ମୁମ୍ବାଇ,୨୯।୧୦(ପି.ଟି.): ମଧ୍ୟପ୍ରାଚ୍ୟର ପ୍ରଥମ ଦେଶ ଭାବେ କାତାର ୨୦୨୨ ବିଶ୍ୱକପ୍ ଆୟୋଜନ କରିବ। ଏହି ବିଶ୍ୱକପ୍ରେ ୨୦୧୮ ସଂସ୍କରଣ ତୁଳନାରେ ଅଧିକ ଭାରତୀୟ ମ୍ୟାଚ୍ ଦେଖିବେ ବୋଲି କାତାର ଆୟୋଜକମାନେ ଆଶାବାଦୀ ଅଛନ୍ତି। ଭାରତୀୟ ଦର୍ଶକଙ୍କ ପାଇଁ ସୁବିଧାଜନକ ସମୟରେ ମ୍ୟାଚ୍ଗୁଡିକ ଆୟୋଜନ ହେବ। ଫଳରେ ଅଧିକ ଭାରତୀୟ ଦର୍ଶକ ଏହି ବିଶ୍ୱକପ୍ର ମ୍ୟାଚ୍ଗୁଡିକ ଦେଖିବେ ବୋଲି ବିଶ୍ୱକପ୍ ମୁଖ୍ୟ କାର୍ଯ୍ୟନିର୍ବାହୀ ନାସିର ଅଲ ଖାତେର କହିଛନ୍ତି। ୨୦୨୨ ବିଶ୍ୱକପ୍ ନଭେମ୍ବର ୨୧ ତାରିଖରୁ ଆରମ୍ଭ ହେବା କାର୍ଯ୍ୟକ୍ରମ ରହିଛି।
ରୁଷିଆରେ ଆୟୋଜିତ ହୋଇଥିବା ୨୦୧୮ ଫିଫା ବିଶ୍ୱକପ୍କୁ ପାଖାପାଖି ୩୦୦ ମିଲିୟନ ଭାରତୀୟ ଉପଭୋଗ କରିଥିଲେ। ତେବେ ସୁବିଧାଜନକ ଟାଇମିଂ କାରଣରୁ ଏଥର ବିଶ୍ୱକପ୍କୁ ଅପେକ୍ଷାକୃତ ଅଧିକ ଭାରତୀୟ ଫୁଟ୍ବଲ ପ୍ରେମୀ ଦେଖିବେ। ତେବେ କ୍ରିକେଟ ବିଶ୍ୱକପ୍ ଭଳି ଏହା ଭାରତରେ ଲୋକପ୍ରିୟ ହେବନାହିଁ ବୋଲି ଖାତେର ସ୍ପଷ୍ଟ କରିଛନ୍ତି। ଭାରତୀୟ ସମୟ ଦୃଷ୍ଟିକୋଣରୁ ଦେଖିବାକୁ ଗଲେ ଅଧିକାଂଶ ମ୍ୟାଚ୍ ସୁବିଧାଜନକ ସମୟରେ ଆରମ୍ଭ ହେବ। ଗ୍ରୁପ୍ ପର୍ଯ୍ୟାୟରେ ପ୍ରଥମ ମ୍ୟାଚ ଭାରତୀୟ ସମୟରେ ୩.୩୦ରେ ଆରମ୍ଭ ହେବ। ସେହିପରି ଅନ୍ତିମ ମ୍ୟାଚ୍ ୧୨. ୩୦ରେ ଆରମ୍ଭ ହେବ। ଅନ୍ୟପଟେ ଦ୍ୱିତୀୟ ଓ ତୃତୀୟ ମ୍ୟାଚ୍ ଯଥାକ୍ରମେ ୬. ୩୦ ଓ ୯.୩୦ରେ ଆରମ୍ଭ ହେବ। ତେଣୁ ଅଧିକରୁ ଅଧିକ ଭାରତୀୟ ପ୍ରଶଂସକ ଏହି ବିଶ୍ୱକପ୍ ମ୍ୟାଚ୍ ଦେଖିବା ନିଶ୍ଚିତ ହୋଇଛି।
ବିଶ୍ୱକପ୍ ଦେଖିବାପାଇଁ ଆସିବାକୁ ଥିବା ସବୁ ପ୍ରଶଂସକଙ୍କ ସୁବିଧାସୁଯୋଗ ପ୍ରଦାନ କରିବାରେ ଆମେ ଆଦୌ ହେଳା କରିବୁ ନାହିଁ ବୋଲି ସେ କହିଛନ୍ତି। କୋଭିଡ୍-୧୯ ମହାମାରୀ ସତ୍ତ୍ୱେ ୨୦୨୨ ବେଳକୁ ଏହି ମେଗା ଇଭେଣ୍ଟକୁ ଆମେ ସଫଳ କରିବାକୁ ସବୁମତେ ପ୍ରୟାସ କରିବୁ। ଟ୍ରେନିଂ ଓ ପ୍ରତିଯୋଗିତା ପାଇଁ ଭାରତୀୟ କ୍ଲବ୍ଗୁଡିକୁ ମଧ୍ୟ କାତାର ବିଶ୍ୱକପ୍ ଅବସରରେ ସ୍ବାଗତ କରିବ। ଗ୍ରୀଷ୍ମ କାରଣରୁ ବିଶ୍ୱକପ୍ରେ କାତାର କୁଲିଂ ସିଷ୍ଟମର ପ୍ରୟୋଗ କରିବ। ଏହି ଟେକ୍ନୋଲୋଜି ଅନ୍ୟ ଦେଶଗୁଡିକୁ ପ୍ରଦାନ କରିବା ପାଇଁ ଆମେ ପ୍ରସ୍ତୁତ ବୋଲି ଖାତେର କହିଛନ୍ତି।