ଭୁବନେଶ୍ୱର,୧୧ା୩(ବ୍ୟୁରୋ): ୨୦୨୨-୨୩ ଆର୍ଥିକ ବର୍ଷ ପାଇଁ କେନ୍ଦ୍ର ସରକାର ଜଳ ଜୀବନ ମିଶନ (ଜେଜେଏମ୍) ଓ ସ୍ବଚ୍ଛ ଭାରତ ମିଶନ( ଏସ୍ବିଏମ୍)ରେ ଓଡ଼ିଶାକୁ ୨୨୪୯ କୋଟି ଟଙ୍କା ଅନୁମୋଦନ କରିଛନ୍ତି । ସେଥିରୁ ୨୦୩୬ କୋଟି ଜଳ ଜୀବନ ମିଶନ ପାଇଁ ଅନୁମୋଦନ କରାଯାଇଥିବା ବେଳେ ୨୧୩.୭୧ କୋଟି ଟଙ୍କା ସ୍ବଚ୍ଛ ଭାରତ ମିଶନ ପାଇଁ ଅନୁମୋଦନ କରାଯାଇଛି। କେନ୍ଦ୍ର ଜଳଶକ୍ତି ମିଶନ ମନ୍ତ୍ରୀ ଗଜେନ୍ଦ୍ର ସିଂ ଶେଖାଓ୍ବତ ଓଡ଼ିଶା ସମେତ ୬ଟି ରାଜ୍ୟରେ ଜଳ ଜୀବନ ମିଶନ ଓ ସ୍ବଚ୍ଛ ଭାରତ ମିଶନ ଅଧୀନରେ ହେଉଥିବା ବିଭିନ୍ନ କାର୍ଯ୍ୟକ୍ରମର ସମୀକ୍ଷା କରିଥିଲେ। ବୈଠକରୁ ମିଳିଥିବା ସୂଚନା ମୁତାବକ ଓଡ଼ିଶାରେ ୮୮. ୩୩ ଲକ୍ଷ ପରିବାର ରହିଛନ୍ତି। ସେଥିରୁ ୪୪ ପ୍ରତିଶତ ଅର୍ଥାତ୍ ୩୮.୬୨ ଲକ୍ଷ ପରିବାରକୁ ପାଇପ ଯୋଗେ ପାନୀୟ ଜଳ ଯୋଗାଇ ଦିଆଯାଇଛି। ୨୦୧୯ରେ ଯେତେବେଳ ଜଳଜୀବନ ମିଶନ ଆରମ୍ଭ ହୋଇଥିଲା ସେତେବେଳେ ଓଡ଼ିଶାରେ ମାତ୍ର ୪ ପ୍ରତିଶତ ପରିବାରକୁ ପାନୀୟ ଜଳ ଯୋଗାଇ ଦିଆଯାଉଥିଲା। ଏହି ମିଶନ ଆରମ୍ଭରୁ ଏ ପର୍ଯ୍ୟନ୍ତ ୩୫.୫୧ ଲକ୍ଷ ପରିବାରକୁ ପାନୀୟ ଜଳ ଯୋଗାଇ ଦିଆଯାଇ ପାରିଛି ବୋଲି କେନ୍ଦ୍ରମନ୍ତ୍ରୀ କହିଛନ୍ତି। ଗ୍ରାମାଞ୍ଚଳ ଲୋକଙ୍କୁ ପାଇପ ଯୋଗେ ବିଶୁଦ୍ଧ ପାନୀୟ ଜଳ ଯୋଗାଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨୦୧୯ ଅଗଷ୍ଟ ୧୫ ତାରିଖରେ ଜଳ ଜୀବନ ମିଶନ ଆରମ୍ଭ କରିଥିଲେ। ଗତ ଅଢେଇ ବର୍ଷ ହେବ କୋଭିଡ୍ କଟକଣା ଯୋଗୁ ଲକ୍ଡାଉନ ଓ ଶଟ୍ଡାଉନ ସତ୍ତ୍ୱେ ୫.୯୧ କୋଟି ଟ୍ୟାପ ଓ୍ବାଟର ସଂଯୋଗ ଜରିଆରେ ଗ୍ରାମାଞ୍ଚଳରେ ୪୭.୩୯ ପ୍ରତିଶତ ପରିବାରକୁ ବିଶୁଦ୍ଧ ପାନୀୟ ଜଳ ଯୋଗାଇ ଦିଆଯାଇଛି ବୋଲି କେନ୍ଦ୍ରମନ୍ତ୍ରୀ ସିଂ କହିଛନ୍ତି।
