ନୂଆଦିଲ୍ଲୀ, ୬।୯: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ସିଜନ-୧୩ ଲାଗି ବିସିସିଆଇ ପକ୍ଷରୁ ରବିବାର କାର୍ଯ୍ୟସୂଚୀ ପ୍ରକାଶ ପାଇଛି। ଏହି କାର୍ଯ୍ୟସୂଚୀ ଅନୁଯାୟୀ ଗତଥରର ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ଓ ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱାଧୀନ ଚେନ୍ନାଇ ସୁପର୍ କିଙ୍ଗ୍ସ ମଧ୍ୟରେ ଉଦ୍ଘାଟନୀ ମ୍ୟାଚ୍ ସେପ୍ଟେମ୍ବର ୧୯ରେ ଖେଳାଯିବ। ଭାରତୀୟ ସମୟ ସନ୍ଧ୍ୟା ୭ଟା ୩୦ ମିନିଟ୍ରେ ଆବୁଧାବିରେ ଏହି ମ୍ୟାଚ୍ ଖେଳାଯିବ। ଆଇପିଏଲ୍ ଚେୟାରମ୍ୟାନ ବ୍ରିଜେଶ ପଟେଲ ପ୍ଲେ-ଅଫ୍ ଓ ଫାଇନାଲକୁ ଛାଡ଼ି ମୋଟ୍ ୫୬ ମ୍ୟାଚ୍ କାର୍ଯ୍ୟସୂଚୀ ଘୋଷଣା କରିଛନ୍ତି। ଯେଉଁଥିରୁ ଦୁବାଇ ଇଣ୍ଟରନ୍ୟାଶନାଲ କ୍ରିକେଟ୍ ଷ୍ଟାଡିୟମରେ ସର୍ବାଧିକ ୨୪ ମ୍ୟାଚ୍ ଖେଳାଯିବ। ସେହିଭଳି ଆବୁଧାବିର ଶେଖ୍ ଜାୟେଦ କ୍ରିକେଟ୍ ଷ୍ଟାଡିୟମ ୨୦ ମ୍ୟାଚ୍ ଏବଂ ଶାରଜା କ୍ରିକେଟ୍ ଷ୍ଟାଡିୟମ ୧୨ ମ୍ୟାଚ୍ର ଆୟୋଜନ ଅଧିକାର ପାଇଛି। ଚଳିତ ବର୍ଷ ଭାରତରେ କରୋନା ମହାମାରୀର ଭୟାବହତାକୁ ଦୃଷ୍ଟିରେ ରଖି ଆଇପିଏଲ୍କୁ ୟୁଏଇରେ ଆୟୋଜିତ କରାଯାଇଛି। ନଭେମ୍ବର ୧୦ରେ ଫାଇନାଲ ମ୍ୟାଚ୍ ଖେଳାଯିବ।