ଢାକା,୨୫ା୯: ରବିବାର ବାଂଲାଦେଶର ଏକ ନଦୀରେ ଡଙ୍ଗା ବୁଡ଼ିଯାଇଛି। ଏହି ଦୁର୍ଘଟଣାରେ ଅତି କମ୍ରେ ୨୩ ଜଣଙ୍କର ମୃତ୍ୟୁ ହୋଇଥିବାବେଳେ ୧୨ରୁ ଅଧିକ ଲୋକ ନିଖୋଜ ହୋଇଯାଇଛନ୍ତି। ରବିବାର ଏହି ଘଟଣା ସମ୍ପର୍କରେ ପୋଲିସ ସୂଚନା ଦେଇଛି।
ଏହି ଘଟଣାରେ ମହିଳା ଓ ଶିଶୁ ବି ପ୍ରାଣ ହରାଇଛନ୍ତି। ଘଟଣା ସମ୍ପର୍କରେ ସୂଚନା ଦେଇ ଉତ୍ତର ପଞ୍ଚଗଡ଼ର ଜିଲା ପ୍ରଶାସକ ଜହରୁଲ ଇସ୍ଲାମ କହିଛନ୍ତି, ଦୁର୍ଘଟଣା ଘଟିଥିବା ସ୍ଥାନରୁ ଏପର୍ଯ୍ୟନ୍ତ ଉଦ୍ଧାର ହୋଇଥିବା ମୃତଦେହ ମଧ୍ୟରେ ମହିଳା ଓ ଶିଶୁ ଅଛନ୍ତି। ନିଖୋଜ ଲୋକଙ୍କ ଉଦ୍ଧାର କାର୍ଯ୍ୟ ଚାଲିଥିବା ସେ କହିଛନ୍ତି। ଇସ୍ଲାମ ଆହୁରି ମଧ୍ୟ କହିଛନ୍ତି, ନିଖୋଜ ଲୋକଙ୍କ ପ୍ରକୃତ ସଂଖ୍ୟା ସେ ଜାଣି ନାହାନ୍ତି, କିନ୍ତୁ ଯାତ୍ରୀମାନେ କହିଛନ୍ତି, ଡଙ୍ଗାରେ ୭୦ରୁ ଅଧିକ ଲୋକ ଥିଲେ।
