ବରଗଡ଼ ଅଫିସ୍,୨୫।୧୨: ଏକ ଔଷଧ କମ୍ପାନୀର ପରିଚୟ ଦେଇ ୨୪ ଲକ୍ଷ ଠକେଇ ଘଟଣାରେ ବରଗଡ଼ ଟାଉନ ଥାନା ପୋଲିସ ୨ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତ ଦ୍ୱୟ ହେଲେ ବରଗଡ଼ ସଦର ଥାନା ଅନ୍ତର୍ଗତ ଖଣ୍ଡହଥା ଗ୍ରାମର ଶିଶିର ସାହୁ(୩୩) ଏବଂ ସୁଦାମ ସାହୁ(୩୮)। ଅନ୍ୟ ଜଣେ ଅଭିଯୁକ୍ତ ଫେରାର ଥିବା ପୋଲିସ ସୂଚନା ଦେଇଛି। ଅଭିଯୁକ୍ତଙ୍କ ବିରୋଧରେ ବରଗଡ଼ ଟାଉନ ଥାନାରେ ଦଫା ୪୧୯, ୪୨୦, ୩୪ ଆଇପିସିରେ ଏକ ମାମଲା (ନଂ.୭୮୭/୨୨) ରୁଜୁ ହୋଇଛି ।
ପ୍ରକାଶ ଯେ, ଗିରଫ ଅଭିଯୁକ୍ତ ଶିଶିର ଓ ସୁଦାମ ଏବଂ ଫେରାର ଅଭିଯୁକ୍ତ ଜଣଙ୍କ ନିଜକୁ ଏକ ଔଷଧ କମ୍ପାନୀର ପରିଚୟ ଦେଇ ବରଗଡ଼ ସଦର ଥାନା ଅନ୍ତର୍ଗତ ଶ୍ରୀହରିନଗର ନିବାସୀ ପ୍ରଦୀପ ମେହେରଙ୍କଠାରୁ ୨୪ଲକ୍ଷ ଟଙ୍କା ଠକି ନେଇଥିଲେ। ଏ ନେଇ ସେ ସ୍ଥାନୀୟ ଟାଉନ ଥାନାରେ ଏତଲା ଦେଇଥିଲେ। ତାଙ୍କ ଏତଲାକୁ ଭିତ୍ତି କରି ପୋଲିସ ଉକ୍ତ ମାମଲା ରୁଜୁ କରିବା ସହିତ ୨ଅଭିଯୁକ୍ତଙ୍କୁ ଗିରଫ କରିଥିଲା। ରବିବାର ସେମାନଙ୍କୁ କୋଟ ଚାର୍ଲାଣ କରାଯାଇଛି ଏବଂ ଫେରାର ଅଭିଯୁକ୍ତଙ୍କୁ ଧରିବା ପାଇଁ ତନାଘନା ଚାଲିଛି ବୋଲି ବରଗଡ଼ ଟାଉନ ଥାନା ଅଧିକାରୀ ସତ୍ୟଜିତ କଣ୍ଡନକେଲ ସୂଚନା ଦେଇଛନ୍ତି।
