ଆନନ୍ଦପୁର/କଣ୍ଟିପାଳ,୨୯।୫(ସ୍ବ.ପ୍ର/ଡି.ଏନ୍.ଏ.): ବନ ବିଭାଗ ପକ୍ଷରୁ ବନୀକରଣ କରାଇ ଗ୍ରାମାଞ୍ଚଳରେ ଜଙ୍ଗଲ ସୃଷ୍ଟି କରିବାକୁ ସରକାର ବ୍ୟବସ୍ଥା କରୁଛନ୍ତି। ଏ ନେଇ ବହୁ କୋଟି ଟଙ୍କା ବ୍ୟୟ କରାଯାଉଛି। ମାତ୍ର ବିଭାଗର କିଛି ଦୁର୍ନୀତିଖୋର୍ ଅଧିକାରୀଙ୍କ ମନମାନୀ ଓ ଆନ୍ତରିକତା ଅଭାବରୁ ସରକାରୀ ଅର୍ଥ ଆତ୍ମସାତ୍ ହେଉଛି। ବନୀକରଣ ହେଉଛି, କିନ୍ତୁ ପରବର୍ତ୍ତୀ ସମୟରେ ରକ୍ଷଣାବେକ୍ଷଣ ହେଉ ନ ଥିବାରୁ ଗଛ ମରିଯାଉଛି। ଏଭଳି ଏକ ଅଭିଯୋଗ ଆସିଛି ଆନନ୍ଦପୁର ବନଖଣ୍ଡ ଅଞ୍ଚଳରୁ।
ଅନୁଯାୟୀ, ୨୦୨୨-୨୩ ଆର୍ଥିକ ବର୍ଷରେ ଗ୍ରୀନ ମହାନଦୀ ମିଶନ ସ୍କିମ୍ ଅନୁସାରେ ଆନନ୍ଦପୁର ରେଞ୍ଜ ତଥା ଆନନ୍ଦପୁର ବିଟ୍ ଅନ୍ତର୍ଗତ ହାତୀବନ୍ଧା ସଂରକ୍ଷଣ ଜଙ୍ଗଲର ଗୁହାଳିଆ, ଟୁକୁଣା ଅଞ୍ଚଳର ୧୫ ହେକ୍ଟର ଜମିରେ ବିଭାଗ ପକ୍ଷରୁ ଆମ୍ବ, ଅଁଳା, ଅର୍ଜୁନ, ଆତ, ଅସନ, ବାହାଡ଼ା, ବାଲିଶିଶୁ, ଦେବଦାରୁ, ଗମ୍ଭାରୀ, ଜାମୁ, କାଜୁ, କରଞ୍ଜ, କୃଷ୍ଣଚୂଡ଼ା, ମହାଲିମ୍ବ, ଲିମ୍ବ, ଓସ୍ତ, ପିଜୁଳି, ପଣସ, ପିଆଶାଳ, ଫଣଫଣା, ପାଟୁଳି, ଶାଗୁଆନ ଓ ଶିରିଶା ଭଳି ଚାରାରୋପଣ କରାଯିବାର ବ୍ୟବସ୍ଥା କରାଯାଇଥିଲା। ୧ମ ପର୍ଯ୍ୟାୟରେ ୪ ହଜାର, ୨ୟ ପର୍ଯ୍ୟାୟରେ ୨୦ହଜାର ଚାରାରୋପଣ କରାଯାଇଥିଲା। ମାତ୍ର ଗଛ ଲଗାଇ ବନ ବିଭାଗ ଯତ୍ନ ନେବାକୁ ଭୁଲିଗଲା। ରକ୍ଷଣାବେକ୍ଷଣ ବାବଦକୁ ଅର୍ଥ ଖର୍ଚ୍ଚ ହେବା ସହ ୨ ଜଣ ଜଗୁଆଳି ମୁତୟନ ହୋଇଥିଲେ। ମାତ୍ର ଦୁଃଖର ବିଷୟ, ଗଛ ପାଣି ନ ପାଇବା ସହିତ ଉତ୍ତମ ଯତ୍ନ ଅଭାବରୁ ଚାରାରୋପଣ ସ୍ଥାନ ଏବେ ଜରାଜୀର୍ଣ୍ଣ ହୋଇଗଲାଣି। ୨୪ ହଜାର ଚାରାରୁ ହାତଗଣତି ୨୪ଶହ ଚାରା ଦେଖିବାକୁ ମିଳିଛି। ବନୀକରଣ ଅଞ୍ଚଳରେ କରାଯାଇଥିବା ସୁରକ୍ଷା ତାରବାଡ଼ ନଷ୍ଟ ହୋଇଗଲାଣି। ଘଟଣା ଉପରେ ଯଥାଶୀଘ୍ର ଜିଲାସ୍ତରୀୟ ତଦନ୍ତ କରାଯାଇ ଦୋଷୀ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସ୍ଥାନୀୟବାସିନ୍ଦା ଦାବି କରିଛନ୍ତି। ତତ୍କାଳୀନ ଫରେଷ୍ଟର ମଳୟ ସାହୁ କହିଛନ୍ତି, ଚାରାରୋପଣ ପରେ ୬ ମାସ ବର୍ଷା ନ ହେବାରୁ କିଛି ଚାରା ମରିଯାଇଛି। ଆନନ୍ଦପୁର ଡିଏଫ୍ଓ ଅଭୟ କୁମାର ଦଳେଇ କହିଛନ୍ତି, ଅତ୍ୟଧିକ ଖରା ଯୋଗୁ ଅନେକ ଚାରା ମରିଯାଇଛି। ବନ ବିଭାଗ ପକ୍ଷରୁ ୨୦୨୩-୨୪ରେ ହେବାକୁ ଥିବା ବନୀକରଣ ସମୟରେ ମରି ଯାଇଥିବା ସ୍ଥାନରେ ପୁନର୍ବାର ଗଛ ଲଗାଯିବ ବୋଲି କହିଥିଲେ।