ଭୁବନେଶ୍ୱର,୧୩।୧୧(ବ୍ୟୁରୋ): ୧୯୫୦ ମସିହାରୁ ୨୦୧୧ ମଧ୍ୟରେ ରାଜ୍ୟ ସରକାରଙ୍କ ଦ୍ୱାରା ପ୍ରଣୀତ ୨୧୪ଟି ଆଇନକୁ ରଦ୍ଦ କରାଯାଇଛି। ଆଇନ ବିଭାଗ ଦେଇଥିବା ଏହି ପ୍ରସ୍ତାବକୁ ଅର୍ଥ ବିଭାଗ ଅନୁମୋଦନ କରିଛି। ଏ ନେଇ ଓଡ଼ିଶା ରାଜ୍ୟ ବିଧି ଆୟୋଗଙ୍କ ସୁପାରିସକୁ ଗ୍ରହଣ କରି ରାଜ୍ୟ ସରକାର ଓଡ଼ିଶା ବିନିଯୋଗ (ନିରସ୍ତ୍ର)ଅଧିନିୟମ-୨୦୨୦ ପ୍ରଣୟନ କରିବାକୁ ନିଷ୍ପତ୍ତି ନେଇଛନ୍ତି। ଗୁରୁବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟ କ୍ୟାବିନେଟ୍ ବୈଠକରେ ଏହି ନିଷ୍ପତ୍ତି ନିଆଯାଇଛି।
କେନ୍ଦୁଝର ଜିଲାର ଯୋଡ଼ା ସହର ମଧ୍ୟରେ ଯୋଡ଼ା-ବାମେବାରୀ ଜାତୀୟ ରାଜପଥ ଯାଇଛି। ଭିଡ଼କୁ କମାଇବା ଲାଗି ଯୋଡ଼ା ସହର ମଧ୍ୟରେ ୩ କି.ମି. ବ୍ୟାପୀ ଏକ ଫ୍ଲାଏଓଭର ନିର୍ମାଣ କରିବାକୁ ଜିଲା ଖଣିଜ ପାଣ୍ଠି ବୋର୍ଡ ନିଷ୍ପତ୍ତି ନେଇଛି। ବୋର୍ଡ ଏହି କାର୍ଯ୍ୟକୁ ଓଡ଼ିଶା ସେତୁ ଓ ନିର୍ମାଣ ନିଗମ ଦ୍ୱାରା କରାଇବାକୁ ସ୍ଥିର କରିଛି। ଏଥିପାଇଁ ୧୪୪.୧୧ କୋଟି ଟଙ୍କାର ଟେଣ୍ଡରକୁ କ୍ୟାବିନେଟ୍ ମଞ୍ଜୁରୀ କରିଛି। ଏହାକୁ ୩୦ ମାସ ମଧ୍ୟରେ ଶେଷ କରାଯିବ।
ପୁରୀ ଶ୍ରୀମନ୍ଦିର ଚତୁଃପାର୍ଶ୍ୱର ଐତିହ୍ୟ ସୁରକ୍ଷା କରିଡର ନିମନ୍ତେ ଅଧିଗ୍ରହଣ କରାଯାଇଥିବା ସମସ୍ତ ସରକାରୀ ଜମିକୁ ପ୍ରଭୁ ଶ୍ରୀଜଗନ୍ନାଥ ବିଜେ, ପୁରୀ ମାର୍ଫତ୍ ଶ୍ରୀଜଗନ୍ନାଥ ମନ୍ଦିର ପରିଚାଳନା କମିଟି ନାମରେ ବିନା ମୂଲ୍ୟରେ ହସ୍ତାନ୍ତର ଏବଂ ରେକର୍ଡ ସଂଶୋଧନ ପାଇଁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ଏହାକୁ ରାଜ୍ୟ କ୍ୟାବିନେଟ୍ ଅନୁମୋଦନ କରିଛି। କୋଭିଡ୍-୧୯ ମହାମାରୀ ମୁକାବିଲା କରିବାକୁ ରାଜ୍ୟ ସରକାର ଅର୍ଥମନ୍ତ୍ରୀଙ୍କ ଅଧ୍ୟକ୍ଷତାରେ ଏକ ଉଚ୍ଚ କ୍ଷମତାସମ୍ପନ୍ନ କମିଟି ଗଠନ କରିଛନ୍ତି। ଏହି କମିଟି ଇତି ମଧ୍ୟରେ ୧୦ ଥର ବସିଛି। ଉକ୍ତ କମିଟି ଏବଂ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଦ୍ୱାରା ନିଆଯାଇଥିବା ନିଷ୍ପତ୍ତିକୁ କ୍ୟାବିନେଟ୍ ଅନୁମୋଦନ କରିଛି।
ଓଡ଼ିଶା ଯୋଜନା ସେବା ବର୍ଗ ଅନ୍ତର୍ଭୁକ୍ତ ଅଫିସରମାନଙ୍କୁ ପଦୋନ୍ନତି ଦେବା ସକାଶେ ରାଜ୍ୟ ସରକାର ଓଡ଼ିଶା ଯୋଜନା ସେବା( ନିଯୁକ୍ତି ଓ ଚାକିରି ସର୍ତ୍ତାବଳୀ) ନିୟମ ୧୯୯୬ର ସଂଶୋଧନ କରିଛନ୍ତି। ଏହାଦ୍ୱାରା ଅଧିକାରୀମାନଙ୍କର କାର୍ଯ୍ୟଦକ୍ଷତା ବୃଦ୍ଧି ହେବା ସହ ଉତ୍ତମ ସେବା ପ୍ରଦାନ ଦିଗରେ ପ୍ରେରଣା ଦେବ। ଏହି ପ୍ରସ୍ତାବକୁ ବୈଠକରେ ଅନୁମୋଦନ କରାଯାଇଛି।
ସେହିପରି ରାଜ୍ୟ ସରକାର ଓଡ଼ିଶା ଡାକ୍ତରୀ ଓ ସ୍ବାସ୍ଥ୍ୟ ସେବା(ଚୟନ ପ୍ରବଧି ଓ ସେବା ସର୍ତ୍ତ) ସଂଶୋଧିତ ନିୟମାବଳୀ-୨୦୨୦ କାର୍ଯ୍ୟକାରୀ କରିଛନ୍ତି। ସ୍ବାସ୍ଥ୍ୟ ବିଭାଗର ଏହି ପ୍ରସ୍ତାବକୁ କ୍ୟାବିନେଟ୍ ଅନୁମୋଦନ କରିଛି। ଯଦି ଜଣେ ପ୍ରାର୍ଥୀ ମାଧ୍ୟମିକ ବିଦ୍ୟାଳୟ ପରୀକ୍ଷାରେ ଓଡ଼ିଆ ବିଷୟରେ ଉତ୍ତୀର୍ଣ୍ଣ ହୋଇ ନ ଥିବେ, ତାଙ୍କୁ ଚାକିରିରେ ଯୋଗଦେବାର ୪ ବର୍ଷ ମଧ୍ୟରେ ମାଧ୍ୟମିକ ଶିକ୍ଷା ପରିଷଦ ଦ୍ୱାରା ପରିଚାଳିତ ଏହି ପରୀକ୍ଷାରେ ତାଙ୍କୁ ଉତ୍ତୀର୍ଣ୍ଣ ହେବାକୁ ପଡିବ। ଯଦି ଜଣେ ବାହାର ରାଜ୍ୟର ପ୍ରାର୍ଥୀ ତାଙ୍କ ନାମ ଓଡ଼ିଶା ଡାକ୍ତରୀ ପରିଷଦରେ ନାମ ପଞ୍ଜୀକରଣ କରି ନ ଥିବେ, ତେବେ ସେ ଚାକିରିରେ ଯୋଗ ଦେବା ପାଇଁ ନିଯୁକ୍ତି ନିର୍ଦ୍ଦେଶନାମା ପାଇବା ପୂର୍ବରୁ ଉକ୍ତ ପରିଷଦରେ ପଞ୍ଜୀକୃତ କରିବାକୁ ହେବ।
ଗତ ମୌସୁମୀ ଅଧିବେଶନର ସତ୍ରାବସାନ ଏବଂ ଆସନ୍ତା ୨୦ ତାରିଖରେ ଆରମ୍ଭ ହେବାକୁ ଯାଉଥିବା ଶୀତ ଅଧିବେଶନକୁ କ୍ୟାବିନେଟ୍ ମଞ୍ଜୁରୀ ମିଳିଛି।