ବିଜେପୁର,୧୦।୪(ଡି.ଏନ୍.ଏ.): କରୋନା ସଂକ୍ରମଣ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏହାକୁ ଦୁଷ୍ଟିରେ ରଖି ରାଜ୍ୟ ସରକାର ଲକ୍ଡାଉନ କଟକଣାକୁ ୩୦ଯାଏ ବଢ଼ାଇ ଦେଇଛନ୍ତି। ସାମାଜିକ ଦୂରତ୍ୱ ଓ ମୁହଁରେ ମାକ୍ସ ଲଗାଇବାକୁ ସଚେତନତା ସୃଷ୍ଟି କରାଯାଉଛି। ହେଲେ ବରଗଡ଼ ଜିଲା ବିଜେପୁର ଏନ୍ଏସି ସଦର ମହକୁମାସ୍ଥିତ ଡେଲି ମାର୍କେଟରେ ଅମାନିଆ ଏହାକୁ ମାନୁ ନ ଥିବା ଦେଖିବାକୁ ମିଳୁଛି। ସାମାଜିକ ଦୂରତ୍ୱ ରକ୍ଷା ପାଇଁ ପ୍ରଶାସନପକ୍ଷରୁ ସ୍ଥାନୀୟ ହାଇସ୍କୁଲ ପଡ଼ିଆକୁ ଡେଲି ମାର୍କେଟକୁ ସ୍ଥାନାନ୍ତର କରାଯାଇଛି। ଏନ୍ଏସି ପକ୍ଷରୁ ନିର୍ଦ୍ଧାରିତ ଭାବେ ବେପାରୀମାନଙ୍କ ପାଇଁ ସ୍ଥାନ ଯୋଗାଇ ଦିଆଯାଇଛି। ଶୁକ୍ରବାର ସକାଳୁ ତହସିଲଦାର କୁଳମଣି ରଣବିଡା, ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ରୁକ୍ମଣ ମେହେର, ପୋଲିସ କର୍ମଚାରୀଙ୍କ ସହ ଡେଲି ମାର୍କେଟ ପରିଦର୍ଶନ କରିଥିଲେ। ପୋଲିସ କର୍ମଚାରୀ ରହଥିବା ଯାଏ ଡେଲି ମାର୍କେଟରେ ସାମାଜିକ ଦୂରତ୍ୱ ରକ୍ଷା ହେଉଥିଲା। ମାତ୍ର ପୋଲିସ କର୍ମଚାରୀ ଯିବାପରେ ସାମାଜିକ ଦୂରତ୍ୱକୁ ଅମାନିଆମାନେ ଆଉ ମାନି ନ ଥିଲେ। ବିଭିନ୍ନ ବେପାରୀଙ୍କୁ ଘେରିଯାଇ ପରିବା କିଣୁଥିବା ଦେଖିବାକୁ ମିଳିଛି। ଅପରପକ୍ଷେ କେତେକ ଆମାନିଆ ମୁହଁରେ ମାସ୍କ ଲଗାଇ ନ ଥିବା ପରିଲକ୍ଷିତ ହୋଇଛି। ତେବେ ଏହି ଡେଲି ମାର୍କେଟ ସପ୍ତାହକୁ ତିନିଦିନ ବସୁଥିବାବେଳେ ଉକ୍ତ ସମୟରେ ପୋଲିସ ପ୍ରଶାସନ ଉପସ୍ଥିତ ରହି ଅମାନିଆଙ୍କ ଉପରେ ନଜର ରଖିବାକୁ ସାଧାରଣରେ ଦାବି ହେଉଛି। ଏ ନେଇ ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ରୁକ୍ମଣ ମେହେର କୁହନ୍ତି, ଏ ଦିଗରେ ପଦକ୍ଷେପ ନିଆଯିବ। ଲୋକଙ୍କୁ ମାସ୍କ ଲଗାଇବାକୁ ସଚେତନତା ସୁଷ୍ଟି କରାଯାଉଛି। ଶନିବାରଠାରୁ ସର୍ବସାଧାରଣ ସ୍ଥାନରେ ଯିଏ ମାକ୍ସ ନ ଲଗାଇବ ତାଙ୍କୁ ଦୁଇ ଶହ ଟଙ୍କା ଜୋରିମାନା କରାଯିବ ବୋଲି ସେ କହିଛନ୍ତି।
