ଲଣ୍ଡନ: ଯଦି ଆପଣ ଆମିର ଖାନ୍ ଅଭିନୀତ ‘ଗଜନୀ’ ଫିଲ୍ମ ଦେଖିଥିବେ, ତେବେ ତାଙ୍କର ଭୂମିକା କିଭଳି ଥିଲା ମନେଥିବ ନିଶ୍ଚୟ। ଫିଲ୍ମରେ ଅଭିନେତା ଶର୍ଟ ଟର୍ମ ମେମୋରୀ ଲସ୍ ଭଳି ରୋଗର ଶିକାର ହୋଇଥିଲେ। କିଛି ସମୟ ପାଇଁ ସେ ସବୁକିଛି ଭୁଲି ଯାଉଥିଲେ। ଏବେ ବାସ୍ତବ ଜୀବନରେ ଏଭଳି ଘଟଣା ଦେଖିବାକୁ ମିଳିଛି। ଏହି କାରଣରୁ ଜଣେ ୨୧ ବର୍ଷୀୟ ଯୁବତୀଙ୍କ ଜୀବନ କଷ୍ଟକର ହୋଇପଡ଼ିଲାଣି। ଅନେକ ଥର ସେ ନିଜର ପରିବାର ସହ ପାର୍ଟନରଙ୍କୁ ଭୁଲି ଯାଉଛନ୍ତି।
ଯୁବତୀ ଜଣଙ୍କ ହେଉଛନ୍ତି ମେଗାନ ଜ୍ୟାକ୍ସନ। ସେ ଇଂଲଣ୍ଡର ବେଷ୍ଟ ୟାର୍କସାୟରର ବାସିନ୍ଦା। ମେଗାନ ବେଶି ଉତ୍ସାହିତ ହେଲେ, ହସିଲେ ଅଥବା ବଡ଼ ପାଟିରେ କଥା ଶୁଣିଲେ, ନିଜ ସ୍ମରଣଶକ୍ତି ହରାଇ ବସୁଛନ୍ତି। ଫଳରେ ସେ କିଏ ଏବଂ ତାଙ୍କର ଜୀବନ ବିଷୟରେ କିଛି ମନେ ରହୁନାହିଁ। ଏପରିକି ସେ ପରିବାରଲୋକ, ପ୍ରେମିକାଙ୍କୁ ଚିହ୍ନିପାରୁନାହାନ୍ତି।
ଏଭଳି ଅସୁବିଧାର ସମ୍ମୁଖୀନ ହେବା ପରେ କୌଣସି ପ୍ରକାର ସରପ୍ରାଇଜ୍ ଦେବାକୁ ଚାହୁଁନାହନ୍ତି ତାଙ୍କ ସମଲିଙ୍ଗୀ ପାର୍ଟନର ତାରା ସୋର୍କିନ। ସେ ଉଭୟଙ୍କ ପୁରୁଣାସ୍ମୃତିକୁ ମନେ ପକାଇବାକୁ ଯାଇ ପ୍ରତ୍ୟହ ଡାଏରୀ ଲେଖିବା ସହ ଅସୁବିଧା ହେଲେ ଫଟୋ ଦେଖାଉଛନ୍ତି। ଏଥିସହ ସାଥୀ ମେଗାନଙ୍କ ପସନ୍ଦର ଗୀତ ଶୁଣାଇଥାନ୍ତି। କିଛି ଘଣ୍ଟା ପରେ ମେଗାନ ସ୍ବାଭାବିକ ସ୍ଥିତିକୁ ଫେରିଥାନ୍ତି।
ରୋଗ ଯୋଗୁ ମାନସିକ ସ୍ଥିତି ଠିକ୍ ରହୁନାହିଁ ବୋଲି ମେଗାନ କହିଛନ୍ତି। ବଜାରରୁ ସେ ବେଳେବେଳେ ପସନ୍ଦ ନ ଥିବା ଖାଦ୍ୟ ସାମଗ୍ରୀ ନେଇ ଆସୁଛନ୍ତି। ତାରାଙ୍କୁ ଡେଟ୍ କରିବା ଆରମ୍ଭ କରିବା ପରେ ସେ ଏବେ ଯତ୍ନ ନେଉଛନ୍ତି। କିଛି ମାସର ସମ୍ପର୍କ ମଧ୍ୟରେ ସେ ଚାରି ଥର ତାଙ୍କୁ ଭୁଲି ଛନ୍ତି। ସେତେବେଳେ ତାରା ତାଙ୍କ ପ୍ରେମିକା ବୋଲି କେହି କହିଲେ ସେ ଚିଡି ଉଠନ୍ତି। ଏପରିକି ସେ ଜଣେ ଲେସବିଆନ୍ ବୋଲି ଭୁଲିଯାଇଥାନ୍ତି। କିଛି ଘଣ୍ଟା ପରେ ସବୁକିଛି ମନେ ପଡ଼ିଲେ, ଜୀବନ ସ୍ବଭାବିକ ଅବସ୍ଥାକୁ ଫେରେ ବୋଲି ସେ କୁହନ୍ତି।
