ଦାରିଙ୍ଗବାଡି, ୫।୧୧ (ଅରୁଣ ସାହୁ): ଓଡିଶାର କଶ୍ମୀର ତଥା ପର୍ଯ୍ୟଟନକ୍ଷେତ୍ର ଦାରିଙ୍ଗବାଡିରେ ଦୈନିକ ବିଦ୍ୟୁତ ବିଭ୍ରାଟ ନେଇ ଜନ ଅସନ୍ତୋଷ ବୃଦ୍ଧି ପାଇଛି। ସୂଚନା ଥାଉ କି, ଶନିବାର ସାରା ଜିଲାରେ ବିଦ୍ୟୁତ ମରାମତି ପାଇଁ ସକାଳ ୮ ଟାରୁ ସଂଧ୍ୟା ୬ ଟା ପର୍ଯ୍ୟନ୍ତ ବିଦ୍ୟୁତ ସେବା ବନ୍ଦ କରାଯିବାକୁ ଘୋଷଣା କରାଯାଇ ସେବାକୁ ବନ୍ଦ କରିଦିଆଯାଇଥିଲା। କିନ୍ତୁ ସଂଧ୍ୟା ୬ ଟାରେ ପରେ ମଧ୍ୟ ବିଦ୍ୟୁତ ସେବା ଯୋଗାଇ ଦିଆଯାଇ ନ ଥିଲା। ରବିବାର ସକାଳ ହୋଇଯାଇଥିଲେ ମମଧ୍ୟ ସୁଦ୍ଧା ବଦ୍ୟୁତ ଯୋଗାଣ ବନ୍ଦ ରହିଥିଲା। ଫଳରେ ଅଞ୍ଚଳବାସୀ ହଇରାଣ ହେବା ସହ ଦୀର୍ଘ ଦି’ଦଶନ୍ଧି ଧରି ଯେଉଁ ଲଣ୍ଠନ, ଡିବିରୀକୁ ଭୁଲିଯାଇଥିଲେ ପୁଣି ସେହି ଜିନିଷକୁ ବ୍ୟବହାର କରି ରାତି କଟାଇଥିବା ଜଣାପଡିଛି।
ବିଦ୍ୟୁତ ବିଭ୍ରାଟ ଯୋଗୁଁ ଶନିବାର ବହୁ ଦୋକାନ, ହୋଟେଲଗୁଡିକ ଶୀଘ୍ର ବନ୍ଦ ହୋଇଯାଇଥିଲା। ଯାହାଲାଗି ଗ୍ରାହକମାନେ ହଟହଟା ହୋଇଛନ୍ତି। ଏଥିସହ ବିଦ୍ୟୁତ ଯୋଗାଣ ବନ୍ଦ ଯୋଗୁଁ ଉଭୟ ବିଏସଏନଏଲ ଓ ୪ଜି ସେବା ଠପ ହୋଇଯାଇଛି। ଏପରି ବିଦ୍ୟୁତ ବିଭ୍ରାଟ ଯୋଗୁ ଦାରିଙ୍ଗବାଡି ବ୍ଲକର ପ୍ରାୟ ୧୭ଟି ପଞ୍ଚାୟତ ସମେତ ପଡୋଶୀ ବ୍ଲକ ବାଲିଗୁଡାର ଋତୁଙ୍ଗିଆ, କୋଟଗଡ଼ ବ୍ଲକର ପକାରୀ ଆଦି ଅଞ୍ଚଳର ହଜାର ହଜାର ଲୋକ ଏଥିପାଇଁ ପ୍ରଭାବିତ ହୋଇଛନ୍ତ।
ସୂଚନାଯୋଗ୍ୟ, ଅଞ୍ଚଳରେ ବିଦ୍ୟୁତ ବିଭ୍ରାଟ ଦିନିକିଆ କଥା ନୁହଁ ପ୍ରାୟ ଦିନ ଏଭଳି ଅଞ୍ଚଳବାସୀ ସମସ୍ୟାର ସମ୍ମୁଖୀନ ହେଉଛନ୍ତ। ଏନେଇ ବିଦ୍ୟୁତ ବିଭାଗର କନିଷ୍ଠ ଯନ୍ତ୍ରୀ ଶିବ ପ୍ରସାଦ ନାୟକଙ୍କ ସହ ପଚାରିବାରୁ ସେ କହିଛନ୍ତ,ଦୁର୍ବୃତ୍ତମାନେ ଗଛ କାଟି ବିଦ୍ୟୁତ ତାର ଉପରେ ପକାଇ ଦେଉଛନ୍ତି । ଫଳରେ ଅନେକ ସମୟରେ ବିଭାଗ ହଇରାଣ ହେବା ସହ ଗ୍ରାହକମାନେ ମଧ୍ୟ ହଇରାଣ ହେଉଛନ୍ତି । ଏନେଇ ବିଦ୍ୟୁତ ବିଭାଗ ପକ୍ଷରୁ ଏକାଧିକ ଥର ଥାନାରେ ଅଭିଯୋଗ କରାଯାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିବା କନିଷ୍ଠଯନ୍ତ୍ରୀ କହିଛନ୍ତି।