ଭୁବନେଶ୍ୱର,୨୪।୨(ବ୍ୟୁରୋ): ଗ୍ରାହକଙ୍କଠାରୁ ବାକି ଥିବା ପ୍ରାୟ ୨୧ ଲକ୍ଷରୁ ଊର୍ଦ୍ଧ୍ୱ ଟଙ୍କା ଆଦାୟ କରି ଅଫିସ୍ ଆକାଉଣ୍ଟରେ ଡିପୋଜିଟ୍ ନ କରି ହଡ଼ପ କରିବା ଅଭିଯୋଗରେ ମଞ୍ଚେଶ୍ୱର ଥାନା ପୋଲିସ ଏକ କମ୍ପାନୀର ଆସିଷ୍ଟାଣ୍ଟ ମ୍ୟାନେଜରଙ୍କୁ ବିହାରସ୍ଥିତ ପଟେଲନଗର ଥାନା ଅଞ୍ଚଳରୁ ଗିରଫ କରିଛି। ଅଭିଯୁକ୍ତ ହେଲେ ଉତ୍ତରପ୍ରଦେଶ ବାରାଣସୀ ଜିଲାର ରତେନଶ ସିଂ ଓରଫ ପିଣ୍ଟୁ। ଏନେଇ ପୋଲିସ ପିଣ୍ଟୁଙ୍କ ନାମରେ ମାମଲା (ନଂ.୨୧/୨୦୨୩) ରୁଜୁ କରି ଗୁରୁବାର କୋର୍ଟ ଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ସୂଚନାଯୋଗ୍ୟ, ଅଭିଯୁକ୍ତ ପିଣ୍ଟୁ ପ୍ରିଜିମ ଜନ୍ଶନ ଆର୍ସିଏମ୍-ଇଣ୍ଡିଆ କମ୍ପାନୀର ଆସିଷ୍ଟାଣ୍ଟ ମ୍ୟାନେଜର ଭାବେ କାର୍ଯ୍ୟ କରୁଥିଲେ। ଉକ୍ତ କମ୍ପାନୀରୁ ଅଧିକାଂଶ ଲୋକ ଘର ଛାତ ପାଇଁ କଂକ୍ରିଟ ସାମଗ୍ରୀ ବାକିରେ ନେଇଥାନ୍ତି। ଫଳରେ ଗ୍ରାହକଙ୍କ ଉପରେ ଲକ୍ଷ ଲକ୍ଷ ଟଙ୍କାର ବାକି ପଡିଥାଏ। କିନ୍ତୁ ପିଣ୍ଟୁ ଗ୍ରାହକଙ୍କଠାରୁ ଆଦାୟ କରିଥିବା ୨୧ ଲକ୍ଷ ୩୧ ହଜାର ୭୨୦ ଟଙ୍କାକୁ ଅଫିସରେ ଡିପୋଜିଟ୍ ନ କରି ନିଜେ ହଡ଼ପ କରିଥିଲେ। କମ୍ପାନୀ ପକ୍ଷରୁ ବକେୟା ଟଙ୍କା ଜମା କରିବାକୁ ଫୋନ୍ କଲ୍ କରାଯିବା ପରେ ଗ୍ରାହକମାନେ ଟଙ୍କା ଦେଇଥିବା କହିଥିଲେ। ଆସିଷ୍ଟାଣ୍ଟ୍ ମ୍ୟାନେଜର ପିଣ୍ଟୁ ଟଙ୍କା ହଡ଼ପ କରିଥିବା ଜଣାପଡିବା ପରେ ଏନେଇ ଉକ୍ତ କମ୍ପାନୀର ଅଧିକାରୀ ପ୍ରଣୟ ମହାନ୍ତି ମଞ୍ଚେଶ୍ୱର ଥାନାରେ ଅଭିଯୋଗ କରିଥିଲେ ।