ଭବାନୀପାଟଣା/କୋକସରା,୨୩।୯: କଳାହାଣ୍ଡି ଜିଲା କୋକସରା ବ୍ଲକ ଲଡୁଗାଁ ଗ୍ରାମର ସୁନିଲ ଗର୍ଗ (୪୭)ଙ୍କୁ ତାଙ୍କର ୨୨ ବର୍ଷର ଝିଅ ସଲୋନୀ କିଡ୍ନୀ ଦାନ କରି ନୂଆ ଜୀବନ ଦେଇଛନ୍ତି।
ସୁନିଲ ଗତ କିଛି ବର୍ଷ ହେଲା କିଡ୍ନୀ ରୋଗରେ ଆକ୍ରାନ୍ତ ହୋଇଥିଲେ। କିଛିମାସ ତଳେ ତାଙ୍କର ଉଭୟ କିଡନୀ ଖରାପ ହୋଇଯାଇଥିବା ଡାକ୍ତରୀ ରିପୋର୍ଟରୁ ଜଣାପଡିଥିଲା। ଏନେଇ ସେ ମାନସିକ ସ୍ତରରେ ଭାଙ୍ଗି ପଡ଼ିଥିଲେ । ଏପରିକି ତୁରନ୍ତ କିଡ୍ନୀ ପ୍ରତ୍ୟାରୋପଣ କରିବା ପାଇଁ ଚିକିତ୍ସା କରୁଥିବା ଡାକ୍ତର ତାଙ୍କୁ ପରାମର୍ଶ ଦେଇଥିଲେ । କିଏ କିଡ୍ନୀ ଦାନ କରିବ ସେନେଇ ପରିବାର ଲୋକେ ଚିନ୍ତାରେ ପଡିଥିଲେ। ହେଲେ ସୁନିଲଙ୍କ ୨୨ ବର୍ଷୀୟ ଝିଅ ସଲୋନୀ ବାପାଙ୍କୁ କିଡ୍ନୀ ଦାନ କରିବାକୁ ଆଗେଇ ଆସିଥିଲେ। ହେଲେ ବାପା ଓ ପରିବାର ଲୋକେ ତାଙ୍କୁ ମନା କରିଥିଲେ। ବାପାଙ୍କୁ କଡ୍ନୀ ଦାନ କରିବାକୁ ସଲୋନୀ ଅଡ଼ି ବସିଲେ। ଝିଅର ଜିଦ୍ ଆଗରେ ଶେଷରେ ପରିବାର ଲୋକଙ୍କୁ ହାର ମାନିବାକୁ ପଡିଥିଲା।
ଦିଲ୍ଲୀର ମେଦାନ୍ତ ହସ୍ପିଟାଲରେ ଗତ ୮ ତାରିଖରେ କିଡ୍ନୀ ପ୍ରତ୍ୟାରୋପଣ ପାଇଁ ଭର୍ତ୍ତି ହୋଇଥିଲେ ସୁନିଲ। ହସ୍ପିଟାଲର ଏକ ଡାକ୍ତରୀ ଟିମ୍ ସମସ୍ତ ପରୀକ୍ଷା କରିବା ପରେ ସଫଳତାର ସହ କିଡ୍ନୀ ପ୍ରତ୍ୟାରୋପଣ କରିଥିଲେ। ଅସ୍ତ୍ରୋପଚାର ପରେ ବର୍ତ୍ତମାନ ସୁନିଲ ଓ ସଲୋନୀ ସୁସ୍ଥ ଅଛନ୍ତି । ସଲୋନୀ ବାପାଙ୍କୁ ନିଜ ଅଙ୍ଗ ଦାନ କରି ଝିଅର କର୍ତ୍ତବ୍ୟ କରିବା ସହ ଆତ୍ମତୃପ୍ତି ପାଇଥିବା କହିଛନ୍ତି । ଏମିତି ଝିଅ ଭାଗ୍ୟରେ ଥିଲେ ମିଳେ ବୋଲି ପରିବାର ଓ ବନ୍ଧୁବାନ୍ଧବ କହିବା ସହ ସଲୋନୀଙ୍କୁ ପ୍ରଶଂସା କରିଛନ୍ତି । ଏହି ଖବର ପ୍ରଚାରିତ ହେବା ବିଭିନ୍ନ ମହଲରେ ସଲୋନୀଙ୍କୁ ଶୁଭେଚ୍ଛା ଜଣାଇବା ସହ ପ୍ରଶଂସା କରିଛନ୍ତି। ସୁନିଲ ଓ ସନୋଲୀ ହସ୍ପିଟାଲରେ ଅଛନ୍ତି। ସମ୍ପୂର୍ଣ୍ଣ ସୁସ୍ଥ ପରେ ଘରକୁ ଫେରିବେ ବୋଲି ପରିବାର ଲୋକେ କହିଛନ୍ତି।