ପାରଳାଖେମୁଣ୍ଡି,୪ା୨(ଡି.ଏନ୍.ଏ.): ଗଜପତି ଜିଲା ପୋଲିସ ଚୋରା ବାଇକ୍ ବିକ୍ରି ଘଟଣାର ପର୍ଦ୍ଦାଫାଶ କରିଛି। ସେରଙ୍ଗ ପୋଲିସ ୨୪ଟି ଚୋରା ବାଇକ୍ ଜବତ କରିବା ସହ ୭ ଅଭିଯୁକ୍ତଙ୍କୁ ଗିରଫ କରିଥିବା ଖବରଦାତା ସମ୍ମିଳନୀରେ ଏସ୍ପି ଜୟରାମ ଶତପଥୀ ସୂଚନା ଦେଇଛନ୍ତି।
ଗିରଫ ଅଭିଯୁକ୍ତମାନେ ହେଲେ ଗଞ୍ଜାମ ଜିଲାର ହରି ଦଳବେହେରା, ସୁଶାନ୍ତ ସାମଲ, ରାୟଗଡ଼ା ଜିଲାର ଶ୍ରୀକାନ୍ତ ପାଳ, ଅଭିନାଶ ଶବର, ଶରତ ଶବର, ପାରଳାଖେମୁଣ୍ଡିର ଭାଗେଶ୍ବର ଅଧିକାରୀ, ସେରଙ୍ଗ ଅଞ୍ଚଳର ଇସ୍ରାଏଲ ରଇତ। ଗତ ଗୁରୁବାର ଖଜୁରିପଦା ଫାଣ୍ଡି ପୋଲିସ ଗାଡ଼ି ତନଖି କରୁଥିବା ବେଳେ ସନ୍ଦେହ ଜନକ ଭାବେ ଏକ ବାଇକ୍କୁ ଯାଞ୍ଚ କରିଥିଲା। ଗାଡ଼ି ଚାଳକ ଏବଂ ଗାଡି କାଗଜପତ୍ରରେ ଉଲ୍ଲେଖ ମାଲିକଙ୍କ ନାମ ମିଶୁ ନ ଥିବାରୁ ଏହା ଚୋରା ବାଇକ୍ ବୋଲି ପୋଲିସ ଜାଣିବାକୁ ପାଇଥିଲା। ପୋଲିସ ତଦନ୍ତ ପରେ ଅଭିଯୁକ୍ତ ତଥା ବ୍ରହ୍ମପୁରର ସୁଶାନ୍ତ ସାମଲଙ୍କ ସମ୍ପର୍କରେ ସୂଚନା ପାଇଥିଲା। ସୁଶାନ୍ତ ନକଲି କାଗଜପତ୍ର ପ୍ରସ୍ତୁତ କରି ଚୋରା ଗାଡ଼ି ବିକ୍ରି କରୁଥିଲେ ଓ ଅନ୍ୟ ଅଭିଯୁକ୍ତମାନେ ତାଙ୍କୁ ସହଯୋଗ କରୁଥିଲେ ବୋଲି ପୋଲିସ ପକ୍ଷରୁ କୁହାଯାଇଛି। ଘଟଣାର ଅଧିକ ତଦନ୍ତ ଜାରି ରହଥିବା ଏସ୍ପି କହିଛନ୍ତି।