କେନ୍ଦୁଝର,୧ା୧୨ (ସ୍ବ.ପ୍ର.): ଦିନକୁ ଦିନ ଏଡ୍ସ ମାରାମତ୍କ ରୂପ ଧାରଣ କରୁଥିବାବେଳେ ଚିକିସତ୍ା ଅପେକ୍ଷା ଏଥିପ୍ରତି ସତର୍କତା ହେଲେ ଏହି ମାରାତ୍ମକ ରୋଗରୁ ରକ୍ଷା ମିଳିପାରିବ। ଏହି ବାର୍ତ୍ତା ବାଣ୍ଟିବା ଉଦ୍ଦେଶ୍ୟରେ ସମଗ୍ର ବିଶ୍ୱରେ ଡିସେମ୍ବର ୧କୁ ବିଶ୍ୱ ଏଡ୍ସ ଦିବସ ଭାବରେ ପାଳନ କରାଯାଉଛି। କେନ୍ଦୁଝର ପରି ଏକ ଶିଳ୍ପ, ଖଣି ଓ ପରିବହନ ପରିପୁଷ୍ଟ ଜିଲାରେ ଏଡ୍ସ ବିଭିନ୍ନ କାରଣ ଯୋଗୁଁ ଗତ କିଛିବର୍ଷ ହେବ ବୃଦ୍ଧି ପାଉଛି। ଜିଲାରେ ଗତ ୪ ବର୍ଷ ମଧ୍ୟରେ ୩୭୧ ପଜିଟିଭ୍ ଚିହ୍ନଟ ହୋଇଥିବା ବେଳେ ୨୬ ଆକ୍ରାନ୍ତଙ୍କ ଜୀବନ ଯାଇଛି। ୨୦୦୬ ରୁ ୨୦୨୨ ନଭେମ୍ବର ସୁଦ୍ଧା ୭୫୯ ଜଣ ଏଚ୍ଆଇ ପଜିଟିଭ୍ ଚିହ୍ନଟ ହୋଇଥିବା ବେଳେ ୧୪୨ ଜଣ ମୃତ୍ୟୁବରଣ କରିଛନ୍ତି। ମୋଟ ଚିହ୍ନଟଙ୍କ ମଧ୍ୟରୁ ୪୪୨ଜଣ ପୁରୁଷ, ୨୬୬ ଜଣ ମହିଳା ଏବଂ ୫୧ ଜଣ ଗର୍ଭବତୀ ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ମିଳିଛି।
ସ୍ବାସ୍ଥ୍ୟ ବିଭାଗ ତଥ୍ୟ ଅନୁଯାୟୀ, ୨୦୧୬ରେ ୧୯ ହଜାର ୯୦୪ ଜଣଙ୍କ ରକ୍ତ ନମୁନା ପରୀକ୍ଷା କରାଯାଇଥିବା ବେଳେ ୬୪ ଜଣ ଆକ୍ରାନ୍ତ ଚିହ୍ନଟ ହୋଇଥିଲେ। ୨୦୧୭ରେ ୧୯ହଜାର ୩୦୫ ଜଣଙ୍କ ପରୀକ୍ଷା କରାଯାଇଥିବା ବେଳେ ୫୮ଜଣ, ୨୦୧୮ରେ ୧୯ହଜାର ୨୫୨ଜଣଙ୍କ ପରୀକ୍ଷା କରାଯାଇ ୬୪ ଜଣ, ୨୦୧୯ରେ ୧୮ହଜାର ୨୯ ଜଣଙ୍କ ପରୀକ୍ଷା କରାଯାଇ ୫୫ଜଣ, ୨୦୨୦ରେ ୨୧ହଜାର ୭୧ଜଣଙ୍କ ରକ୍ତ ପରୀକ୍ଷା କରାଯାଇ ୫୧ଜଣ, ୨୦୨୧ରେ ୨୪ ହଜାର ୩୧୬ ଜଣଙ୍କ ରକ୍ତ ପରୀକ୍ଷା କରାଯାଇ ୩୭ ଓ ୨୦୨୨ରେ ନଭେମ୍ବର ୩୦ସୁଦ୍ଧା ୨୩ ହଜାର ୬୭୧ ଜଣଙ୍କ ରକ୍ତ ପରୀକ୍ଷା କରାଯାଇ ୪୨ ଜଣ ରୋଗୀଙ୍କୁ ଚିହ୍ନଟ କରାଯାଇଛି। ରୋଗୀଙ୍କ ମଧ୍ୟରୁ ୨୦୧୬ରେ ୪ ଜଣ, ୨୦୧୯ରେ ଜଣେ, ୨୦୨୦ରେ ୮ ଜଣ, ୨୦୨୧ରେ ୭ ଜଣ, ୨୦୨୨ ନଭେମ୍ବର ସୁଦ୍ଧା ୬ ଜଣଙ୍କ ମୃତ୍ୟୁ ହୋଇଛି। ଏଚ୍ଆଇଭି ପଜିଟିଭ୍ ଚିହ୍ନଟ ହୋଇଥିବା ୪୨୯ ଜଣଙ୍କୁ ମଧୁବାବୁ ପେନ୍ସନ୍ ଯୋଜାନରେ ମାସିକ ୫୦୦ ଟଙ୍କା ଲେଖାଁଏ ଭତ୍ତା ଦିଆଯାଉଛି।
ବିଶେଷତଃ ଜିଲାରେ ଚିହ୍ନଟ ପଜିଟିଭ୍ଙ୍କ ମଧ୍ୟରୁ ଅଧାରୁ ଅଧିକ ଡ୍ରାଇଭର ଓ ତାଙ୍କ ପରିବାର ବୋଲି ଜଣାପଡ଼ିଛି। ଜିଲା ଦେଇ କଲିକତା-ମୁମ୍ବାଇ ଜାତୀୟ ରାଜପଥ ନଂ. ୪୯ ଯାଇଛି। ତେଣୁ ବହୁ ସଂଖ୍ୟାରେ ଲାଇନ୍ ଟ୍ରକ୍ ଯାତାୟାତ କରୁଛି। ଖଣିଖାଦାନ ଅଞ୍ଚଳ ହୋଇଥିବାରୁ ବାହାର ରାଜ୍ୟର ବହୁ ଗାଡ଼ି ଆସୁଛି। ବାହାର ରାଜ୍ୟର ବହୁ ଶ୍ରମିକ ମଧ୍ୟ ଆସୁଥିବାରୁ କେନ୍ଦୁଝରରେ ଏଚ୍ଆଇଭି ବ୍ୟାପିବା ଆଶଙ୍କା ଅଧିକ ରହୁଛି। ଏହାକୁ ନଜରରେ ରଖି ଜାତୀୟ ଏଡ୍ସ କଣ୍ଟ୍ରୋଲ ସଂସ୍ଥା ମାଧ୍ୟମରେ ରୋଗକୁ ନିୟନ୍ତ୍ରଣ କରିବା, ରୋଗୀଙ୍କୁ ଚିହ୍ନଟ ଓ ଆକ୍ରାନ୍ତଙ୍କ ସଂଖ୍ୟା କମାଇବା ଦିଗରେ ପଦକ୍ଷେପ ନିଆଯିବା ଦରକାର। ଏଥିସହ ପ୍ରଶାସନ, ସ୍ବେଚ୍ଛାସେବୀ ଅନୁଷ୍ଠାନ, ଏଚ୍ଆଇଭି ପଜିଟିଭ୍ ବ୍ୟକ୍ତିବିଶେଷ ସର୍ବୋପରି ଜନସାଧାରଣଙ୍କୁ ସଚେତନ କରାଇବା ସହ ଏଡ୍ସ ରୋଗ ନିରାକରଣ ପାଇଁ ନିଆଯାଉଥିବା ପଦକ୍ଷେପକୁ ଆପଣେଇବାକୁ ପଡ଼ିବ ବୋଲି ସାଧାରଣରେ ମତପ୍ରକାଶ ପାଇଛି।