ଦାମନଯୋଡି,୨୫।୪(ଡିଏନ ଏ): ନାଲକୋ ବିସ୍ଥାପିତ କଲୋନୀ ଝଡିଗୁଡ଼ା ସାହିରେ ଗୁରୁବାର ଘଟିଥିବା ଡବଲ ମର୍ଡର ଘଟଣାରେ ୨ଦିନ ଧରି ଅଟକ ଥିବା ୨୮ ଜଣଙ୍କ ମଧ୍ୟରୁ ରବିବାର ପୋଲିସ ୨୧ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। ଏଥିରେ ସମ୍ପୃକ୍ତ ଅନ୍ୟ ୭ ଜଣ ନାବାଳକ ଥିବାରୁ ସେମାନଙ୍କୁ ଜୟପୁରସ୍ଥିତ ଜୁଭେନାଇଲ ଜଷ୍ଟିସ ବୋର୍ଡରେ ହାଜର କରାଯାଇଛି। ଗିରଫ ୨୧ ଜଣଙ୍କ ମଧ୍ୟରେ ପ୍ରହଲ୍ଲାଦ ମାଳି, ଧନୁର୍ଜୟ ଗଲରୀ, ନାଥ ଜାନି, ଭଗବାନ ଗଲରି, ମିସ୍ର ପାଞ୍ଜି, ଅର୍ଜୁନ ଗଲରୀ, ରଥ ଜାନି, ଭୀମ ଖରା, କୃତ୍ତିିବାସ ଗଲରି, ଦଇତାରୀ ଗଲରି, ଅନନ୍ତ ଗଲରି, ଲକ୍ଷ୍ମଣ ଗଲରି, ଜୟଦାନ ଜାନି, ପିଲୁକୁ ଗଲରି, ରବି ମାଳି, ଲଚିମ ମାଳି, ନିରନ ମାଳି, ଲକ୍ଷ୍ମଣ ମାଳି, ହରି ମାଳି, ରୁକଧର ଖିନବୁଡ଼ି, ମୁକୁନା ସାଉନ୍ତା ଅଛନ୍ତି। ସିନ୍ଧିପାର ଗ୍ରାମର ସୁରେନ୍ଦ୍ର ଦାମିଙ୍କ ଏତଲାକ୍ରମେ ଦାମନଯୋଡି ଥାନାରେ କେସ ନଂ.୩୭/୨୨ରେ ମାମଲା ରୁଜୁ ହୋଇ ତଦନ୍ତ ଚାଲିଥିଲା। ଘଟଣାର ଗୁରୁତ୍ୱକୁ ନେଇ ସୁନାବେଡ଼ା ଏସଡିପିଓ ମନୋଜ ବେହେରାଙ୍କ ନେତୃତ୍ୱରେ ମଧ୍ୟ ଆଇଆଇସି ସମ୍ବିତ ବେହେରା, ସେମିଳିଗୁଡା ଆଇଆଇସି ପ୍ରଦ୍ୟୁମ୍ନ ମହାପାତ୍ର, ଦାମନଯୋଡି ଆଇଆଇସି ଗୌରହରି ସାହୁ ଓ ଏସଆଇ ଦୀପକ ପଣ୍ଡାଙ୍କୁ ନେଇ ଏକ ଟିମ ଗଠନ ହୋଇଥିଲା ପୋଲିସ ହତ୍ୟାକାଣ୍ଡରେ ବ୍ୟବହୃତ ୨ଟି ତେଣ୍ଟା, ୬ଟି ଟାଙ୍ଗିଆ, ୩ଟି ଛୁରି ସହ ଏକ ବୋଲେରୋ ଜବତ କରିଛି। ସୂଚନାଯୋଗ୍ୟ, ଗୁରୁବାର ଚଇତି ପର୍ବ ପାଳନ ବେଳେ ଝଡିଗୁଡ଼ା ସାହିରେ ସାମାନ୍ୟ କଥାକୁ କେନ୍ଦ୍ର କରି ଦୁଇ ଗୋଷ୍ଠୀ ମୁହାଁମୁହିଁ ହୋଇଥିଲେ। ଏଥିରେ ସିନ୍ଧିପାର ଗ୍ରାମର ଦେବେନ୍ଦ୍ର ଦାମି ଓ ପୂର୍ଣ୍ଣଚନ୍ଦ୍ର ନାୟକ ନାମକ ୨ ଯୁବକଙ୍କ ମୃତ୍ୟୁ ହୋଇଥିଲା।