ଭୁବନେଶ୍ୱର,୨୯।୧୦(ବ୍ୟୁରୋ): ଖଣିଜ ସମ୍ପଦ ଅଞ୍ଚଳ ନିଗମ (ଓଏମ୍ବିଏଡିସି) ଜିଲାଗୁଡ଼ିକ ପାଇଁ ୮ଟି ପ୍ରକଳ୍ପ ବାବଦରେ ୨୫୭ କୋଟି ଟଙ୍କା ଖର୍ଚ୍ଚ ହେବ। ବୁଧବାର ଲୋକସେବା ଭବନଠାରେ ମୁଖ୍ୟ ଶାସନ ସଚିବ ଅସିତ୍ କୁମାର ତ୍ରିପାଠୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୋର୍ଡ ଅଫ୍ ଡାଇରେକ୍ଟର ବୈଠକରେ ଏହାକୁ ଅନୁମୋଦନ କରାଯାଇଛି।
ବୈଠକରେ ଓଏମବିଏଡିସି କାର୍ଯ୍ୟ ନିର୍ବାହୀ ଅଧିକାରୀ ଉମା ନନ୍ଦୁରୀ ପ୍ରକଳ୍ପ ଗୁଡିକ ସମ୍ବନ୍ଧରେ ସୂଚନା ଦେବା ସହ ପ୍ରସ୍ତାବ ଉପସ୍ଥାପନ କରିଥିଲେ। ଅନୁମୋଦିତ ଅର୍ଥରୁ ଭୟୂରଭଞ୍ଜ ଜିଲାର ସ୍ବାସ୍ଥ୍ୟ ସେବାର ଉନ୍ନତୀକରଣ, ପ୍ରାଥମିକ ଚିକିତ୍ସାଳୟ , ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ନିର୍ମାଣ ଏବଂ ଜିଲାର ଦୁଇଟି ବ୍ଲକର ସବଡିଭିଜନାଲ ହେଡକ୍ୱାଟର୍ସ ହସ୍ପିଟାଲ ନିର୍ମାଣ ପାଇଁ ୪୭.୨୫ କୋଟି ଟଙ୍କା ଖର୍ଚ୍ଚ ହେବ। ସେହିପରି କେନ୍ଦୁଝର ଠାରେ ଥିବା ଇଞ୍ଜିନିୟରିଂ କଲେଜର ଲାଇବ୍ରେରୀ, ଲାବୋରେଟୋରୀ ଏବଂ ଶିକ୍ଷା ଭିତ୍ତିଭୁମି ନିର୍ମାଣ ପାଇଁ ୩୪ କୋଟି, ୬ ଜିଲାରେ ଆଇଟିଆଇ ଏବଂ ପଲିଟେକ୍ନିକରେ ସେଣ୍ଟର ଅଫ ଏକ୍ସିଲେନ୍ସ ଖୋଲିବା ପାଇଁ ୧୨୩.୪୫ କୋଟି, ହସ୍ପିଟାଲ ଓ ସ୍କୁଲ ଗୁଡିକରେ ବ୍ରଡବ୍ୟାଣ୍ଡ ସଂଯୋଗ ପାଇଁ ୩ କୋଟି, ଯାଜପୁର ଜିଲାରେ ଦୁଗ୍ଧ ସଂଗ୍ରହ ସୁବିଧା ଫାଇଁ ୨୦.୪୮ କୋଟି ଖର୍ଚ୍ଚ କରାଯିବ। ସେହିପରି କେନ୍ଦୁଝର, ମୟୂରଭଞ୍ଜ, ସୁନ୍ଦରଗଡ ଓ ଯାଜପୁର ଜିଲାରେ ୪ଟି ମେଗା ନର୍ସରୀର ବିକାଶ ପାଇଁ ୧୧.୭୧ କୋଟି, ଆଦିବାସୀ ଯୁବତୀ ଯୁବକଙ୍କୁ ପଞ୍ଚକର୍ମ ଓ ନେରପ୍ୟାଥିରେ ସାର୍ଟିଫିକେଟ କୋର୍ଷ ଦେବା ଲାଗି ୦.୧୬ କୋଟି ଏବଂ ଶଙ୍କରଜାତୀୟ ବାଛୁରି ପାଇଁ ୧୬.୯୩ କୋଟି ଟଙ୍କା ବ୍ୟୟ ବରାଦ କରାଯାଇଛି।
ଉଲ୍ଲେଖଯୋଗ୍ୟ ଓଏମବିଏଡିସି ଜିଲାଗୁଡିକର ମେଗା ପାଇପ ଜଳ ଯୋଗାଣ, ସ୍ବାସ୍ଥ୍ୟ ସେବାର ଉନ୍ନତୀକରଣଳ,ଦକ୍ଷତା ବିକାଶ, ସମନ୍ବିତ ଶିଶୁ ବିକାଶ ଯୋଜନାର ଉନ୍ନତୀକରଣ, ପରିବେଶ ସୁରକ୍ଷା ଆଦି ପାଇଁ ୧୩,୨୩୩.୨୫ କୋଟି ଟଙ୍କା ଅନୁମୋଦନ କରାଯାଇଥିଲା। ଏହି ବୈଠକରେ ଉନ୍ନୟନ କମିଶନର ସୁରେଶ ଚନ୍ଦ୍ର ମହାପାତ୍ର, ଜଙ୍ଗଲ ଓ ପରିବେଶ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ମୋନା ଶର୍ମା, ସ୍ବାସ୍ଥ୍ୟ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ପି.କେ. ମହାପାତ୍ର ପ୍ରମୁଖ ଯୋଗ ଦେଇଥିଲେ।