ଢେଙ୍କାନାଳ ଅଫିସ, ୪।୧୧: କାଗଜପତ୍ର ଜାଲିଆତି କରି ଏକ ଡିପୋରୁ ଲକ୍ଷାଧିକ ଟଙ୍କାର କୋଇଲା ଚୋରାଚାଲାଣ କରିଥିବା ଅଭିଯୋଗରେ ଢେଙ୍କାନାଳ ଜିଲା ରାସୋଳ ଥାନା ପୋଲିସ ୨ଜଣଙ୍କୁ ଗିରଫ କରିଛି। ସେମାନଙ୍କଠାରୁ କୋଇଲା ଚୋରା ଚାଲାଣରେ ବ୍ୟବହୃତ ଏକ ଟ୍ରକ୍, ୫ ନକଲି ଷ୍ଟାମ୍ପ, କମ୍ପ୍ୟୁଟର, ୧୦ ପ୍ରି-ଆକ୍ଟିଭେଟେଡ୍ ସିମକାର୍ଡ, ୪ ମୋବାଇଲ ସମେତ ବ୍ୟାଙ୍କ କାଗଜପତ୍ର ଜବତ କରାଯାଇଛି। ଚୋରାଚାଲାଣ ହୋଇଥିବା କୋଇଲାର ମୂଲ୍ୟ ୨ଲକ୍ଷ ଟଙ୍କା ହେବ ବୋଲି ଜିଲା ପୋଲିସ କାର୍ଯ୍ୟାଳୟ ସୂତ୍ରରୁ ଜଣାପଡ଼ିଛି।
ସୂଚନାଯୋଗ୍ୟ, ରାସୋଳ ଥାନା କାରନ୍ଦା ଅଞ୍ଚଳରେ ଥିବା ଆସୁରାନ୍ସ ମେଟାଲଏଡ୍ ପ୍ରାଇଭେଟ୍ ଲିମିଟେଡ୍ ଡିପୋରୁ ସମ୍ପୃକ୍ତ ୨ ଅଭିଯୁକ୍ତ କାଗଜପତ୍ର ଓ ନମ୍ବର ଜାଲିଆତି କରି ଏକ ଟ୍ରକ୍ରେ ୨୧ ଟନ୍ କୋଇଲା ଚୋରାଚାଲାଣ କରିଥିଲେ। ଏ ନେଇ ଡିପୋ ମ୍ୟାନେଜରଙ୍କ ଅଭିଯୋଗକ୍ରମେ ଗତ ସେପ୍ଟେମ୍ବର ୨୬ରେ ନଂ. ୧୭୫/୨୧ରେ ଏକ ମାମଲା ରୁଜୁ କରାଯାଇଥିଲା। ପୋଲିସ ମାମଲାର ତଦନ୍ତ ଚଳାଇଥିଲା।
