ନୂଆଦିଲ୍ଲୀ,୧।୭(ପି.ଟି.): ୨୦୨୭ ଏସିଆନ୍ କପ୍ ଆୟୋଜନ ଅଧିକାର ପାଇଁ ଭାରତ ବିଡ୍ ଦାଖଲ କରିଛି। ଏହି ମେଗା ଇଭେଣ୍ଟର ୧୯ତମ ସଂସ୍କରଣ ଆୟୋଜନ ପାଇଁ ଭାରତ ସମେତ ମୋଟ୍ ୫ ଦେଶ ବିଡ୍ ଦାଖଲ କରିଛନ୍ତି ବୋଲି ଏସିଆନ ଫୁଟବଲ ଫେଡେରେଶନ (ଏଏଫ୍ସି) କହିଛି। ବିଡ୍ ଦାଖଲ କରିଥିବା ଅନ୍ୟ ୪ ଦେଶ ହେଲେ ଇରାନ, କାତାର, ସୌଦି ଆରବ ଓ ଉଜ୍ବେକିସ୍ତାନ। ବିଡିଂ ପ୍ରକ୍ରୟାରେ ଆବଶ୍ୟକ ହେଉଥିବା ସବୁ ପ୍ରକାର ଦସ୍ତାବିଜ ଦାଖଲ ନେଇ ଏଏଫ୍ସି ଏବେ ପ୍ରତ୍ୟେକ ବିଡିଂ ମେମ୍ବର ଆସୋସିଏଶନ ସହିତ ମଳିତ ଭାବେ କାର୍ଯ୍ୟ କରିବ। ପରେ ଏଏଫ୍ସି ଆୟୋଜକ ଦେଶର ନାମ ଘୋଷଣା କରିବ।
ବିଡ୍ ଦାଖଲ କରିଥିବା ସବୁ ୫ଟି ଦେଶ ତଥା ମେମ୍ବର ଆସୋସିଏଶନଗୁଡିକୁ ଏଏଫ୍ସି ଅଧ୍ୟକ୍ଷ ଶେଖ୍ ସଲମାନ ବିନ୍ ଇବ୍ରାହିମ୍ ଅଲ ଖଲିଫା ଧନ୍ୟବାଦ ଜଣାଇଛନ୍ତି। ଏସିଆନ କପ୍ ଆୟୋଜନ ନେଇ ଏହି ଦେଶଗୁଡିକ ଉତ୍ସାହ ପ୍ରକଟ କରିବା ଖୁସିର ବିଷୟ ବୋଲି ସେ କହିଛନ୍ତି। ବିଡିଂ ପ୍ରକ୍ରିୟାରେ ସାମିଲ ହୋଇଥିବା ଏହି ଦେଶଗୁଡିକୁ ସେ ଶୁଭେଚ୍ଛା ଜଣାଇଛନ୍ତି। ୧୯୫୬ରେ ଏହି ଟୁର୍ନାମେଣ୍ଟ ପ୍ରଥମଥର ପାଇଁ ଆୟୋଜନ ହୋଇଥିଲା। ଏହା ପରଠାରୁ ଏହି ୫ ଦେଶରୁ ୨ଟି ଦେଶ ପୂର୍ବରୁ ଏହି ଟୁର୍ନାମେଣ୍ଟ ଦୁଇଥର ସଫଳତାର ସହ ଆୟୋଜନ କରିସାରିଛନ୍ତି। ଏବେକାର ଚାମ୍ପିୟନ କାତାର ୧୯୮୮ ଓ ୨୦୧୧ରେ ଏହି ଟୁର୍ନାମେଣ୍ଟ ଆୟୋଜନ କରିଥିଲା। ଇରାନ୍ ମଧ୍ୟ ପୂର୍ବରୁ ଦୁଇଥର ଏହି ଇଭେଣ୍ଟ ଆୟୋଜନ କରିଛି। ଇରାନ ୧୯୬୮ ଓ ୧୯୭୬ରେ ଇରାନ ଏସିଆନ କପ୍ ଆୟୋଜନ କରିଥିଲା ଓ ଘରୋଇ ପରିବେଶ ଚାମ୍ପିୟନ ହେବାର ଗୌରବ ଅର୍ଜନ କରିଥିଲା। ପୂର୍ବରୁ ସୌଦି ଆରବ ଓ ଭାରତ ଏହି ପ୍ରତିଯୋଗିତାରେ ୩ଥର ଚାମ୍ପିୟନ ହେବାର ଗୌରବ ଅର୍ଜନ କରିଥିଲା। ଭାରତକୁ ୨୦୨୨ ଏଏଫ୍ସି ମହିଳା ଏସିଆନ କପ୍ ଆୟୋଜନ କରିବାର ଅଧିକାର ମିଳିଛି। ସେହିପରି ଉଜ୍ବେକିସ୍ତାନ ଚଳିତ ବର୍ଷ ଏଏଫ୍ସି ୧୯ ବର୍ଷରୁ କମ୍ ଚାମ୍ପିୟନଶିପ୍ ଆୟୋଜନ କରିବ। ପ୍ରଥମଥର ପାଇଁ ଭାରତ ଓ ଉଜ୍ବେକିସ୍ତାନ ଏହି ଟୁର୍ନାମେଣ୍ଟଗୁଡିକୁ ଆୟୋଜନ କରିବାକ ଯାଉଛନ୍ତି।
