ମୁମ୍ବାଇ,୧୪।୫ : କର୍ନାଟକ ବିଧାନସଭା ନିର୍ବାଚନରେ ଭାଜପା ପରାଜୟର ସମ୍ମୁଖୀନ ହୋଇଛି। କଂଗ୍ରେସ ବହୁ ସଂଖ୍ୟାରେ ଜିତିଛି। ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଏ ବିଷୟରେ ଖୁସି ବ୍ୟକ୍ତ କରିଛନ୍ତି। ତାଙ୍କର ପୁରୁଣା ସହଯୋଗୀ ଭାଜପାକୁ ସେ କଡ଼ା ସମାଲୋଚନା କରିଛନ୍ତି। ସେ କହିଛନ୍ତି କର୍ନାଟକ ନିର୍ବାଚନ ଫଳାଫଳ ପରେ ଦେଶରେ ଏକଚାଟିଆ ତଥା ଏକଛତ୍ରବାଦୀ ଶାସନକୁ ପରାସ୍ତ କରିବାର ଶୁଭାରମ୍ଭ ହୋଇଛି।
କର୍ନାଟକବାସୀଙ୍କୁ ସେମାନଙ୍କ ଦ୍ୱାରା ନିଆଯାଇଥିବା ନିଷ୍ପତ୍ତି ପାଇଁ ସେ ଅଭିନନ୍ଦନ ଜଣାଇଛନ୍ତି। କର୍ନାଟକ ନିର୍ବାଚନ ଫଳାଫଳ ଦ୍ୱାରା ଦେଶର ରାଜନୀତିରେ ଏକ ନୂତନ ଦିଗ ଏବଂ ଆଶାର ନୂଆ କିରଣ ଦେଖାଇଛି। କର୍ନାଟକର ଲୋକମାନେ ନିର୍ଭୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କ ଦ୍ୱାରା ସ୍ଥାପନା କରାଯାଇଥିବା ସରକାରଙ୍କୁ କ୍ଷମତାକୁ ହଟାଇ ଦେଇଛନ୍ତି।
ଏଥର ହିନ୍ଦୁ-ମୁସଲମାନ, ବଜରଙ୍ଗବାଲି, ହିଜାବ ଭଳି ଧାର୍ମିକ ପ୍ରସଙ୍ଗ କର୍ନାଟକ ନିର୍ବାଚନରେ କାମ କରି ନ ଥିବାବେଳେ କଂଗ୍ରେସ ଜନସାଧାରଣଙ୍କ ପ୍ରଶ୍ନ ଓ ପ୍ରସଙ୍ଗରେ ପ୍ରତିଦ୍ୱନ୍ଦ୍ୱିତା କରି ଜିତିଛି। ଏହା ହେଉଛି ୨୦୨୪ ଲୋକସଭା ନିର୍ବାଚନର ବିଜୟର ଆରମ୍ଭ। ଏହା ସହିତ ସେ ତାଙ୍କର ସହଯୋଗୀ କଂଗ୍ରେସର ପ୍ରମୁଖ ନେତା ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀଙ୍କୁ ଅଭିନନ୍ଦନ ଜଣାଇଛନ୍ତି।