ନୟାଗଡ଼ ଅଫିସ,୮।୧୨: ଗର୍ଭ ସଞ୍ଚାର ପରେ ଲିଙ୍ଗ ନିରୁପଣ କରୁଥିବା ନେଇ ସୂଚନା ଦେଲେ ସୂଚନାଦାତା ପାଇବେ ୨୫ ହଜାର ଟଙ୍କା ପୁରସ୍କାର। ତେବେ ପୁରସ୍କାର ରାଶି ୩ ସୋପାନରେ ମିଳିବ ବୋଲି ଗର୍ଭଧାରଣ ପୂର୍ବ ଓ ପ୍ରସ୍ତୂତି ନିଦାନ କୌଶଳ(ପିସି ପିଏନଡିଟି) ପରାମର୍ଶ ସମିତି ବୈଠକରେ ଗୁରୁବାର କୁହାଯାଇଛି। ଜିଲାପାଳଙ୍କ ସଭାଗୃହରେ ଜିଲାପାଳ ରବୀନ୍ଦ୍ର ନାଥ ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟରେ ଅଲଟ୍ରାସାଉଣ୍ଡ ହେଉ ନ ଥିବାରୁ ଅସନ୍ତୋଷ ପ୍ରକାଶ ପାଇଥିଲା। ସିଡିଏମ୍ଓ ମକରନ୍ଦ ବେଉରା କହିଥିଲେ, ସପ୍ତାହକୁ ୨ ଥର ଅଲଟ୍ରାସାଉଣ୍ଡ ହେଉଛି। ତେବେ ଜିଲା ମୁଖ୍ୟ ଚିକିତ୍ସାଳୟ ପାଇଁ ଅଲଟ୍ରା ସାଉଣ୍ଡ କରିବାକୁ ନିଯୁକ୍ତି ପାଇଥିବା ଗାଇନିକ୍ ସ୍ପେଶାଲିଷ୍ଟ କାର୍ଯ୍ୟରେ ଯୋଗ ନ ଦେବାରୁ ଅବ୍ୟସ୍ଥା ହୋଇଛି। ଯଦି କେହି ଗାଇନିକ୍ ସ୍ପେଶାଲିଷ୍ଟ ଅଲଟ୍ରାସାଉଣ୍ଡ କରୁଥିବେ ସେନେଇ ଆବଶ୍ୟକ ପ୍ରମାଣପତ୍ର ଦେଲେ ଆମେ ପୋଷ୍ଟିଂ କରି ପାରିବୁ। ଅନ୍ୟପକ୍ଷେ ଚାନ୍ଦପୁର ବସନ୍ତ ମଞ୍ଜରୀ ସାଧାରଣ ଚିକିତ୍ସାଳୟରେ ଅଲଟ୍ରାସାଉଣ୍ଡ କାର୍ଯ୍ୟକ୍ଷମ ହୋଇଛି। ଏଠାରେ ରୋଗୀ ଉପକୃତ ହେଉଛି ବୋଲି କହିଥିଲେ। ଅନ୍ୟପକ୍ଷେ ଲିଙ୍ଗ ନିରୁପଣ ନେଇ ସୂଚନା ଦେଇଥିବା ବ୍ୟକ୍ତିର ରିପୋର୍ଟ ସତ୍ୟତା ଜଣାପଡିଲେ ପ୍ରଥମେ ୧୦ ହଜାର ଟଙ୍କା ପୁରସ୍କାର ଦିଆଯିବ। ମାମଲା କୋର୍ଟକୁ ଗଲେ ପୁଣି ୧୦ ହଜାର ଓ ଦଣ୍ଡ ହେଲେ ପୁଣି ୫ ହଜାର ଟଙ୍କା ପୁରସ୍କାର ରାଶି ଯୋଗାଇ ଦିଆଯିବବୋଲି କହିଥିଲେ। ପୁରସ୍କାର ରାଶି ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ବହନ କରୁଛି ବୋଲି କୁହାଯାଇଛି। ଏଣୁ ଜନସାଧାରଣ ଏହାର ଫାଇଦା ନେଇ ଲିଙ୍ଗ ନିରୁପଣ କରୁଥିବା ବ୍ୟକ୍ତିଙ୍କୁ ଧରାଇବାକୁ ଜିଲାପାଳ ପରମର୍ଶ ଦେଇଛନ୍ତି। ଅପରପକ୍ଷେ ସହାୟକ ପ୍ରଜନନ ପ୍ରଯୁକ୍ତି ବିଦ୍ୟା ଅଧିନିୟମ ଓ ସରୋଗେସି ନିୟମାବଳିର ସଠିକ ଅନୁପାଳନ ପୂର୍ବକ ଟେକ୍ନୋଲୋଜିର ଅପବ୍ୟବହାରକୁ ରୋକି ଗର୍ଭସ୍ଥ ଶିଶୁର ଜୀବନ ଅଧିକାର ରକ୍ଷା କରାଯାଇ ପାରିବ ବୋଲି ମଧ୍ୟ କହିଥିଲେ। ଅନ୍ୟମାନଙ୍କ ମଧ୍ୟରେ ସ୍ତ୍ରୀ ରୋଗ ବିଶେଷଜ୍ଞ ସୁଧାଂଶୁ ଶେଖର ଷଡ଼ଙ୍ଗୀ, ଶିଶୁ ରୋଗ ବିଶେଷଜ୍ଞ ତିଳୋତ୍ତମା ଷଡ଼ଙ୍ଗୀ, ଜିଲା ସହ ପରିଚାଳକ (ଆଇନ) ଅଜିତ କୁମାର ପାଣିଗ୍ରାହୀ, କିଶୋର ଦାଶ ପ୍ରମୁଖ ଉପସ୍ଥିତ ଥିଲେ।