ବ୍ରହ୍ମପୁର ଅଫିସ,୨୫ା୫: ସହରର ଉଠା ପରିବା ବ୍ୟବସାୟୀଙ୍କୁ ଥଇଥାନ ନିମନ୍ତେ ବ୍ରହ୍ମପୁର ମହାନଗର ନିଗମ (ବିଇଏମ୍ସି) ପକ୍ଷରୁ ଭେଣ୍ଡିଂ ଜୋନ୍ ନିର୍ମାଣ କରାଯାଇଛି। ସେଥିମଧ୍ୟରେ ମର୍ଦ୍ଦରାଜ ଭେଣ୍ଡିଂ ଜୋନ, କର୍ପୋରେଶନ ରୋଡ ଭେଣ୍ଡିଂଜୋନ୍, ଗେଟ ବଜାର ଭେଣ୍ଡିଂ ଜୋନ୍ ଓ ଖୋଲା ଭେଣ୍ଡିଂ ଜୋନ ରହିଛି। ଏସବୁରେ ବ୍ୟବସାୟୀଙ୍କ ବ୍ୟବସାୟ ନିମନ୍ତେ ପିଣ୍ଡି କରାଯାଇଥିବା ବେଳେ ଆଲୋକୀକରଣର ବ୍ୟବସ୍ଥା ମଧ୍ୟ କରାଯାଇଛି। କିନ୍ତୁ କେତେକ ଭେଣ୍ଡିଂ ଜୋନ୍ରେ ବିଇଏମସିର ରକ୍ଷଣାବେକ୍ଷଣ ଅଭାବରୁ ବର୍ତ୍ତମାନ ସେଠାରେ ଅଳିଆ ଆବର୍ଜନା ପରିପୂର୍ଣ୍ଣ ହୋଇଛି। ଗେଟ ବଜାର ମୁକ୍ତେଶ୍ୱର ମନ୍ଦିର ସମ୍ମୁଖରେ ଥିବା ଖୋଲା ଭେଣ୍ଡିଂ ଜୋନ୍ ଏହାର ଜ୍ୱଳନ୍ତ ଉଦାହରଣ।
୨୨ଲକ୍ଷ ଟଙ୍କା ବ୍ୟୟରେ ଖୋଲା ଭେଣ୍ଡିଂ ଜୋନ୍ ନିର୍ମାଣ ହୋଇଥିବା ବେଳେ ୨୦୧୯ରେ ଏହାର ଉଦଘାଟନ କରାଯାଇଥିଲା। ଗେଟବଜାର ରାସ୍ତା ପାର୍ଶ୍ୱରେ ବସୁଥିବା ପରିବା ବ୍ୟବସାୟୀଙ୍କୁ ଥଇଥାନ ଉଦ୍ଦେଶ୍ୟରେ ଏହା ନିର୍ମାଣ କରାଯାଇଥିଲା। କିନ୍ତୁ ଉଦଘାଟନ ପରେ ଗୋଟିଏ ଦିନ ବି ବ୍ୟବସାୟୀମାନେ ଏଠାରେ ବ୍ୟବସାୟ କରିନାହାନ୍ତି। ସେଠାକୁ ଗ୍ରାହକ ଆସୁ ନ ଥିବାରୁ ବ୍ୟବସାୟୀମାନେ ପୁଣି ଥରେ ରାସ୍ତା ପାର୍ଶ୍ୱରେ ବସି ବ୍ୟବସାୟ ଆରମ୍ଭ କଲେ। ବିଇଏମସି ଏନଫୋର୍ସମେଣ୍ଟ୍ ପକ୍ଷରୁ ରାସ୍ତା ପାର୍ଶ୍ୱ ବ୍ୟବସାୟୀଙ୍କୁ ଉଚ୍ଛେଦ କରାଯିବାରୁ କିଛି ଦିନ ଭେଣ୍ଡିଂ ଜୋନ୍ରେ ବସିଲେ। ତେବେ ଉକ୍ତ ଭେଣ୍ଡିଂ ଜୋନ ପାର୍ଶ୍ୱରେ ବିଇଏମସିର ଭୂତଳ ଡମ୍ପିଂ ୟାର୍ଡ ଥିବା କାରଣରୁ ପୂତିଗନ୍ଧମୟ ପରିବେଶ ଯୋଗୁ ସହରବାସୀ ସେଠାକୁ ଯିବା ପାଇଁ ଅନିଚ୍ଛା ପ୍ରକାଶ କଲେ। ଅନ୍ୟପକ୍ଷରେ ବିଇଏମସି ପକ୍ଷରୁ ପରିଷ୍କାର ପରିଚ୍ଛନତା ନେଇ କାୈଣସି ଦୃଷ୍ଟି ନ ଦେବା କାରଣରୁ ବ୍ୟବାସାୟୀମାନେ ମଧ୍ୟ ଭେଣ୍ଡିଂ ଜୋନରେ ବ୍ୟବସାୟ ବନ୍ଦ କରିଦେଲେ। ବ୍ୟବସାୟୀମାନେ କାୈଣସି ଉପାୟ ନ ପାଇ ବର୍ତ୍ତମାନ ଭେଣ୍ଡିଂ ଜୋନ ବାହାରେ ବ୍ୟବସାୟ କରୁଛନ୍ତି। ବର୍ତ୍ତମାନ ଏହି ଲକ୍ଷାଧିକ ଟଙ୍କାର ଭେଣ୍ଡିଂ ଜୋନ ଆବର୍ଜନାରେ ପରିପୂର୍ଣ୍ଣ ହୋଇଛି। ଏପରିକି ନିକଟସ୍ଥ ଡମ୍ପିଂ ୟାର୍ଡ ଆବର୍ଜନା ମଧ୍ୟ ଏହି ଭେଣ୍ଡିଂ ଜୋନ୍ରେ ଜମା ହୋଇ ରହୁଥିବା ଦେଖିବାକୁ ମିଳିଛି। ଭେଣ୍ଡିଂ ଜୋନ ଉପରେ ରହିଥିବା ଜରି ଛପର ମଧ୍ୟ ଉଡିଯାଇଛି। ଅଳିଆ ଆବର୍ଜନା ପଡି ରହିଥିବା କାରଣରୁ ଗାଇ ଗୋରୁଙ୍କ ଏହା ଏବେ ବିଚରଣ ସ୍ଥାନ ପାଲଟିଛି। କେବଳ ସେତିକି ନୁହେଁ, ଆବର୍ଜନା କାରଣରୁ ନିକଟସ୍ଥ ପୋଖରୀ ଦୂଷିତ ହେଉଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି। ସ୍ଥାନୀୟ ବ୍ୟବସାୟୀଙ୍କଠାରୁ ଆରମ୍ଭ କରି ବାସିନ୍ଦାମାନେ ଭେଣ୍ଡିଂ ଜୋନ ସଫେଇ ପାଇଁ ଦାବି କରିଥିଲେ ସୁଦ୍ଧା ଏ ଯାବତ ବିିଇଏମସି ପକ୍ଷରୁ କାୈଣସି ପଦକ୍ଷେପ ଗ୍ରହଣ କରାଯାଉ ନ ଥିବା ଅଭିଯୋଗ ହୋଇଛି। ଏ ନେଇ ବିଇଏମସି ଡେପୁଟି କମିଶନର ଆର୍ଶୀବାଦ ପରିଡାଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ଏ ବାବଦରେ ଅନୁଧ୍ୟାନ କରି ଖୁବଶୀଘ୍ର ପଦକ୍ଷେପ ଗ୍ରହଣ କରାଯିବ ।