ଜୋହାନ୍ସବର୍ଗ, ୧୮।୬(ପି.ଟି.)- କରୋନା ଭାଇରସ ସଂକ୍ରମଣ ଜନିତ ଲକ୍ଡାଉନ ଯୋଗୁ ଗତ ମାର୍ଚ୍ଚରୁ ବନ୍ଦ ରହିଥିବା କ୍ରିକେଟ ଏବେ ଦକ୍ଷିଣ ଆଫ୍ରିକାରେ ଆରମ୍ଭ ହେବାକୁ ଯାଉଛି। କିଙ୍ଗଫିଶର୍ସ, କାଇଟ୍ସ ଓ ଇଗଲ୍ସ ନାମରେ ୩ଟି ଦଳକୁ ନେଇ ଏକ ‘୩ଟି କ୍ରିକେଟ’ ପ୍ରତିଯୋଗିତା ଚଳିତ ମାସ ୨୭ ତାରିଖରେ ଆୟୋଜନ କରିବାକୁ କ୍ରିକେଟ ସାଉଥ୍ ଆଫ୍ରିକା(ସିଏସଏ) ବୁଧବାର ଘୋଷଣା କରିଛି। ସେଞ୍ଚୁରିଅନର ସୁପରସ୍ପୋର୍ଟ ପାର୍କରେ ମ୍ୟାଚ ଖେଳାଯିବ। ସର୍ବପ୍ରଥମ ସଲିଡାରିଟି କପ୍ରେ ୩ଟି ଦଳ ଭାଗନେବେ। କରୋନା ଜନିତ ଲକ୍ଡାଉନ୍ ପରେ ଦେଶରେ ଏହା ପ୍ରଥମ ସ୍ପୋର୍ଟିଂ ଇଭେଣ୍ଟ ହେବ। ନୂଆ ଫର୍ମାଟ ଅନୁସାରେ ଦକ୍ଷିଣ ଆଫ୍ରିକାର ଶୀର୍ଷସ୍ଥାନୀୟ ୨୪ ଖେଳାଳି ୩ଟି ଦଳରେ ବିଭକ୍ତ ହୋଇ ଖେଳିବେ। ମ୍ୟାଚ ୩୬ ଓଭର ବିଶିଷ୍ଟ ହେବ। ପ୍ରତି ହାଫ୍ରେ ୧୮ ଓଭର ଲେଖାଏ ରହିବ। ପ୍ରତି ଟିମ୍ ୧୨ ଓଭର ଲେଖାଏ ବ୍ୟାଟିଂ କରିବେ। ଅନ୍ୟ ୨ଟି ଟିମ୍ ୬ ଓଭର ଲେଖାଏ ବୋଲିଂ କରିବେ। କେଉଁ ଦଳ ପ୍ରଥମେ ବ୍ୟାଟିଂ କିମ୍ବା ବୋଲିଂ କରିବ ତାହା ଡ୍ର ମାଧ୍ୟମରେ ନିର୍ଦ୍ଧାରିତ ହେବ। ପ୍ରଥମାର୍ଦ୍ଧରେ ବ୍ୟାଟିଂ ଓ ବୋଲିଂ ରୋଟେଶନ ଭିତ୍ତିରେ ହେବ। ପ୍ରଥମାର୍ଦ୍ଧରେ ଯେଉଁ ଦଳ ସର୍ବାଧିକ ସ୍କୋର କରିଥିବା ସେ ଦ୍ୱିତୀୟାର୍ଦ୍ଧରେ ପ୍ରଥମେ ବ୍ୟାଟିଂ କରିବ। ସେହି ଅନୁସାରେ ପରବର୍ତ୍ତୀ ୨ ଦଳ ବ୍ୟାଟିଂ କରିବେ। ଯଦି କୌଣସି ଦଳ ୭ଟି ଉଇକେଟ ହରାଇଲା ତେବେ ଶେଷ ବ୍ୟାଟ୍ସମ୍ୟାନ ଏକାକୀ ବ୍ୟାଟିଂ କରିବେ। ତେବେ ସେ କେବଳ ଇଭେନ ନମ୍ବର ରନ ସ୍କୋର କରିପାରିବେ। ସର୍ବାଧିକ ରନ କରିଥିବା ଦଳ ସ୍ବର୍ଣ୍ଣ ଏବଂ ପରବର୍ତ୍ତୀ ଦୁଇ ଦଳ ଯଥାକ୍ରମେ ରୌପ୍ୟ ଓ ବ୍ରୋଞ୍ଜ ପଦକ ପାଇବେ।
ଅଂଶଗ୍ରହଣକାରୀ ଦଳ
କିଙ୍ଗଫିଶର୍ସ: କାଗିଶୋ ରାବାଡ଼ା(ଅଧିନାୟକ), ଫାଫ୍ ଡୁପ୍ଲେସି, କ୍ରିସ୍ ମୋରିସ, ଟାବ୍ରାଇଜ୍ ଶାମ୍ସି, ରୀଜା ହେଣ୍ଡ୍ରିକ୍ସ, ଜାନେମନ ମଲନ, ହେନରିଚ୍ କ୍ଲାସେନ, ଗ୍ଲେଣ୍ଟନ ଷ୍ଟୁରମାନ।
କାଇଟ୍ସ: କ୍ୱିଣ୍ଟନ ଡିକକ୍(ଅଧିନାୟକ), ଡେଭିଡ ମିଲର, ଟେମ୍ବା ବାଭୁମା, ଏଡ଼ରିଚ୍ ନର୍ଜେ, ଡାଓ୍ବିନ ପ୍ରିଟୋରିଅସ, ବେଉରନ ହେଣ୍ଡ୍ରିକ୍ସ, ଜେ.ଜେ. ସ୍ମୁଟ୍ସ, ଲଉଥୋ ସିପାମ୍ଲା।
ଇଗଲ୍ସ: ଏବି ଡି’ଭିଲର୍ସ(ଅଧିନାୟକ), ଇଡେନ ମାରକ୍ରାମ, ଲୁନ୍ଗି ଏନ୍ଗିଡି, ଆଣ୍ଡିଲ୍ ଫେଲୁକ୍ୱାୟୋ, ରସି ଭାନ୍ ଡର୍ ଡୁସେନ, ଜୁନିୟର ଡାଲା, କାଏଲ ଭେରିନେ, ସିସାନ୍ଦା ମଗଲା।
