ମାଥିଲି,୨।୪(ଡି.ଏନ.ଏ.): ମାଲକାନଗିରି ଜିଲାରେ ଏପରି ଜଣେ ଯୁବକ ଅଛନ୍ତି ଯିଏ ଜନ୍ମ ହେବାଠାରୁ ଏ ପର୍ଯ୍ୟନ୍ତ ଭାତ ଖାଇନାହାନ୍ତି। କେବଳ ଚୁଡ଼ା ମୁଢ଼ି ଖାଇ ବଞ୍ଚତ୍ଛନ୍ତି। ସେ ହେଲେ ଗ୍ରାମର ମୀନ କୁମାର ସଗରିଆ ଓ ପାର୍ବତୀ ସାଗରିଆଙ୍କ ପୁଅ କିଶୋର। ଜିଲାର ମାଥିଲି ବ୍ଲକ ଧୁଙ୍ଗିଆପୁଟ ପଞ୍ଚାୟତର ପାତ୍ରପୁଟ ଗ୍ରାମରେ ତାଙ୍କ ଘର।
ଜନ୍ମ ହେବା ପରଠାରୁ କିଶୋରଙ୍କ ଭାତ ଖାଇବା ପ୍ରତି ଆଗ୍ରହ ନାହିଁ। ତାଙ୍କର ଏପରି ଚିନ୍ତାଧାରା ପରିବାର ଲୋକଙ୍କୁ ଚିନ୍ତାରେ ପକାଇଥିଲା। ପରିବାର ଲୋକେ ଅନେକ ଚେଷ୍ଟା କରିଥିଲେ ମଧ୍ୟ ତାଙ୍କୁ ଭାତ ଖୁଆଇ ପାରି ନ ଥିଲେ। ଶେଷରେ ନିରାଶ ହୋଇ ନୀରବ ରହିଥିଲେ। କିଶୋର ଭାତ ବଦଳରେ ଚୁଡ଼ା ମୁଢ଼ି ଖାଇବାରେ ଆଗ୍ରହ ପ୍ରକାଶ କରିଥିଲେ। ତାହାକୁ ସେ ଏପର୍ଯ୍ୟନ୍ତ ଖାଇ ରହି ଆସୁଛନ୍ତି ବୋଲି କହନ୍ତି ସେ। ଏଥିପାଇଁ କେବେ ସେ ଦୁର୍ବଳତା ଅନୁଭବ କରିନାହାନ୍ତି କି କିଛି ସମସ୍ୟା ଉପୁଜିନାହିଁ ବୋଲି କହନ୍ତି କିଶୋର। ବାପାଙ୍କୁ ହରାଇଥିବା କିଶୋର ନିଜ ପାଠପଢା ପ୍ରତି ମଧ୍ୟ ଯତ୍ନବାନ୍ ଅଛନ୍ତି।
ଗୋବିନ୍ଦପାଲିସ୍ଥିତ ବିଜୁ ପଟ୍ଟନାୟକ ଡିଗ୍ରୀ କଲେଜରେ ସ୍ନାତକ ଶେଷ କରିଥିବା କିଶୋରଙ୍କ ଉପରେ ପରିବାର ଚଳାଇବା ଦାୟିତ୍ୱ ରହିଛି। ଏହାକୁ ତୁଲାଇବା ସହ ସାନ ଭଉଣୀଭାଇଙ୍କୁ ପାଠ ପଢ଼ାଉଛନ୍ତି। ଏ ସମ୍ପର୍କରେ ମାଥିଲି ଉପଖଣ୍ଡ ଡାକ୍ତରଖାନାର ଭାରପ୍ରାପ୍ତ ସ୍ବାସ୍ଥ୍ୟକେନ୍ଦ୍ର ଅଧିକାରୀଙ୍କୁ ପଚାରିବାରୁ ସେ କହିଛନ୍ତି, ପିଲାଟି ଦିନରୁ କିଶୋର ଚୁଡ଼ା ମୁଢ଼ି ଖାଉଛନ୍ତି, ଏହା ମଧ୍ୟ ଏକ ପ୍ରକାର ଖାଦ୍ୟ। ମାତ୍ର ଭାତ ନ ଖାଇବା ଦ୍ୱାରା ଶରୀରରେ ଶକ୍ତିର ଅଭାବ ଦେଖାଯାଏ। ଏହା ପରେ ତାଙ୍କର ସମସ୍ୟା ସୃଷ୍ଟି କରିପାରେ ବୋଲି ସେ କହିଛନ୍ତି।
