ଢେଙ୍କାନାଳ ଅଫିସ, ୧୨।୧୧: ଚମତ୍କାର ସଙ୍ଗୀତରେ ସେ ମଞ୍ଚରେ ଭରିପାରନ୍ତି ରୋମାଞ୍ଚ। ଭଜନ, ଜଣାଣ ହେଉ କି ଆଧୁନିକ ଗୀତ, ଶ୍ରୋତାଙ୍କ ହୃଦୟକୁ ଛୁଇଁପାରେ ତାଙ୍କ ସ୍ବର। ଶକ୍ତି ମିଶ୍ର, ଅସୀମା ପଣ୍ଡାଙ୍କ ଭଳି ଆଗଧାଡ଼ିର କଣ୍ଠଶିଳ୍ପୀ ରାଜ୍ୟ ତଥା ଜାତୀୟ ମଞ୍ଚରେ ପ୍ରତିଭା ପ୍ରଦର୍ଶନ କରି ଢେଙ୍କାନାଳର ଗୌରବ ବଢ଼ାଇଥିବାବେଳେ ଯୁବପ୍ରତିଭା ଅଂଶୁମାନ ଭରଦ୍ୱାଜ ଏବେ ସେହି ଧାରାରେ ଆଗକୁ ବଢୁଛନ୍ତି। ‘ସିଦ୍ଧାର୍ଥ’ ଟିଭିରେ ପ୍ରସାରିତ ସଙ୍ଗୀତଭିତ୍ତିକ ରିଆଲିଟି ଶୋ’ ‘ଓଡ଼ିଶାର ନୂଆ ସ୍ବର’ର ଫାଇନାଲ ରାଉଣ୍ଡର ୧୦ ପ୍ରତିଯୋଗୀଙ୍କ ମଧ୍ୟରେ ସ୍ଥାନ ସୁଦୃଢ଼ କରି ସେ ନିଜର ଦକ୍ଷତାର ପରିଚୟ ଦେଇଥିବାବେଳେ ସଙ୍ଗୀତ ଜଗତରେ ନୂଆକରି ପାଦ ଥାପୁଥିବା ଯୁବପିଢ଼ିଙ୍କ ପାଇଁ ସାଜିଛନ୍ତି ଆଦର୍ଶ।
ପିଲାଟି ଦିନରୁ ସଙ୍ଗୀତ ପ୍ରେମରେ ପଡ଼ିଯାଇଛନ୍ତି ଅଂଶୁମାନ। ଏଥିରେ ତାଙ୍କ ମା’ ମଧୁସ୍ମିତା ମିଶ୍ରଙ୍କ ପ୍ରୋତ୍ସାହନ ଏବଂ ବାପା ଆଇନଜୀବୀ ଦେବାଶିଷ ମିଶ୍ରଙ୍କ ପ୍ରେରଣା ବେଶ୍ ସହାୟକ ହୋଇଛି। ଅଂଶୁମାନ ପର୍ଯ୍ୟାୟକ୍ରମେ ଖ୍ୟାତନାମା ସଙ୍ଗୀତ ନିର୍ଦ୍ଦେଶକ ମନ୍ମଥ ମିଶ୍ର, ଗୁରୁ ଯାମିନୀ ରଞ୍ଜନ ଦାସ, ଗୁରୁ ଶିବାନୀ ପ୍ରିୟଦର୍ଶିନୀ ନନ୍ଦଙ୍କଠାରୁ ସଙ୍ଗୀତ ଶିକ୍ଷା ଲାଭ କରିଛନ୍ତି। ରାଜ୍ୟର ବିଭିନ୍ନ ଉତ୍ସବ, ମହୋତ୍ସବରେ ସଙ୍ଗୀତ ପରିବେଷଣ କରି ସେ ସାଉଁଟିଛନ୍ତି ଅଜସ୍ର ପ୍ରଶଂସା। କୋଲ୍କାତାରେ ରେକର୍ଡିଂ ହୋଇଥିବା ‘ସିଙ୍ଗ୍ ଦିଲ୍ ସେ’ ଗୀତ ଗାଇ ସେ ଦର୍ଶକଙ୍କ ପ୍ରଶଂସା ଭାଜନ ହୋଇପାରିଛନ୍ତି। କେବଳ ଏତିକି ନୁହେଁ, ସେ ଏକାଧାରରେ ଜଣେ ମଞ୍ଚ ଅଭିନେତା, କ୍ରିକେଟର ମଧ୍ୟ। ଏଏସ୍ସିଏଲ୍ ଇଣ୍ଡିଆ ପକ୍ଷରୁ ଅନୁଷ୍ଠିତ ପ୍ରାଇଭେଟ୍ କ୍ରିକେଟ ଲିଗ୍ରେ ଓଡ଼ିଶାର ୧୪୦ ପ୍ରତିଭାଙ୍କ ମଧ୍ୟରୁ ଚୟନ ହୋଇଥିବା ୨ଜଣଙ୍କ ମଧ୍ୟରେ ଅଂଶୁମାନ ଅଛନ୍ତି। ସେ ଏବେ ଡେରାଡୁନ୍ରେ ପ୍ରସ୍ତୁତି ଚଳାଇଛନ୍ତି। ଯୁକ୍ତ ୩ ପ୍ରଥମ ବର୍ଷରେ ପାଦ ଥାପିଥିବା ଏହି ୧୮ ବର୍ଷୀୟ ଯୁବକ କଣ୍ଠଶିଳ୍ପୀ ଶକ୍ତି ମିଶ୍ରଙ୍କୁ ଆଦର୍ଶ ମାନୁଥିବାବେଳେ ଭବିଷ୍ୟତରେ ଓଲିଉଡ୍ ଏବଂ ବଲିଉଡ୍ରେ କଣ୍ଠଦାନ କରିବାକୁ ଲକ୍ଷ୍ୟ ରଖିଛନ୍ତି। ସୂଚନାଯୋଗ୍ୟ, ଅଂଶୁମାନଙ୍କ ପୈତୃକ ଘର ମୁକ୍ତାଦେଈପୁର ଶାସନ ହୋଇଥିବାବେଳେ ବିଶିଷ୍ଟ ଶିକ୍ଷାବିତ୍, ଆଇନଜୀବୀ ତଥା ସାହିତି୍ୟକ ସ୍ବର୍ଗତ ଡ. ବିଧାନଚନ୍ଦ୍ର ମିଶ୍ରଙ୍କ ସେ ନାତି।