ଅନୁଗୋଳ ଅଫିସ,୭ା୧୦: ଅନୁଗୋଳ ବନଖଣ୍ଡ ବନ୍ତଳା ରେଞ୍ଜକୁ ପଶି ଆସିଥିବା ଛତିଶଗଡ଼ର ୨୨ ହାତୀ ୨ ଦିନ ହେବ ବ୍ୟାପକ କ୍ଷୟକ୍ଷତି ଘଟାଉଛନ୍ତି। ଏହି ପଲରେ ଥିବା ୫ ଦନ୍ତା, ୧୨ ମାଈ ଓ ୫ ଛୁଆ ହାତୀ ଇଂକରବନ୍ଧ, ବସଲା, ନୂଆସାହି, ବଲାସିଂହା, ପଣ୍ଡପୁର ଆଦି ଅଞ୍ଚଳରେ ବୁଲି ଫସଲ ଖାଇବା ସହ ଦଳିଚକଟି ନଷ୍ଟ କରିଦେଉଛନ୍ତି। ଫଳରେ ୨ଶହରୁ ଅଧିକ ଚାଷୀ କ୍ଷତିଗ୍ରସ୍ତ ହୋଇଥିବା ଅଭିଯୋଗ ହୋଇଛି। ତୁରନ୍ତ ହାତୀ ପଲଙ୍କୁ ଘଉଡ଼ାଇବା ସହ କ୍ଷତିପୂରଣ ଯୋଗାଇ ଦେବାକୁ ଚାଷୀମାନେ ଦାବି କରିଛନ୍ତି।
ଚାଷୀମାନଙ୍କ କହିବା ଅନୁଯାୟୀ, ଏହି ହାତୀ ପଲ ବୁଧବାର ଇଂକରବନ୍ଧ ଠାକୁରାଣୀ ପିଢ଼ ନିକଟରେ ଥିଲେ। ରାତି ପ୍ରାୟ ୧୨ଟାରେ ବଲାସିଂହା, ପଣ୍ଡପୁର ଦେଇ ଆଗକୁ ବଢ଼ିଥିଲେ। ଭୋର ସମୟରେ ନୂଆସାହି ବସଲା ପାଖରେ ଏହି ହାତୀପଲଙ୍କୁ ଦେଖି ଲୋକେ ଆତଙ୍କିତ ହୋଇପଡ଼ିଥିଲେ। ଗଁା ନିକଟରେ ହାତୀ ଚଳପ୍ରଚଳ ହେଉଥିବାରୁ ସେମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ଲାଇନ୍ କାଟି ଦିଆଯାଇଥିଲା। ଫଳରେ ବୁଧବାର ରାତିରୁ ଗୁରୁବାର ପୂର୍ବାହ୍ନ ୧୦ଟା ପର୍ଯ୍ୟନ୍ତ ବଲାସିଂହାବାସୀ ବିଦ୍ୟୁତ୍ ସେବାରୁ ବଞ୍ଚିତ ରହିଥିଲେ। ଏହି ହାତୀପଲ ଯେପରି ହିନ୍ଦୋଳ ରେଞ୍ଜକୁ ପଶି ନ ପାରନ୍ତି ସେଥିପାଇଁ ଉକ୍ତ ରେଞ୍ଜ କର୍ମଚାରୀମାନେ ବାଣ ଫୁଟାଉଛନ୍ତି। ଫଳରେ ହାତୀ ପଲଙ୍କୁ ଘଉଡ଼ାଇବାରେ ବନ୍ତଳା ରେଞ୍ଜ କର୍ମଚାରୀଙ୍କୁ ସଫଳତା ମିଳିପାରୁ ନାହିଁ। ଏ ସମ୍ପର୍କରେ ବନ୍ତଳା ରେଞ୍ଜ ଅଧିକାରୀ ମାଧବ ନାୟକ କହିଛନ୍ତି, ଏହି ଛତିଶଗଡ଼ ହାତୀପଲଙ୍କୁ ଘଉଡ଼ାଇବାକୁ ଉଦ୍ୟମ ଚାଲିଛି। କିନ୍ତୁ ସେମାନେ ଜଙ୍ଗଲ ମୁହଁା ହେଉନାହାନ୍ତି। ଗଁାରେ ଥିବା ବାଡ଼ି ବଗିଚା ଓ ଚାଷ ଜମିରେ ପଶି ଏମାନେ ଫସଲ ଖାଉଥିବାରୁ ଜଙ୍ଗଲକୁ ନ ଯାଇ ଗଁା ଆଖପାଖରେ ରହୁଛନ୍ତି। ତେବେ ଅନୁଧ୍ୟାନ ଶେଷ ପରେ କ୍ଷତିପୂରଣ ଯୋଗାଇ ଦିଆଯିବ।