କଟକ ଅଫିସ, ୧୫।୧: ଜଗତ୍ପୁର ଥାନା ଅନ୍ତର୍ଗତ ଆଇବି ରୋଡରେ ଥିବା ବାସନ୍ତୀ ଦୁର୍ଗା ଅଳଙ୍କାର ଦୋକାନ ଚୋରି ଘଟଣାରେ ପୋଲିସ ୫ଜଣଙ୍କୁ ଗିରଫ କରିଛି। ସେମାନଙ୍କଠାରୁ ପୋଲିସ ୨୫କିଲୋ ୫୦୦ ଗ୍ରାମ୍ ଓଜନର ରୁପା ଅଳଙ୍କାର, ୩୮୫ ଗ୍ରାମ୍ ଓଜନର ସୁନା ଅଳଙ୍କାର ସହ ନଗଦ ୧୨,୪୦୦ ଟଙ୍କା ଜବତ କରିଛି। ଏଥିସହିତ ଚୋରମାନେ ବ୍ୟବହାର କରୁଥିବା ଏକ କାର, ଗୋଟିଏ ସ୍କୁଟି, ମୋଟରସାଇକେଲ, ଗ୍ୟାସ୍ କଟର ସହ ୪ଟି ମୋବାଇଲ ଫୋନ ଜବତ କରିଛି। ଗିରଫ ଅଭିଯୁକ୍ତମାନେ ହେଲେ ଜଗତ୍ସିଂହପୁର ଜିଲା ରଘୁନାଥପୁରର ବାବୁ ଓରଫ ତପନ କୁମାର ସେଠୀ(୪୭), କଟକ ଜିଲା ଚୌଦ୍ୱାର ଓଟିଏମ୍ କଲୋନୀର ବାବି ଓରଫ ଅମୂଲ୍ୟ କୁମାର ମହାନ୍ତି (୪୨), ବଡ଼ମ୍ବାର ମୁନା ଓରଫ ରମେଶ ଚନ୍ଦ୍ର ସେଠୀ(୩୭), ଭୁବନେଶ୍ୱର ନୟାପଲ୍ଲୀ ଅଞ୍ଚଳର କୁନା ଓରଫ ତ୍ରିଲୋଚନ ସେଠୀ(୩୯)ଙ୍କ ସହ ଚୋରି ସାମଗ୍ରୀ କ୍ରୟ କରିଥିବା ଚାଉଳିଆଗଞ୍ଜର ପ୍ରଫୁଲ୍ଲ କୁମାର ସାହୁ(୫୫)। ଗିରଫ ଅଭିଯୁକ୍ତଙ୍କୁ ଗୁରୁବାର କୋର୍ଟଚାଲାଣ କରାଯାଇଥିବା କଟକ ଡିସିପି ପ୍ରତୀକ ସିଂହ ବୁଧବାର ସୂଚନା ଦେଇଛନ୍ତି।
ପ୍ରକାଶ ଯେ, ଗତ ଡିସେମ୍ବର ୫ତାରିଖ ରାତିରେ କେତେକ ଦୁର୍ବୃତ୍ତ ଜଗତପୁର ଆଇବି ରୋଡ୍ରେ ଥିବା ଏକ ଅଳଙ୍କାର ଦୋକାନର ପଛପାର୍ଶ୍ୱ କାନ୍ଥ ଭାଙ୍ଗି ସୁନା ଓ ରୁପା ଅଳଙ୍କାର ସହ ନଗଦ ଟଙ୍କା ଚୋରି କରିନେଇଥିବା ଅଭିଯୋଗ ହୋଇଥିଲା। ପୋଲିସ ଘଟଣାସ୍ଥଳରେ ପହଞ୍ଚତ୍ ସନ୍ଧାନୀ କୁକୁର ସହାୟତାରେ ତଦନ୍ତ ଆରମ୍ଭ କରିଥିଲା । ଦୁର୍ବୃତ୍ତମାନେ ଦୋକାନର କାନ୍ଥ ତାଡ଼ି ଦୋକାନରେ ଲାଗିଥିବା ସିସିଟିଭି କ୍ୟାମେରା ଭାଙ୍ଗିବା ସହ ହାର୍ଡଡିସ୍କକୁ କାଢ଼ି ନେଇଯାଇଥିଲେ। ଦୋକାନରୁ ପାଖାପାଖି ନଗଦ ୭୦ହଜାର ଟଙ୍କା ସହ ୪୦୦ ଗ୍ରାମ ଓଜନର ସୁନା ଅଳଙ୍କାର, ୪୦ କିଗ୍ରା ରୁପା ଅଳଙ୍କାର ଚୋରି କରିନେଇଥିବା ଦୋକାନ ମାଲିକ ଦୟାନିଧି ସାହୁ ଅଭିଯୋଗରେ ଦର୍ଶାଇଥିଲେ।