ନୂଆଦିଲ୍ଲୀ, ୨୦।୨(ପି.ଟି.): ଚାଇନା ମୋବାଇଲ ଉତ୍ପାଦନକାରୀ କମ୍ପାନୀ ଭିଭୋ ଆଗାମୀ ୨୦୨୧ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ରେ ଟାଇଟଲ ପ୍ରାୟୋଜକ ରହିବ ବୋଲି ଘୋଷଣା କରାଯାଇଛି। ଏ ନେଇ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଶୁକ୍ରବାର ସ୍ପଷ୍ଟ କରିଛି। ଏଥିସହିତ ଭିଭୋ ତା’ର ପୁରୁଣା ଭୂମିକାକୁ ପ୍ରତ୍ୟାବର୍ତ୍ତନ କରିବା ନିଶ୍ଚିତ ହୋଇଛି।
ଅନ୍ୟ ବଡ଼ ବଡ଼ କମ୍ପାନୀକୁ ପ୍ରାୟୋଜନ ଅଧିକାର ଟ୍ରାନ୍ସଫର କରିବା ନେଇ ପ୍ରୟାସ କରାଯାଇଥିଲେ ମଧ୍ୟ ଏଥିରେ ସଫଳତା ମିଳିପାରି ନାହିଁ। ଏ ନେଇ ମିଳିଥିବା ପ୍ରସ୍ତାବ ଆଶାନୁରୂପ ହୋଇପାରି ନ ଥିବାରୁ ଭିଭୋକୁ ପୁଣି ଥରେ ଏହି ଅଧିକାର ପ୍ରଦାନ କରାଯିବ ବୋଲି ବିସିସିଆଇ ପକ୍ଷରୁ କୁହାଯାଇଛି। ପୂର୍ବରୁ ବର୍ଷକୁ ୪୪୦ କୋଟି ଟଙ୍କା ବିନିମୟରେ ଭିଭୋ ଆଇପିଏଲ୍ ପ୍ରାୟୋଜକ ରହିଥିଲା ଓ ବିସିସିଆଇ ସହିତ ୫ ବର୍ଷୀୟା ଚୁକ୍ତି କରିଥିଲା। ତେବେ ଲଦାଖରେ ଭାରତ ଓ ଚାଇନା ମଧ୍ୟରେ ଦେଖାଦେଇଥିବା ସୀମା ବିବାଦ ଓ ଏ ନେଇ ଦୁଇ ଦେଶ ମଧ୍ୟରେ ହୋଇଥିବା ସଂଘର୍ଷ କାରଣରୁ ଭିଭୋର ଏହି ପ୍ରାୟୋଜନ ଚୁକ୍ତିକୁ ୨୦୨୦ରେ ସାମୟିକ ଭାବେ ବାତିଲ କରାଯାଇଥିଲା। ତେବେ ପ୍ରାୟୋଜନ ଅଧିକାର ହାସଲ କରିବାକୁ ଡ୍ରିମ୍ ୧୧ ଓ ଅନ୍ଏକାଡେମୀ ତରଫରୁ ପ୍ରସ୍ତାବ ଦିଆଯାଇଥିଲା। କିନ୍ତୁ ଭିଭୋ ଭଳି ଏହା ଆଶାନୁରୂପ ହୋଇପାରି ନ ଥିଲା। ଆସନ୍ତାବର୍ଷ ଏହି କମ୍ପାନୀଗୁଡିକ ଏ ନେଇ ପ୍ରୟାସ କରିବେ। ଫଳରେ ଶେଷରେ ଭିଭୋକୁ ପୁଣି ଥରେ ଏହି ଗୁରୁଦାୟିତ୍ୱ ବହନ କରିବାକୁ ହେବ ବୋଲି ବିସିସିଆଇ ସୂତ୍ରରୁ ପ୍ରକାଶ।
ଉଲ୍ଲେଖଥାଉ କି ଡ୍ରିମ୍ ୧୧ ଆଇପିଏଲ୍ର ୨୦୨୦ ସଂସ୍କରଣରେ ଟାଇଟଲ ସ୍ପୋନ୍ସର ଥିଲା। ୨୨୨ କୋଟି ଟଙ୍କା ବିନିମୟରେ ଡ୍ରିମ୍ ୧୧ ଏହି ଅଧିକାର ହାସଲ କରିଥିଲା। ବର୍ଷକୁ ଭିଭୋ ଦେଉଥିବା ଅର୍ଥର ଏହା ଅଧା ଥିଲା। ପୂର୍ବରୁ ୨୦୧୮ରୁ ୨୦୨୨ ପର୍ଯ୍ୟନ୍ତ ୫ ବର୍ଷ ପାଇଁ ଭିଭୋ ଆଇପିଏଲ୍ ପ୍ରାୟୋଜକ ଥିଲା। ଏଥିପାଇଁ ଭିଭୋକୁ ୨୧୯୦ କୋଟି ଟଙ୍କା ପୈଠ କରିବାକୁ ହୋଇଥାନ୍ତା। ତେବେ ଲଦାଖରେ ଭାରତ ଓ ଚାଇନା ସଂଘର୍ଷ ହୋଇଥିଲା ଓ ଏଥିରେ ୨୦ଜଣ ଭାରତୀୟ ସୈନିକ ପ୍ରାଣ ହରାଇଥିଲେ। ଏହାପରେ ସାରା ଦେଶରେ ଚାଇନା ବିରୋଧରେ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା। ଫଳରେ ଚାଇନା କମ୍ପାନୀଗୁଡିକର ଜିନିଷକୁ ବର୍ଜନ କରିବାକୁ ଦାବି ଜୋର ଧରିଥିଲା। ଫଳରେ ଭିଭୋ ଓ ବିସିସିଆଇ ୨୦୨୦ ସେସନ ପାଇଁ ଚୁକ୍ତି ବାତିଲ କରିବାକୁ ସହମତିରେ ନିଷ୍ପତ୍ତି ନେଇଥିଲେ। ଭିଭୋ ବର୍ଷକୁ ଦେଉଥିବା ଅର୍ଥର ଅଧା ଆଇପିଏଲ ଫ୍ରାଞ୍ଚାଇଜଗୁଡିକ ମଧ୍ୟରେ ସମାନ ଭାବେ ବାଣ୍ଟି ଦିଆଯାଇଥିଲା। ଫଳରେ ପ୍ରତ୍ୟେକ ଫ୍ରାଞ୍ଚାଇଜ୍ ୨୭.୫ କୋଟି ଟଙ୍କା ଲେଖାଏ ପାଇଥିଲେ। କୋଭିଡ୍-୧୯ କାରଣରୁ ଆଇପିଏଲ୍ ୟୁନାଇଟେଡ ଆରବ ଏମିରେଟ୍ସରେ ଆୟୋଜନ କରାଯାଇଥିଲା।