ନୂଆଦିଲ୍ଲୀ : ଚଳିତ ବର୍ଷ ମାର୍ଚ୍ଚରୁ ଜୁଲାଇ ସମୟ ମଧ୍ୟରେ ଓଡ଼ିଶାରେ ସାମଗ୍ରୀ ଓ ସେବା ଟିକସ (ଜିଏସ୍ଟି) ସଂଗ୍ରହ ୨୨.୬% କମିଛି। ଏହି ଅବଧିରେ ଏଠାରେ ୨୯୬୬ କୋଟି ଟଙ୍କା ଜିଏସ୍ଟି ଆଦାୟ ହୋଇଛି। ଦେଶର ବଡ ରାଜ୍ୟଗୁଡିକରେ ଜିଏସ୍ଟି ସଂଗ୍ରହ ପ୍ରାୟ ୨୦% ଉର୍ଦ୍ଧ୍ୱ କମିଥିବା ଲୋକସଭାରେ ସରକାର ଦେଇଥିବା ଡାଟାରୁ ସାମ୍ନାକୁ ଆସିଛି। ତାମିଲନାଡୁ,ଗୁଜରାଟ ଏବଂ ମହାରାଷ୍ଟ୍ର ଭଳି ଶିଳ୍ପ ଉନ୍ନତ ରାଜ୍ୟଗୁଡିକ ତୁଳନାରେ ଓଡ଼ିଶା, ବିହାର, ମଧ୍ୟପ୍ରଦେଶ, ଆସାମ ଭଳି ରାଜ୍ୟରେ ଜିଏସ୍ଟି ସଂଗ୍ରହ ଉପରେ ବେଶି ପ୍ରଭାବ ପଡିନାହିଁ। ତାମିଲନାଡୁରେ ଜିଏସ୍ଟି ଆଦାୟ ୩୪% କମିଥିବା ବେଳେ ଗୁଜରାଟରେ ୩୦% ଏବଂ ମହାରାଷ୍ଟ୍ରରେ ୨୮.୫% ଖସିଛି। କେବଳ ଛତିଶଗଡରେ ଜିଏସ୍ଟି ହ୍ରାସ ୧୭% ରହିଛି। ଅରୁଣାଚଳ ପ୍ରଦେଶ, ଲାକ୍ଷାଦୀପ, ଆଣ୍ଡାମାନ ନିକୋବର ଏବଂ ସିକିମରେ ଗତ ବର୍ଷ ଏହି ସମୟ ତୁଳନାରେ ଚଳିତ ବର୍ଷ ଟିକସ ସଂଗ୍ରହ ଅପେକ୍ଷାକୃତ ଉନ୍ନତ ରହିଛି। ଚଳିତ ଆର୍ଥତ୍କ ବର୍ଷ ଏପ୍ରିଲ-ଅଗଷ୍ଟ ସମୟ ଅବଧିରେ ଦେଶ ମଧ୍ୟରେ ନେଟ୍ ପ୍ରତ୍ୟକ୍ଷ ଟିକସ ସଂଗ୍ରହ ୩୧.୧% କମିଛି। ସେହିଭଳି ପରୋକ୍ଷ ଟିକସ ସଂଗ୍ରହ ୧୧.୨% ହ୍ରାସ ହୋଇଛି। ଉତ୍ତରାଖଣ୍ଡରେ ଜିଏସ୍ଟି ସଂଗ୍ରହ ସବୁଠାରୁ ବେଶି ପ୍ରଭାବିତ ହୋଇଛି। ଏଠାରେ ଆଦାୟ -୪୨.୨% ରହିଛି। ସେହିଭଳି ଗୋଆରେ ୪୦% ପରୋକ୍ଷ ଟିକସ କମିଛି। ମୋଟ ୩୬ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳ ମଧ୍ୟରୁ ୩୪ଟି ରାଜସ୍ବ କ୍ଷତି ସହିଛନ୍ତି।
