ଭୁବେନଶ୍ବର,୩ା୧୨(ବ୍ୟୁରୋ): ରାଜ୍ୟର ୧୧୫ ପୌରାଞ୍ଚଳର ସମସ୍ତ ୨୦୫୫ ୱାର୍ଡରେ ମୌଳିକ ସୁବିଧାକୁ ରାଜ୍ୟ ସରକାର ଗୁରୁତ୍ୱାରୋପ କରିଛନ୍ତି। ଆସନ୍ତା ଜାନୁଆରୀ ୨୬ରୁ ଏହି ୱାର୍ଡ କାର୍ଯ୍ୟାଳୟ କାର୍ଯ୍ୟକ୍ଷମ କରିବାକୁ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ନିଷ୍ପତ୍ତି ହୋଇଛି। ସେହିପରି ୨୦୨୩-୨୪ ବର୍ଷ ପାଇଁ ରାଜ୍ୟ ସରକାରଙ୍କ ଫ୍ଲାଗଶିପ୍ କାର୍ଯ୍ୟକ୍ରମ ‘ମୁକ୍ତା’ ଅଧୀନରେ ୱାର୍ଡୱାରୀ ବାର୍ଷିକ ଆକ୍ସନ ପ୍ଲାନ ପ୍ରସ୍ତୁତି ଉପରେ ଗୁରୁତ୍ୱ ଦିଆଯାଇଛି। ବିଭାଗୀୟ ପ୍ରମୁଖ ସଚିବ ଜି. ମାଥିଭାଥନନ୍ଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ବୈଠକରେ ଏହି ନିଷ୍ପତ୍ତି ହୋଇଛି।
୧୧୫ ପୌରାଞ୍ଚଳର ସମସ୍ତ ୨୦୫୫ ୱାର୍ଡରେ ମୌଳିକ ସୁବିଧାକୁ ଗୁରୁତ୍ୱ ଦିଆଯିବ। କାର୍ଯ୍ୟାରମ୍ଭ ପୂର୍ବରୁ ପୌରାଞ୍ଚଳୱାରୀ ଆକ୍ସନପ୍ଲାନଗୁଡ଼ିକୁ ମୁଖ୍ୟମନ୍ତ୍ରୀ ଅନୁମୋଦନ ପ୍ରଦାନ କରିବେ। ଆସନ୍ତା ୧୫ ତାରିଖ ସୁଦ୍ଧା ୨୦୨୩-୨୪ ପାଇଁ ଆକ୍ସନ ପ୍ଲାନ ବିଭାଗକୁ ପଠାଇବାକୁ କୁହାଯାଇଛି। କୌଣସି ୱାର୍ଡ ଏଥିରୁ ବାଦ୍ ନ ପଡ଼ିବା ନେଇ ପ୍ରମୁଖ ସଚିବ ନିର୍ଦ୍ଦେଶ ଦେଇଥିଲେ। ୧୧୫ ପୌରାଞ୍ଚଳରେ ୨୦୫୫ ମୁକ୍ତାକାଶ ବ୍ୟାୟାମଶାଳା (ଓପନ୍ ଏୟାର ଜିମ୍) ଏବଂ ୨୦୫୫ ଶିଶୁ ଖେଳ କେନ୍ଦ୍ର (ଚାଇଲ୍ଡ ପ୍ଲେ ଷ୍ଟେଶନ) ପ୍ରତିଷ୍ଠା କରାଯିବ। ଉପଯୁକ୍ତ ପ୍ରକଳ୍ପ ଏବଂ ସମ୍ଭାବ୍ୟ ମିଶନ୍ ଶକ୍ତି ଗ୍ରୁପ୍/ଏସ୍ଡିଏକୁ କାର୍ଯ୍ୟକାରୀ ସଂସ୍ଥା ଭାବେ ମନୋନୟନ କରିବାରେ ୱାର୍ଡସ୍ତରୀୟ ଓ ପୌରାଞ୍ଚଳସ୍ତରୀୟ କମିଟିଗୁଡ଼ିକ ସକ୍ରିୟ ଭୂମିକା ଗ୍ରହଣ କରିବେ। ମିଶନ ଶକ୍ତି ଗ୍ରୁପ ଏବଂ ଏସ୍ଡିଏ ସମ୍ପୃକ୍ତିରେ ‘ମୁକ୍ତା’ ଅଧୀନରେ ସବୁ ପ୍ରକଳ୍ପ କାର୍ଯ୍ୟ କରିବ। ସେହିପରି ନଗର ଭିତ୍ତିଭୂମି ଅଧୀନରେ ମୁଖ୍ୟମନ୍ତ୍ରୀଙ୍କ ଦ୍ବାରା ମଞ୍ଜୁର ହୋଇଥିବା ସମସ୍ତ ପ୍ରକଳ୍ପର କାର୍ଯ୍ୟ ଆସନ୍ତା ୨୦୨୩ ମାର୍ଚ୍ଚ ସୁଦ୍ଧା ଶେଷ ହେବା ଦରକାର ବୋଲି କୁହାଯାଇଛି। ବୈଠକରେ ଅନ୍ୟମାନଙ୍କ ମଧ୍ୟରେ ପୌର ପ୍ରଶାସନର ନିର୍ଦ୍ଦେଶକ ସଂଗ୍ରାମଜିତ ନାୟକ, ଓଏସ୍ଡି ସଞ୍ଜୟ ପାରମାଣିକ, ଅତିରିକ୍ତ ସଚିବ ପ୍ରଭାତ ମହାପାତ୍ର ଏବଂ ‘ସୁଡା’ ନିର୍ଦ୍ଦେଶକ ସାରଦା ପ୍ରସାଦ ପଣ୍ଡା ପ୍ରମୁଖ ଉପସ୍ଥିତ ଥିଲେ।