ନୂଆପଡ଼ା ଅଫିସ,୩।୭: ନୂଆପଡା ସଦର ବିଜ୍ଞାପିତ ଅଞ୍ଚଳ ପରିଷଦ ଅଧୀନ ଗଡତୋଲ ଗାଁର ଜଣଙ୍କ ଘରୁ ଶୁକ୍ରବାର ୨୧ଟି ନାଗ ସାପ ଛୁଆ ବାହାରିଛି। ତେବେ ଭୟରେ ପରିବାର ଲୋକେ ସବୁ ସାପକୁ ମାରି ଦେଇଛନ୍ତି ।
ମିଳିଥିବା ସୂଚନା ଅନୁସାରେ, ଶୁକ୍ରବାର ରାତିରେ ଗଡତୋଲ ଗାଁର ମନିରାମ ପଟେଲଙ୍କ ଘର ପାଖରେ ଏକ ନାଗସାପ ବୁଲୁଥିବା ଦେଖିବାକୁ ମିଳିଥିଲା। ପରିବାର ଲୋକେ ଭୟଭୀତ ହୋଇ ତାକୁ ମାରି ପୋଡ଼ି ଦେଇଥିଲେ। ଘରେ କାଳେ ଆଉ ସାପ ରହିଥିବ ଭାବି ଖୋଜାଖୋଜି କରିବା ସମୟରେ ଏକ ଗାତରୁ ନାଗ ସାପର ୧୬ଟି ଅଣ୍ଡା ଓ ୨୧ଟି ଛୁଆ ବାହାରିଥିଲେ। ପରେ ସବୁ ସାପକୁ ପରିବାର ଲୋକେ ମାରି ଦେଇଥିବା ଜଣାପଡିଛି। ଏ ସଂକ୍ରାନ୍ତରେ ନୂଆପଡା ବନ ବିଭାଗ ରେଞ୍ଜରଙ୍କ ସହ ଯୋଗାଯୋଗ ସମ୍ଭବ ହୋଇପାରିନାହିଁ ।