ବ୍ରହ୍ମପୁର ଅଫିସ,୨୫ା୧୧: ଜଣେ ବ୍ୟକ୍ତି ମୁଦ୍ରା ଯୋଜନାରେ ଏକ କାଜୁ ପ୍ରକ୍ରିୟାକରଣ ୟୁନିଟ୍ ସ୍ଥାପନ କରିବାକୁ ଦର୍ଶାଇ ୟୁନିୟନ୍ ବ୍ୟାଙ୍କରୁ ଦୁଇଟି ପର୍ଯ୍ୟାୟରେ ୨୬ଲକ୍ଷର ଋଣ ଉଠାଇ ପରିଶୋଧ କରି ନ ଥିଲେ। ବ୍ୟାଙ୍କ ପକ୍ଷରୁ ଯାଞ୍ଚ କରିବାରୁ ସେ କୌଣସି ୟୁନିଟ୍ କରିନଥିବା ଜଣାପଡ଼ିଥିଲା। ଫଳରେ ବ୍ୟାଙ୍କ ମ୍ୟାନେଜର ସେହି ବ୍ୟକ୍ତିଙ୍କ ବିରୋଧରେ ବଡ଼ବଜାର ଥାନାରେ ଠକେଇ ଅଭିଯୋଗ କରିଛନ୍ତି। ପୋଲିସ ୩୨୧/୨୨ରେ ଏକ ମାମଲା ରୁଜୁ କରି ଘଟଣାର ଖୋଳତାଡ କରୁଛି। ୟୁନିୟନ୍ ବ୍ୟାଙ୍କ ଅଫ ଇଣ୍ଡିଆ, ବ୍ରହ୍ମପୁର ନୀଳକଣ୍ଠନଗର ଶାଖା ପରିଚାଳକ ରାମଚନ୍ଦ୍ର ଆଚାର୍ଯ୍ୟ ଥାନାରେ କରିଥିବା ଅଭିଯୋଗ ମୁତାବକ, ଇଞ୍ଜିନିୟରିଂ ସ୍କୁଲ ଛକ ନିକଟରେ ରହୁଥିବା ଶିବରାମ ବେହେରା ନାମକ ଜଣେ ବ୍ୟକ୍ତି କାଜୁ ପ୍ରକ୍ରିୟାକରଣ ୟୁନିଟ୍ ଖୋଲି ବ୍ୟବସାୟ କରିବା ପାଇଁ ବ୍ୟାଙ୍କରୁ ଋଣ ଆବେଦନ କରିଥିଲା। ୨୦୧୭ ମେ ୩୦ରେ ପ୍ରଧାନମନ୍ତ୍ରୀ ମୁଦ୍ରା ଯୋଜନାରେ ବ୍ୟାଙ୍କ ତା’ଙ୍କୁ ୯ଲକ୍ଷ ଟଙ୍କାର ଋଣ ମଞ୍ଜୁର କରିଥିଲା। ୩୯ନଂ ୱାର୍ଡ଼ ଅନ୍ତର୍ଗତ ଅଳକାପୁରୀ ୮ମ ଗଳିରେ ତାଙ୍କ ପତ୍ନୀ ରଜନୀ ବେହେରାଙ୍କ ନାମରେ ଥିବା ଏକ ଘର ବନ୍ଧକ ରଖିଥିଲେ। ଏହାପରେ ପୁଣି ସେହିବର୍ଷ ସେପ୍ଟେମ୍ବର ୧୪ରେ ସେହିଘରକୁ ବନ୍ଧକ ରଖି ୧୭ଲକ୍ଷ ଟଙ୍କାର ଏକ ଗୃହ ଋଣ, କିନ୍ତୁ ଋଣ ଟଙ୍କା ଫେରାଇ ନ ଥିଲେ। ପ୍ରଥମେ ନେଇଥିବା ୧୭ଲକ୍ଷ ଟଙ୍କାରୁ ୧୦ଲକ୍ଷ ବିଭିନ୍ନ ଆକାଉଣ୍ଟକୁ ପଠାଇ(ଟ୍ରାନ୍ସଫର୍) ଅବଶିଷ୍ଟ ଉଠାଣ(ଉଇଥ୍ଡ୍ର) କରିଥିଲା। ଗୁପ୍ତେଶ୍ୱର ପଟ୍ଟନାୟକ ନାମକ ଜଣେ ବ୍ୟକ୍ତିଙ୍କ ନାମରେ ୪ଲକ୍ଷ ଟଙ୍କାର ଚେକ୍ ଉଠାଣ ହୋଇଥିଲା। ତେଣୁ ପ୍ରକଳ୍ପ ନାଁରେ ସେ ବ୍ୟାଙ୍କରୁ ୨୬ଲକ୍ଷ ଟଙ୍କା ଠକିଥିବା ଜଣାପଡ଼ିଥିଲା। ତେଣୁ ତାଙ୍କ ବିରୋଧରେ ବ୍ୟାଙ୍କ ମ୍ୟାନେଜର ଥାନାରେ ଏତଲା ଦେଇଥିଲେ।