ନୂଆଦିଲ୍ଲୀ, ୧୬।୭ : ଦେଶରେ କରୋନା ମହାମାରୀ ବିରୋଧରେ ଲଢ଼େଇରେ ଏକ ନୂଆ ରେକର୍ଡ ସୃଷ୍ଟି ହୋଇଛି। ସାର୍ବଜନୀକ ଟିକାକରଣ ଅଭିଯାନରେ ୧୮ ମାସରେ ୨୦୦ କୋଟି ଟିକା ଲକ୍ଷ୍ୟ ପୂରଣ ହୋଇଛି। ଶନିବାର ଭାରତ ଏହି ଟିକାକରଣ ଲକ୍ଷ୍ୟ ହାସଲ କରିଛି। ୧୮ ମାସ ମଧ୍ୟରେ ଭାରତ ଏହି ମାଇଲଖୁଣ୍ଟ ଅତିକ୍ରମ କରିଛି।
ସେଥିମଧ୍ୟରୁ ୧୨ରୁ ୧୪ ବର୍ଷ ବୟସ୍କଙ୍କୁ ୬୪,୦୯୪,୨୯୫ ଟିକା ଦିଆଯାଇଥିବାବେଳେ ୧୫ରୁ ୧୭ ବର୍ଷ ବୟସ୍କଙ୍କୁ ୧୧୦,୯୧୩, ୫୬୨ ଟିକା, ୧୮ରୁ ୪୫ ବର୍ଷ ବୟସ୍କଙ୍କୁ ୧,୧୧୩,୭୮୩,୬୮୮ ଟିକା, ୪୫ରୁ ୬୦ ବର୍ଷ ବୟସ୍କଙ୍କୁ ୪୧୫,୬୮୭, ୬୬୨ ଟିକା ଏବଂ ୬୦ ବର୍ଷରୁ ଅଧିକ ବୟସ୍କଙ୍କୁ ୨୭୮, ୯୨୮,୭୧୯ ଟିକା ପ୍ରଦାନ କରାଯାଇଛି।
ଦେଶର ମୋଟ ଟିକା ଡୋଜରେ ଅଧିକାଂଶ ଲୋକଙ୍କୁ କୋଭିଡଶିଲ୍ଡ ଟିକା ଦିଆଯାଇଛି। ୨୦୦ କୋଟି ଟିକା ଡୋଜ ମଧ୍ୟରୁ ୧୫୯ କୋଟି ଟିକା ଡୋଜ କୋଭିଶିଲ୍ଡ ରହିଛି। ସେହିପରି ୩୩ କୋଟିରୁ ଅଧିକ ଡୋଜ କୋଭାକ୍ସିନ ଦିଆଯାଇଛି। କାର୍ବୋଭାକ୍ସର ୬.୪୧ କୋଟିରୁ ଅଧିକ ଡୋଜ ଦିଆଯାଇଛି। ଏହି ତିନୋଟି ଟିକା ବ୍ୟତୀତ ସ୍ପୁଟନିକ-ଭି ଏବଂ କୋଭାଭାକ୍ସ ଟିକା ମଧ୍ୟ ଦେଶର ଲୋକଙ୍କୁ ଦିଆଯାଇଛି।
ବର୍ତ୍ତମାନ ପର୍ଯ୍ୟନ୍ତ ଅଧିକ ଟିକାକରଣ ଚାଇନାରେ ହୋଇଛି। ସମଗ୍ର ବିଶ୍ୱର ଟିକାରକରଣ ତଥ୍ୟ ଅନୁଯାୟୀ, ଚାଇନାରେ ୩.୪୧ ବିଲିୟନରୁ ଅଧିକ ଟିକା ଡୋଜ ଦିଆଯାଇଛି। ଏଥି ସହିତ ଆମେରିକାରେ ପ୍ରାୟ ୬୦ କୋଟି ଡୋଜ ଟିକା ଦିଆଯାଇଛି। ାଜିଲରେ ମୋଟ ୪୬ କୋଟି ଟିକା ଡୋଜ ପ୍ରୟୋଗ କରାଯାଇଛି। ଏଥି ସହିତ ବ୍ରିଟେନରେ ଏପର୍ଯ୍ୟନ୍ତ ପ୍ରାୟ ୧୫ କୋଟି ଡୋଜ ଦିଆଯାଇଛି।
ଭାରତରେ କୋଭିଡ ଟିକାକରଣ ୧୬ ଜାନୁୟାରୀ ୨୦୨୧ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ଆରମ୍ଭ ହୋଇଥିଲା। ଭାରତ ଭଳି ଦେଶରେ, ଯେଉଁଠାରେ ବିଶ୍ୱର ପ୍ରାୟ ୧୭.୫ ପ୍ରତିଶତ ଲୋକ ବାସ କରନ୍ତି, ସାଧାରଣ ଲୋକଙ୍କୁ ଏହି ଟିକା ପ୍ରଦାନ କରିବା ସହଜ ନ ଥିଲା। ଏହା ଏକ ଦୀର୍ଘ ଦିନର ଯାତ୍ରାରେ ସମ୍ଭବ ହୋଇ ଧୀରେ ଧୀରେ ୨୦୦ କୋଟିର ଲକ୍ଷ୍ୟରେ ପହଞ୍ଚିଛି ।
ମହାମାରୀର ପ୍ରାରମ୍ଭିକ ଲକ୍ଷଣଗୁଡିକ ୩୧ ଡିସେମ୍ବର ୨୦୧୯ ରେ ଚାଇନାର ଉହାନରେ ଚିହ୍ନଟ ହୋଇଥିଲା। ଏହା ପରେ, ୩୦ ଜାନୁଆରୀ ୨୦୨୦ ରେ, ବିଶ୍ୱ ସ୍ବାସ୍ଥ୍ୟ ସଂଗଠନ କରୋନା ମହାମାରୀ ନେଇ ଜନସ୍ବାସ୍ଥ୍ୟ ଜରୁରୀକାଳୀନ ପରିସ୍ଥିତି ଘୋଷଣା କରିଥିଲା।
୧୧ ମାର୍ଚ୍ଚ ୨୦୨୦ ରେ,ବିଶ୍ୱସ୍ବାସ୍ଥ୍ୟ ସଂଗଠନ କରୋନାଭାଇରସ ସଂକ୍ରମଣକୁ ମହାମାରୀ ଘୋଷଣା କରିଥିଲା। ଭାରତରେ କରୋନା ଆକ୍ରାନ୍ତର ପ୍ରଥମ ମାମଲା ୩୦ ଜାନୁୟାରୀ ୨୦୨୦ ରେ ଚିହ୍ନଟ କରାଯାଇଥିଲା। ଦେଶର ପ୍ରଥମ କରୋନା ରୋଗୀଙ୍କୁ କେରଳର ଥ୍ରୀସୁରରେ ଚିହ୍ନଟ କରାଯାଇଥିଲା।
କରୋନା ମହାମାରୀ ଯୋଗୁୁ ପ୍ରଥମ ମୃତ୍ୟୁ ୧୨ ମାର୍ଚ୍ଚ ୨୦୨୦ ରେ ଭାରତରେ ରେକର୍ଡ କରାଯାଇଥିଲା। ୧୯ ଏପ୍ରିଲ ୨୦୨୦ ରେ ଭାରତ ସରକାର ଏକ ଉଚ୍ଚ ସ୍ତରୀୟ ଟାସ୍କ ଫୋର୍ସ ଗଠନ କରିଥିଲେ। ୨୦ ଜୁନ ୨୦୨୦ ରେ, ଟିକାର ପ୍ରଥମ ଏବଂ ଦ୍ୱିତୀୟ ପର୍ଯ୍ୟାୟ ପରୀକ୍ଷା ଅନୁମୋଦନ କରାଯାଇଥିଲା। ମହାମାରୀ ମଧ୍ୟରେ କେନ୍ଦ୍ର ସରକାର ୨୯ ନଭେମ୍ବର ୨୦୨୦ରେ ମହାମାରୀ ବିରୁଦ୍ଧରେ ଲଢ଼ିବା ପାଇଁ ୯୦୦ କୋଟିର ଏକ ପ୍ରୋତ୍ସାହନ ପ୍ୟାକେଜ ଘୋଷଣା କରିଥିଲେ।