ ହଜାର ଲିଟର ଇନ୍ଧନ ଥିଲା। ଏତିକି ଇନ୍ଧନରେ ବିମାନଟି ୨,୪୦୦ କିଲୋମିଟର ହିଁ ଉଡ଼ିପାରିବ। ହେଲେ ଆମେରିକାର ତଦନ୍ତକାରୀ ସଂସ୍ଥା ଏଫ୍ବିଆଇ ଓ ସେଣ୍ଟ୍ରାଲ ଇଣ୍ଟେଲିଜେନ୍ସ ଏଜେନ୍ସି (ସିଆଇ) ବିଭିନ୍ନ ଦେଶରେ ଏହି ବିମାନ ପାଇଁ ସର୍ଚ୍ଚିଂ ଅପରେଶନ କରିଥିଲେ। ହେଲେ ମିଳି ନ ଥିଲା କୌଣସି ସୁଫଳତା। ନା କେବେ ସେହି ବିମାନ କାହା ନଜରକୁ ଆସିଲା, ନା ଦୁଇ ଚୋର।