କୋଲକାତା,୨୬।୮: ପଶ୍ଚିମବଙ୍ଗର ନେତାଜୀ ସୁଭାଷ ଚନ୍ଦ୍ର ବୋଷ ଅନ୍ତର୍ଜାତୀୟ ବିମାନ ବନ୍ଦରରୁ ୨୫୦ କିଲୋଗ୍ରାମ୍ ରେଡ଼ିଓ ଆକ୍ଟିଭ୍ ଧାତୁ କାଲିଫୋର୍ନିୟମ୍ ଜବତ ହୋଇଛି। ସିଆଇଡି ପକ୍ଷରୁ ଚଢାଉ କରାଯାଇ ଦୁଇ ଅଭିଯୁକ୍ତଙ୍କ ଠାରୁ ଏହା ଜବତ ହୋଇଛି। ଅନ୍ତର୍ଜାତୀୟ ବଜାରରେ ଏହାର ଦାମ ୪,୨୫୦ କୋଟି ଟଙ୍କା ହେବ ବୋଲି ଅନୁମାନ କରାଯାଉଛି। ଏହା ନ୍ୟୁକ୍ଲିୟର ରିଆକ୍ଟର ଷ୍ଟାଟ୍ କରିବାରେ ବ୍ୟବହୃତ ହୋଇଥାଏ। ଗିରଫ ଅଭିଯୁକ୍ତଙ୍କୁ ପଚରା ଉଚରା ଜାରି ରହିଛି। ଦୁଇ ଅଭିଯୁକ୍ତ ସୈଲାନ୍ କର୍ମାକର ଏବଂ ଅସିତ ଘୋଷ ହୁଗୁଳି ଜିଲା ବାସିନ୍ଦା। ଏହି ରେଡିଓ ଆକ୍ଟିଭ୍ ଧାତୁକୁ ୧୯୫୦ରେ ଆମେରିକାର ଏକ ଲ୍ୟାବ୍ରେ ପ୍ରଥମେ ସିନ୍ଥେସିସ୍ କରାଯାଇଥିଲା। ୯୦୦ ଡିଗ୍ରୀ ସେଣ୍ଟିଗ୍ରେଡ୍ ତାପମାତ୍ରାରେ ଏହା ତରଳିଥାଏ। ଏହି ଧାତୁ ଅତି କୋମଳ। ଏହାକୁ ବ୍ଲେଡ୍ରେ ମଧ୍ୟ କାଟି ହୋଇଥାଏ। ତେଲ ଖଣି ସହିତ ସୁନା ରୁପା ଖଣି ଚିହ୍ନଟ ପାଇଁ ଏହାର ବ୍ୟବହାର କରାଯାଇଥାଏ। ମେଟାଲ ଡିଟେକ୍ଟରରେ ଏହା ବ୍ୟବହୃତ ହୋଇଥାଏ। ଘର ତାପମାତ୍ରାରେ ଏହା କଠିନ ଅବସ୍ଥାରେ ରହିଥାଏ। କାଲିଫୋର୍ନିୟମ ସମସ୍ତ ଆଇସୋଟପ୍ ରେଡିଓ ଆକ୍ଟିଭ୍। ଏହାର ଆଇସୋଟପ୍ ସିଏଫ୍-୨୫୧ର ହାଫ୍ ଲାଇଫ୍ ପିରିୟଡ୍ ୮୦୦ ବର୍ଷ ହୋଇଥାଏ। ଏହାର ଆଇସୋଟପ୍ ସିଏଫ୍-୨୫୨ର ଏକ ମାଇକ୍ରୋଗ୍ରାମ୍ରୁ ପ୍ରତି ମିନିଟରେ ୧୭୦ ନିୟୁତ ନ୍ୟୁଟ୍ରନ୍ ସୃଷ୍ଟି କରାଯାଇ ପାରେ।
