ସିମୁଳିଆ,୧୯ା୧୧(ଡି.ଏନ୍.ଏ.): ଓଡ଼ିଶା ମିଳିତ ପ୍ରାଥମିକ ଶିକ୍ଷକ ମହାସଂଘର ଆହ୍ବାନରେ ଶନିବାର ସିମୁଳିଆର ମିଳିତ ପ୍ରାଥମିକ ଶିକ୍ଷକ ମହାସଂଘ ଦ୍ୱାରା ୩ ଦଫା ଦାବି ନେଇ ଶିକ୍ଷକ ଭବନ ପରିସରରେ ସଭା ଓ ଶୋଭାଯାତ୍ରା ଅନୁଷ୍ଠିତ ହୋଇଥିଲା। ଏହି ଅବସରରେ ୨୪୫ଜଣ ଶିକ୍ଷୟିତ୍ରୀ/ଶିକ୍ଷକ ଯୋଗ ଦେଇଥିଲେ। ସଂଘର ଉପଦେଷ୍ଟା ଶିବ ପ୍ରସାଦ ପଣ୍ଡାଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ସଭାପତି ରବିନ୍ଦ୍ର କୁମାର ସାହୁ ସମ୍ପାଦକ ବୀରେନ୍ଦ୍ର କୁମାର ଶତପଥୀଙ୍କ ସମେତ ପୀତବାସ ପାଣିଗ୍ରାହୀ, ଗୀତାରାଣୀ ସେଠୀ ପ୍ରମୁଖ ସରକାରଙ୍କ ଶିକ୍ଷାନୀତି, କେନ୍ଦ୍ର ସରକାର ଓ ରାଜ୍ୟ ସରକାରଙ୍କ ଦରମା ହାର, ଶିକ୍ଷା କ୍ଷେତ୍ରରେ ପାତରଅନ୍ତର ସମ୍ପର୍କରେ ଆଲୋଚନା କରିଥିଲେ। ଆସନ୍ତା ୭ ଦିନ ମଧ୍ୟରେ ସରକାର ଚୁକ୍ତିଭିତ୍ତିକ ପ୍ରଥା ଉଚ୍ଛେଦ କରି ଗତ ୨୦୦୧ରୁ ନିଯୁକ୍ତ ଶିକ୍ଷାକର୍ମୀମାନଙ୍କୁ କେନ୍ଦ୍ର ହାରରେ ଦରମା ପ୍ରଦାନ, ନୂତନ ପେନ୍ସନ୍ ଯୋଜନା ରଦ୍ଦ କରି ପୁରୁଣା ପେନ୍ସନ୍ ଯୋଜନା ଇତ୍ୟାଦି ଦାବି ପୂରଣ ନ କଲେ ଶିକ୍ଷୟିତ୍ରୀ/ଶିକ୍ଷକମାନେ ଆସନ୍ତା ୨୭ରେ ବିଧାନସଭା ଘେରାଉ କରିବେ ବୋଲି ସୂଚନା ଦେଇଛନ୍ତି। ଏ ସମ୍ପର୍କରେ ସଂଘ ପକ୍ଷରୁ ଶିକ୍ଷକ ଭବନ ପରିସରରୁ ଶୋଭାଯାତ୍ରା ବାହାରି ବିଇଓ ଅଫିସରେ ପହଞ୍ଚିବା ସହିତ ମୁଖ୍ୟମନ୍ତ୍ରୀ, ଶିକ୍ଷା ବିଭାଗ, ୫ଟି ସଚିବଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରାଯାଇଥିଲା।