ଢେଙ୍କାନାଳ, ୨୮।୭(ରତନ ନାୟାର): ଢେଙ୍କାନାଳ ବାଜିଚୌକସ୍ଥିତ ପୁରୁଣା ଜିଲା ମୁଖ୍ୟ ଚିକିତ୍ସାଳୟ ତଥା ସହରାଞ୍ଚଳ ସ୍ବାସ୍ଥ୍ୟକେନ୍ଦ୍ରରେ ରକ୍ଷଣାବେକ୍ଷଣ ଅଭାବରୁ ୨୫ ଲକ୍ଷ ଟଙ୍କାର ଦୁଇଟି ବଡ଼ ଜେନେରେଟର ଖତ ଖାଉଛି। ଜିଲା ସ୍ବାସ୍ଥ୍ୟ ବିଭାଗ ଏଥିପ୍ରତି ଦୃଷ୍ଟି ଦେଉ ନ ଥିବାରୁ ସାଧାରଣରେ ଅସନ୍ତୋଷ ବଢ଼ିବାରେ ଲାଗିଛି।
୨୦୧୯ରେ କରୋନା ମହାମାରୀ ସମୟରେ ପୁରୁଣା ଜିଲା ମୁଖ୍ୟ ଚିକିତ୍ସାଳୟକୁ କୋଭିଡ୍ ରୋଗୀଙ୍କ ଚିକିତ୍ସା ଲାଗି ବ୍ୟବହାର କରାଯାଇଥିଲା। ଏଠାରେ ୨୪ ଘଣ୍ଟିଆ ବିଦ୍ୟୁତ୍ ସେବା ଯୋଗାଇ ଦେବା ଲାଗି ରାଜ୍ୟ ସରକାରଙ୍କ ଅନୁଦାନ ଅର୍ଥରେ ସାଢ଼େ ୧୨ ଲକ୍ଷ ଟଙ୍କା ଲେଖାଏ ବିନିମୟରେ ୨ଟି ଜେନେରେଟର ଅଣାଯାଇଥିଲା। କୋଭିଡ୍ ସ୍ଥିତି ସ୍ବାଭାବିକ ହେବା ପରେ ଏହାକୁ ବିଭାଗୀୟ କର୍ତ୍ତୃପକ୍ଷ ଭୁଲିଯାଇଛନ୍ତି। ଫଳରେ ରକ୍ଷଣାବେକ୍ଷଣ ଅଭାବରୁ ଉକ୍ତ ଦୁଇ ଜେନେରେଟର ଚାରିପଟେ ଗଛଲତା ମାଡ଼ି ଗଲାଣି। ଆବର୍ଜନାମୟ ସ୍ଥାନରେ ପଡ଼ି ପଡ଼ି ଏହା ନଷ୍ଟ ହେବାକୁ ବସିଛି। ଦୃଷ୍ଟି ଆକର୍ଷଣ ସତ୍ତ୍ୱେ ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ଏଥିପ୍ରତି ଗୁରୁତ୍ୱ ଦିଆଯାଉନାହିଁ। କେବଳ ଜେନେରେଟର ନୁହେଁ, କୋଭିଡ୍ ସମୟରେ ସ୍ବାସ୍ଥ୍ୟକେନ୍ଦ୍ରରେ ଲାଗିଥିବା ଫ୍ୟାନ୍, ଏସି ମଧ୍ୟ ରକ୍ଷଣାବେକ୍ଷଣ କରାଯାଉନାହିଁ। ତେଣୁ ସେଗୁଡ଼ିକ କିଭଳି ସ୍ଥିତିରେ ଅଛି, ତାହା ପ୍ରଶ୍ନବାଚୀ ସୃଷ୍ଟି କରିଛି।
ଏ ସଂକ୍ରାନ୍ତରେ ଜିଲା ମୁଖ୍ୟ ଚିକିତ୍ସାଧିକାରୀ (ସିଡିଏମ୍ଓ) ଡା. ଅଶୋକ କୁମାର ଦାସଙ୍କ ଦୃଷ୍ଟି ଆକର୍ଷଣ କରାଯିବାରେ ସେ କୁହନ୍ତି, ଥରେ ବଣବୁଦା ସଫା କରାଯାଇଥିଲା। ପୁଣି ଜେନେରେଟର ଥିବା ସ୍ଥାନରେ ଗଛଲତା ମାଡ଼ିଗଲାଣି। ଏହାକୁ ସଫା କରାଯିବ। ନୂତନ ଜିଲା ମୁଖ୍ୟ ଚିକିତ୍ସାଳୟରେ ଆବଶ୍ୟକ ସଂଖ୍ୟକ ଜେନେରେଟର ରହିଛି। ତେଣୁ ଉକ୍ତ ଦୁଇଟି ଜେନେରେଟରକୁ ପୁରୁଣା ଜିଲା ଚିକିତ୍ସାଳୟରେ ରଖାଯାଇଛି। ନିକଟ ଭବିଷ୍ୟତରେ ସେଠାରେ ମାନସିକ ରୋଗୀଙ୍କ ପାଇଁ ୟୁନିଟ୍ ଖୋଲାଯିବାକୁ ପ୍ରସ୍ତାବ ରହିଛି। ଏହା ସେତେବେଳେ କାମରେ ଆସିବ ବୋଲି ସିଡିଏମ୍ଓ କହିଛନ୍ତି।
