ନୂଆଦିଲ୍ଲୀ,୯।୪: ଗତ ୮ ବର୍ଷ ମଧ୍ୟରେ ଦେଶର ଲକ୍ଷାଧିକ କ୍ଷୁଦ୍ର ଓ ମଧ୍ୟମ ବର୍ଗର ଉଦ୍ୟୋଗୀମାନେ ଉନ୍ନତି କରିଥିବା ବେଳେ ଦେଶର ଅର୍ଥନୀତିରେ ମଧ୍ୟ ପ୍ରମୁଖ ଯୋଗଦାନ ହାସଲ କରିଥିବା ଅର୍ଥମନ୍ତ୍ରୀ ନିର୍ମଳା ସୀତାରାମନ ମତପ୍ରକାଶ କରିଛନ୍ତି। ବିଶେଷକରି ଉକ୍ତ ଯୋଜନାର ୮ମ ବାର୍ଷିକ ପୂର୍ତ୍ତି ଉତ୍ସବ ଉପଲକ୍ଷେ ଶନିବାର ଅର୍ଥ ମନ୍ତ୍ରଣାଳୟ ପକ୍ଷରୁ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ଯୋଗଦେଇ ଅର୍ଥମନ୍ତ୍ରୀ କହିଥିଲେ, ୨୦୨୩ ମାର୍ଚ୍ଚ ୨୪ ମଧ୍ୟରେ ଦେଶର ବ୍ୟାଙ୍କିଙ୍ଗ୍ ଓ ଫାଇନାନ୍ସିଆଲ ସଂସ୍ଥା ଦ୍ୱାରା ପ୍ରାୟ ୪୧ ଲକ୍ଷ ହିତାଧିକାରୀଙ୍କୁ ୨୩ ଲକ୍ଷ କୋଟି ଟଙ୍କାରୁ ଅଧିକ ପରିମାଣର ଆର୍ଥିକ ସହାୟତା ଯୋଗାଇ ଦିଆଯାଇଛି । ଅପରପକ୍ଷରେ ପ୍ରଧାନମନ୍ତ୍ରୀ ମୁଦ୍ରା ଯୋଜନା(ପିଏମ୍ଏମ୍ଓ୍ବାଇ)ରେ ୨୩.୨ ଲକ୍ଷ କୋଟିରୁ ଅଧିକ ଟଙ୍କାର ଦେଶର ୪୦.୮୨ ଲକ୍ଷ ହିତାଧିକାରୀଙ୍କୁ ବିଭିନ୍ନ ଆର୍ଥିକ ସଂସ୍ଥା ଦ୍ୱାରା ଋଣ ମଞ୍ଜୁର କରାଯାଇଛି ବୋଲି ଅର୍ଥ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ସେହିଭଳି ଦେଶରେ ରୋଜଗାର ସୃଷ୍ଟି କରୁଥିବା କାର୍ଯ୍ୟକଳାପ ପାଇଁ ମାଇକ୍ରୋ ଉଦ୍ୟୋଗୀମାନଙ୍କୁ ୧୦ଲକ୍ଷ ଟଙ୍କା ପର୍ଯ୍ୟନ୍ତ ସହଜ ବନ୍ଧକମୁକ୍ତ ଋଣକୁ ସହଜ କରିବାକୁ ପିଏମ୍ଏମ୍ଓ୍ବାଇ ଲକ୍ଷ୍ୟ ରଖିଛି। ଏହି ଯୋଜନା ଅଧୀନରେ ଅର୍ଥର ଆବଶ୍ୟକତା ଏବଂ ବ୍ୟବସାୟର ପରିପକ୍ୱତା ଉପରେ ଆଧାରକରି ଋଣକୁ ତିନୋଟି ଶ୍ରେଣୀରେ ବିଭକ୍ତ କରାଯାଇଛି। ସେଗୁଡ଼ିକ ହେଉଛି ଶିଶୁ (୫୦,୦୦୦ ଟଙ୍କା ପର୍ଯ୍ୟନ୍ତ ଋଣ), କିଶୋର (୫୦,୦୦୦ ରୁ ଅଧିକ ଏବଂ ୫ ଲକ୍ଷ ଟଙ୍କା ପର୍ଯ୍ୟନ୍ତ ଋଣ) ଏବଂ ତରୁଣ (୫ ଲକ୍ଷରୁ ଅଧିକ ଏବଂ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଋଣ) ଅନ୍ତର୍ଭୁକ୍ତ ରହିଛି। ସେହିପରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, ପ୍ରତ୍ୟେକ ଭାରତୀୟଙ୍କ ପାଇଁ ସମୃଦ୍ଧ ତଥା ସମ୍ମାନର ଜୀବନ ସୁନିଶ୍ଚିତ କରିବାରେ ପିଏମ୍ଏମ୍ଓ୍ବାଇ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ଏପରିକି ଆଜି ଯେତେବେଳେ ଆମେ ପିଏମ୍ଏମ୍ଓ୍ବାଇ ମୁଦ୍ରା ଯୋଜନାର ୮ ବର୍ଷ ପାଳନ କରୁଛୁ, ସେତେବେଳେ ମୁଁ ଏଥିରୁ ଉପକୃତ ହୋଇଥିବା ସମସ୍ତ ଉଦ୍ୟୋଗୀଙ୍କୁ ସାଧୁବାଦ ଜଣାଉଛି। ବିଶେଷକରି ମୋଟ ଋଣର ପ୍ରାୟ ୬୯ % ମହିଳା ଉଦ୍ୟୋଗୀଙ୍କୁ ଋଣ ମଞ୍ଜୁର କରାଯାଇଛି ଏବଂ ୫୧% ଋଣ ଏସସି, ଏସଟି ଏବଂ ଓବିସି ବର୍ଗର ଋଣଦାତାଙ୍କୁ ଅନୁମତି ଦିଆଯାଇଛି।
ସୂଚନାଯୋଗ୍ୟ, ୨୦୧୫ ଏପ୍ରିଲ ୮ରେ ଆନୁଷ୍ଠାନିକ ଭାବେ ସାରା ଦେଶରେ ପିଏମ୍ଏମ୍ଓ୍ବାଇର ଶୁଭାରମ୍ଭ କରାଯାଇଥିଲା।