ରୋମ୍: ଭୂତ ନାଁ ଶୁଣିଲେ ଲୋକଙ୍କ ମନରେ ଛନକା ପଶେ। ଭୂତ ଭୟରେ ଅନେକ ଲୋକ ଗାଁ ଘର ଛାଡ଼ି ଅନ୍ୟତ୍ର ବସବାସ କରିଥାନ୍ତିି। କିନ୍ତୁ ଇଟାଲୀର ଏକ ଭୂତ ସହରରେ ରହିବା ପାଇଁ ଲୋକଙ୍କୁ ଆମନ୍ତ୍ରଣ କରାଯାଉଛି। ଯିଏ ସେଠାକୁ ଯାଇ ବସବାସ କରିବେ ତାଙ୍କୁ ୩୦ ହଜାର ୟୁରୋ (ପ୍ରାୟ ୨୫ ଲକ୍ଷ ଟଙ୍କା)ର ଅଫର୍ ଦିଆଯାଉଛି।
ଦକ୍ଷିଣ-ପୂର୍ବରେ ଥିବା ପ୍ରେସିସ୍ ସହର ଏହାର ସୌନ୍ଦର୍ଯ୍ୟ ଓ ଚିତ୍ତାକର୍ଷକ ଶୋଭାରାଜି ପାଇଁ ପ୍ରସିଦ୍ଧ।
ସେଠାରେ ୧୯୯୧ ମସିହା ପୂର୍ବରୁ ନିର୍ମିତ ଅନେକ ଘର ଏବେ ବି ଖାଲି ପଡ଼ିଛି। ଏହି ସହରରେ ରହିବା ପାଇଁ ଲୋକେ ମଙ୍ଗୁ ନାହାନ୍ତି। ତେଣୁ ସହରକୁ ଚଳଚଞ୍ଚଳ କରିବା ପାଇଁ ସ୍ଥାନୀୟ କାଉନ୍ସିଲର୍ ଆଲଫ୍ରେଡୋ ପଲେସ୍ ଏହି ଅଭିନବ ଉପାୟ ଆପଣାଇଛନ୍ତି। ଆଲଫ୍ରେଡୋ କହିଛନ୍ତି, ଏଠାକୁ ଯିଏ ଆସି ରହିବ ତାଙ୍କୁ ୩୦ ହଜାର ୟୁରୋ ମିଳିବ। ସେହି ଅର୍ଥ ଦୁଇଭାଗ ହେବ। ସମ୍ପୃକ୍ତ ଆଗ୍ରହୀ ବ୍ୟକ୍ତି କୋଠାକୁ ଆଂଶିକ ଭାବେ କିଣିବା ବାବଦରେ ୧୫ ହଜାର ୟୁରୋ ଖର୍ଚ୍ଚ କରିବେ। ଆଉ ୧୫ ହଜାର ୟୁରୋରେ କୋଠାକୁ ନୂଆ ଶୈଳୀରେ ସଜାଯିବ।
ମାରିଆ ଡି ଲେଉକା ଉପକୂଳରୁ ୧୫ ମିନିଟ ଯାତ୍ରା କଲେ ଏହି ସହର ପଡ଼େ। ୨୦୧୯ରେ ନିକଟସ୍ଥ ଏକ ସହର ସହିତ ପ୍ରେସିସ୍ର ମିଶ୍ରଣ ପରେ ଏହି ପ୍ରେସିସ୍-ଆକ୍ୱାରିକା ନାମରେ ପରିଚିତ। ମିଶ୍ରଣ ପରେ ଇଟାଲୀୟ ଆଇନ ଅନୁଯାୟୀ ପ୍ରିସେସ୍ରେ ଲୋକେ ରହିଲେ ବିସ୍ତୃତ ଭୂ-ଖଣ୍ଡକୁ ବିକାଶ ପାଇଁ ବାର୍ଷିକ ୧୦ ଲକ୍ଷ ୟୁରୋ ମିଳିବ। ୯ ହଜାର ଜନସଂଖ୍ୟା ବିଶିଷ୍ଟ ପ୍ରିସେସ୍ର ଅର୍ଦ୍ଧାଧିକ ଲୋକ ସହର ଛାଡ଼ି ଅନ୍ୟତ୍ର ରହୁଛନ୍ତି।
