ଯାଜପୁର ଅଫିସ,୧।୨: ଗ୍ରାମାଞ୍ଚଳ ତଥା ଦୁର୍ଗମ ଅଞ୍ଚଳର ଯୋଗାଯୋଗ ବ୍ୟବସ୍ଥାକୁ ସୁଦୃଢ଼ କରିବା ପାଇଁ ୨୦୧୧ ଅକ୍ଟୋବରରୁ ବିଜୁ ସେତୁ ଯୋଜନା କାର୍ଯ୍ୟକାରୀ କରାଯାଇଛି। ଏଥିପାଇଁ ସାଧାରଣ ଲୋକଙ୍କ ଟିକସରୁ ବ୍ୟାପକ ଅର୍ଥ ଆବଣ୍ଟିତ ହେଉଛି। କିନ୍ତୁ ଏହି ଯୋଜନାରେ ଯେଉଁ ପରିମାଣରେ ଜନବସତି ଉପକୃତ ହେବା ପାଇଁ ଲକ୍ଷ୍ୟ ରଖାଯାଉଛି, ତାହା ବିଭାଗୀୟ ସମୀକ୍ଷା ବୈଠକର ନିଷ୍ପତ୍ତିରେ ସୀମିତ ରହୁଛି। ୨୦୨୧ ଜୁଲାଇରେ ଅନୁଷ୍ଠିତ ବିଭାଗୀୟ ସମୀକ୍ଷା ବୈଠକରେ ବ୍ରହ୍ମପୁର, ଭବାନୀପାଟଣା, ଭୁବନେଶ୍ୱର, ବାରିପଦା, ବଲାଙ୍ଗୀର, କଟକ, କେନ୍ଦ୍ରାପଡ଼ା-ଯାଜପୁର, କେନ୍ଦୁଝର, ସମ୍ବଲପୁର, ସୁନାବେଡ଼ା, ସୁନ୍ଦରଗଡ଼, ଅନୁଗୋଳ ଓ ବାଲେଶ୍ୱର ଗ୍ରାମ୍ୟ ନିର୍ମାଣ ସର୍କଲ ଅଧୀନରେ ନିର୍ମାଣାଧୀନ ୩୧୨ ବିଜୁ ସେତୁ ସମ୍ପୂର୍ଣ୍ଣ କରିବାକୁ ନିଷ୍ପତ୍ତି ହୋଇଥିଲା। ହେଲେ ଗତ ଡିସେମ୍ବର ୩୧ ସୁଦ୍ଧା ମାତ୍ର ୫୮ଟି ସେତୁ ନିର୍ମାଣ ସମ୍ପୂର୍ଣ୍ଣ ହୋଇଛି। ଏହି ବିଫଳତା ଉପରେ ଗତ ୧୭ରୁ ୨୧ ତାରିଖ ପର୍ଯ୍ୟନ୍ତ ଅନୁଷ୍ଠିତ ବୈଠକରେ ଗ୍ରାମ୍ୟ ନିର୍ମାଣ ବିଭାଗର ଚିଫ୍ ଇଞ୍ଜିନିୟର ଉଦ୍ବେଗ ପ୍ରକାଶ କରିବା ସହ ବାକି ରହିଥିବା ୨୫୪ ସେତୁରୁ ମାର୍ଚ୍ଚ ସୁଦ୍ଧା ୨୧୩ ଟି ଏବଂ ମାର୍ଚ୍ଚ ପରେ ବାକି ୪୧ଟି ସେତୁ ସମ୍ପୂର୍ଣ୍ଣ କରିବାକୁ ସମ୍ପୃକ୍ତ ଯନ୍ତ୍ରୀ ଓ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ସେହିପରି ଠିକାସଂସ୍ଥାଗୁଡିକ ବିରୋଧରେ ଉପଯୁକ୍ତ କାର୍ଯ୍ୟାନୁଷ୍ଠାନ ଅଭାବରୁ ଏଭଳି ସ୍ଥିତି ସୃଷ୍ଟି ହୋଇଛି ବୋଲି ବୈଠକରେ ଚିଫ୍ ଇଞ୍ଜିନିୟର ପ୍ରକାଶ କରିଛନ୍ତି। ହେଲେ ଏହି ଅଧାପନ୍ତରିଆ ସେତୁଗୁଡିକ ଦ୍ୱାରା ପ୍ରଭାବିତ ଗ୍ରାମାଞ୍ଚଳର ପ୍ରାୟ ୨୦ ଲକ୍ଷ ଲୋକ ଚଳିତ ପଞ୍ଚାୟତ ନିର୍ବାଚନକୁ ପ୍ରଭାବିତ କରିପାରନ୍ତି ବୋଲି ରାଜନୈତିକ ମହଲରେ ମତପ୍ରକାଶ ପାଇଛି।
ବିଜୁ ସେତୁ ଯୋଜନା ଗ୍ରାମାଞ୍ଚଳ ଲୋକଙ୍କୁ ଉପକୃତ କରୁଛି। ନଦୀନାଳ ଭରା ଅଞ୍ଚଳରେ ଲୋକେ ଏହି ସେତୁ ଦ୍ୱାରା ଅନ୍ୟ ସ୍ଥାନକୁ ସହଜରେ ଯୋଗାଯୋଗ କରି ପାରୁଛନ୍ତି। ହେଲେ ଠିକା କାମ ପରିଚାଳନାରେ ଗ୍ରାମ୍ୟ ନିର୍ମାଣ ବିଭାଗର ବିଫଳତା, ଠିକାଦାରଙ୍କୁ ପାଉଣା ପ୍ରଦାନରେ ବିଳମ୍ବ ଆଦି କାରଣରୁ ପ୍ରକଳ୍ପ ସମ୍ପୂର୍ଣ୍ଣ ହେବାରେ ବାଧକ ସାଜିଛି। ଏହାର ଫାଇଦା ନେଉଛନ୍ତି ସମ୍ପୃକ୍ତ ଠିକାଦାରମାନେ। ଠିକାଦାରମାନେ ବିଳମ୍ବ ହେବା ବାହାନାରେ ବର୍ଦ୍ଧିତ ଦର ଆବେଦନ କରି ଅଧିକ ଲାଭବାନ ହେଉଛନ୍ତି। ଏଥିରେ ଯନ୍ତ୍ରୀ ଓ ଠିକାଦାରଙ୍କ ମଧ୍ୟରେ ସଲାସୁତୁରା ରହିଥିବା ଅଭିଯୋଗ ହେଉଛି। ଯାଜପୁର ଜିଲାରେ ୨୦୧୫ରୁ ଆରମ୍ଭ ହୋଇଥିବା କେଲୁଅ ନଦୀର ଅରାବଳଠାରୁ ରମ୍ଭାପୁର ରାସ୍ତାର ସେତୁ, ୨୦୧୮ରେ ଶଗଡ଼ିଆ ନାଳ ଉପରେ ନରସିଂହପୁର ଠାରୁ ପିପିଲଡିହ, କାଣୀ ନାଳ ଉପରେ ଦତ୍ତପୁରଠାରୁ ଗଣପତିପାଟଣା, ବେଙ୍ଗ ନାଳ ଉପରେ ବରେଇ ନୂଆବିଲଠାରୁ ମିଆପାଟଣା, ବୈତରଣୀ ନଦୀ ଉପରେ ବଲଦାଠାରୁ କୁଟୁରିଆ ରାସ୍ତା ଇତ୍ୟାଦି ସେତୁ ଅଧାପନ୍ତରିଆ ହୋଇ ପଡିଛି। ଏହିକ୍ରମରେ ଜାନୁୟାରୀ ସୁଦ୍ଧା ୫୨, ଫେବୃୟାରୀ ସୁଦ୍ଧା ୬୩, ମାର୍ଚ୍ଚ ସୁଦ୍ଧା ୯୮ ଏବଂ ମାର୍ଚ୍ଚ ପରେ ୪୧ ସେତୁ ସମ୍ପୂର୍ଣ୍ଣ କରିବାକୁ ନିର୍ଦ୍ଦେଶ ହୋଇଛି। ଏଥିରେ ବିଫଳ ହେଲେ ସମ୍ପୃକ୍ତ ଠିକାଦାରଙ୍କଠାରୁ ଆଇନ ଅନୁଯାୟୀ ଜରିମାନା ଆଦାୟ କରାଯିବ ବୋଲି ଚିଫ୍ ଇଞ୍ଜିନିୟର ଚେତାବନୀ ଦେଇଛନ୍ତି।