ନୂଆଦିଲ୍ଲୀ,୧୬ା୯: ଦେଶର ଅଟୋମୋବାଇଲ କ୍ଷେତ୍ରକୁ ଉତ୍ପାଦନ ସଂଯୋଗୀ ନିବେଶ (ପିଏଲ୍ଆଇ) ଯୋଜନା ପରିସରଭୁକ୍ତ କରାଯାଇଛି। ଏହି କ୍ଷେତ୍ରକୁ ଉତ୍ସାହିତ କରିବା ଲାଗି କେନ୍ଦ୍ର କ୍ୟାବିନେଟ୍ ପକ୍ଷରୁ ବୁଧବାର ନିଷ୍ପତ୍ତି ନିଆଯାଇଛି। କେନ୍ଦ୍ର ସରକାର ଅଟୋ, ଅଟୋମୋବାଇଲ ଯନ୍ତ୍ରାଂଶ ଏବଂ ଡ୍ରୋନ୍ ଶିଳ୍ପକୁ ପ୍ରାୟ ୨୬ ହଜାର କୋଟି ଟଙ୍କାର ପ୍ରୋତ୍ସାହନ ପ୍ୟାକେଜ ପ୍ରଦାନ କରିବେ। କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ଏବଂ ଅନୁରାଗ ଠାକୁର ଏ ସମ୍ପର୍କରେ ଏକ ଖବରଦାତା କାର୍ଯ୍ୟକ୍ରମରେ ସୂଚନା ଦେଇଛନ୍ତି। ଅଟୋ କ୍ଷେତ୍ର ଲାଗି ୨୫,୯୩୮ କୋଟି ଏବଂ ଡ୍ରୋନ ଶିଳ୍ପ ଲାଗି ୧୨୦ କୋଟି ଟଙ୍କାର ପ୍ରୋତ୍ସାହନ ରାଶି ପ୍ରଦାନ କରାଯିବ।
ଅନୁରାଗ ଠାକୁର କହିଛନ୍ତି, କେନ୍ଦ୍ର ସରକାରଙ୍କ ଏଭଳି ପଦକ୍ଷେପ ଦ୍ୱାରା ୭.୬ ଲକ୍ଷ ନୂଆ ନିଯୁକ୍ତି ସୃଷ୍ଟି କରାଯାଇପାରିବ। ଏହାଦ୍ୱାରା ଘରୋଇ ବଜାରରେ ଇ-ଯାନ ଉତ୍ପାଦନକୁ ମଧ୍ୟ ଉତ୍ସାହିତ କରାଯିବ। ଏହି ଶିଳ୍ପକୁ ଆଗାମୀ ୫ ବର୍ଷରେ ୪୭,୫୦୦ କୋଟି ଟଙ୍କାର ନୂଆ ନିବେଶ ଆଣିବାରେ ସରକାରଙ୍କ ଘୋଷଣା ଯୋଗଦାନ ରଖିବ। ଭାରତର ମାନୁଫାକ୍ଚରିଂ ଦକ୍ଷତା ବଢାଇବାରେ ଏହା ସହାୟକ। ପିଏଲ୍ଆଇ ସ୍କିମ୍ରେ ଇ-ଯାନ ଏବଂ ହାଇଡ୍ରୋଜେନ ଫୁଏଲ ସେଲ୍ ଭେଇକିଲକୁ ଉତ୍ସାହିତ କରାଯିବ। ୫ ବର୍ଷ ଅଧି ଲାଗି ଏଭଳି ପଦକ୍ଷେପ କାର୍ଯ୍ୟକାରୀ କରାଯିବ। ଏହି ଅବଧିରେ ଅଟୋଶିଳ୍ପରେ ୨.୩ ଲକ୍ଷ କୋଟି ଟଙ୍କାର ଅତିରିକ୍ତ ଉତ୍ପାଦନ ମଧ୍ୟ ହେବ ବୋଲି ସେ ମତ ପ୍ରକାଶ କରିଛନ୍ତି।
ବର୍ତ୍ତମାନ କାର୍ଯ୍ୟ କରୁଥିବା ଅଟୋ କମ୍ପାନୀ ଏବଂ ନୂଆ ନିବେଶ କରୁଥିବା କମ୍ପାନୀଗୁଡ଼ିକ ସ୍କିମ୍ର ପରିସରଭୁକ୍ତ ହୋଇପାରିବେ। ୨ ବର୍ଗ ଲାଗି ଯୋଜନା ବିଶେଷ ଭାବେ କାର୍ଯ୍ୟକାରୀ ହେବ। ପ୍ରଥମରେ ବ୍ୟାଟେରି ଇଲେକ୍ଟ୍ରିକ ଭେଇକିଲ, ହାଇଡ୍ରୋଜେନ ଫୁଏଲ ସେଲ୍ ଭେଇକିଲ ରହିଛି। ଦ୍ୱିତୀୟରେ ଆଡଭାନ୍ସ ଅଟୋମୋଟିଭ ଟେକ୍ନୋଲୋଜି କମ୍ପୋନେଣ୍ଟ ଭେଇକିଲ, କମ୍ପ୍ଲିଟଲି ନକ୍ଡାଉନ, ସେମିନକ୍ଡାଉନ କିଟ୍, ୨ ଚକିଆ, ୩ ଚକିଆ ଏବଂ ପାସେଞ୍ଜର ଯାନ, ବାଣିଜି୍ୟକ ଯାନ ଏବଂ ଟ୍ରାକ୍ଟର ରହିଥିବା ଜଣାପଡିଛି।
ପିଏଲ୍ଆଇ ସ୍କିମ କଣ
ପ୍ରଡକ୍ଟଶନ ଲିଙ୍କଡ ଇନଭେଷ୍ଟମେଣ୍ଟ (ପିଏଲ୍ଆଇ) ଅନ୍ତର୍ଗତ ସରକାର କମ୍ପାନୀଙ୍କ ଅତିରିକ୍ତ ଉତ୍ପାଦନ ଉପରେ ପ୍ରୋତ୍ସାହନ ରାଶି ପ୍ରଦାନ କରିବେ। ରପ୍ତାନି ବୃଦ୍ଧି ଲକ୍ଷ୍ୟରେ ଏଭଳି ପଦକ୍ଷେପ ଗ୍ରହଣ କରାଯାଇଛି। ଦେଶରେ ଶିଳ୍ପ କ୍ଷେତ୍ରକୁ ପ୍ରତିଦ୍ୱନ୍ଦ୍ୱୀ କରିବା ଏବଂ ନିବେଶକୁ ପ୍ରୋତ୍ସାହିତ କରିବାକୁ ମଧ୍ୟ ଏଭଳି ଯୋଜନା କରାଯାଇଛି। ରାଜସ୍ବ ଏବଂ ନିବେଶ ସର୍ତ୍ତ ପାଳନ କରୁଥିବା କମ୍ପାନୀଗୁଡିକୁ ପିଏଲ୍ଆଇ ସ୍କିମର ଫାଇଦା ମିଳିବ। ୪ ଚକିଆ ଯାନ ନିର୍ମାଣ କରୁଥିବା କମ୍ପାନୀଗୁଡିକୁ ଆଗାମୀ ୫ ବର୍ଷରେ ଅତିକମ୍ରେ ୨ ହଜାର କୋଟି ଟଙ୍କା ନିବେଶ କରିବାକୁ ପଡିବ। ସେହିଭଳି ୨ ଏବଂ ୩ ଚକିଆ ଯାନ ନିର୍ମାଣ କରୁଥିବା କମ୍ପାନୀ ମଧ୍ୟ ଏହି ଅବଧିରେ ୨ ହଜାର କୋଟି ଟଙ୍କା ନିବେଶ କରିବାକୁ ହେବ।