ସମ୍ବଲପୁର୧୭ା୧୧(ପ୍ରମୋଦ ବହିଦାର): ଜଙ୍ଗଲ ମଧ୍ୟରେ ୨୮ ଚୋରା ବାଇକ୍କୁ ବିକ୍ରି ପାଇଁ ଲୁଚାଇ ରଖିଥିବାବେଳେ ଅଇଁଠାପାଲି ପୋଲିସ ଜବତ କରିଛି। ସମ୍ବଲପୁର ଜିଲା ଯୁଯୁମୁରା ଥାନା ଅନ୍ତର୍ଗତ ଜାରଙ୍ଗ ଜଙ୍ଗଲରୁ ବାଇକ୍ଗୁଡ଼ିକ ଜବତ କରାଯାଇଛି। ଏହି ଘଟଣାରେ ସୋନପୁର ବୀରମହାରାଜପୁରର ରାମକୁମାର ପଣ୍ଡା ଓ ବୌଦ୍ଧ ମନମୁଣ୍ଡାର ସର୍ଦୁଲ ଗାଇଗୋରିଆ ନାମକ ୨ ଜଣ ଅଭିଯୁକ୍ତଙ୍କୁ ଗିରଫ କରିଛି ପୋଲିସ।
ଏନେଇ ଅଇଁଠାପାଲି ଥାନାରେ ରବିବାର ପୂର୍ବାହ୍ନ ଆୟୋଜିତ ଖବରଦାତା ସମ୍ମିଳନୀରେ ଅତିରିକ୍ତ ଆରକ୍ଷୀ ଅଧୀକ୍ଷକ ଅଜୟ କୁମାର ମିଶ୍ର ସୂଚନା ଦେଇଛନ୍ତି। ତାଙ୍କ ସୂଚନା ଅନୁସାରେ ଗତ ନଭେମ୍ବର ୯ ତାରିଖରେ ଜଗନ୍ନାଥ କଲୋନୀର ଧୀରଜ କୁମାର ପୂଜାରୀ କଲୋନୀର ପାର୍କ ନିକଟରୁ ତାଙ୍କ ସ୍କୁଟର(ଓଡି-୧୫କ୍ୟୁ-୪୧୬୯) ଚୋରି ହୋଇଥିବା ନେଇ ଏତଲା ଦେଇଥିଲେ। ତାଙ୍କ ଏତଲା ଆଧାରରେ ଅଇଁଠାପାଲି ଥାନାରେ କେସ୍ ନମ୍ବର ୩୮୦/୨୪ରେ ଏକ ମାମଲା ରୁଜୁ କରି ତଦନ୍ତ ଅରମ୍ଭ କରିଥିଲା। ତେବେ ଉକ୍ତ ଚୋରି ସ୍କୁଟରରେ ଦୁଇଜଣ ଯୁବକ ଅଇଁଠାପାଲି ବସ୍ଷ୍ଟାଣ୍ଡ ନିକଟରେ ବୁଲାବୁଲି କରୁଥିବା ଅଇଁଠାପାଲି ପୋଲିସକୁ ଖବର ମିଳିଥିଲା। ଖବର ପାଇ ଅଇଁଠାପାଲି ଥାନା ଏସଆଇ ନୀଳାଦ୍ରି ବିଶ୍ବାଳ ସଦଳବଳ ସେଠାରେ ପହଞ୍ଚି ଉକ୍ତ ଯୁବକ ଦ୍ବୟଙ୍କୁ ଚୋରି ସ୍କୁଟର ସହ ଥାନାକୁ ଆଣି ଜେରା କରିଥିଲେ। ଜେରାବେଳେ ଉଭୟ ସ୍କୁଟର ଚୋରି କରିଥିବା ସ୍ବୀକାର କରିବାରୁ ସେମାନଙ୍କ ସୂଚନା ଅନୁସାରେ ପୋଲିସ ଚୋରି ବାଇକ୍ଗୁଡ଼ିକ ଯୁଯୁମୁରା ଜାରଙ୍ଗ ଜଙ୍ଗଲରୁ ଜବତ କରିଛି। ଏମାନେ ବାଇକ୍ ଚୋରି ସିଣ୍ଡିକେଟ ଚଳାଉଥିଲେ ବୋଲି ଅତିରିକ୍ତ ଏସ୍ପି ଅଜୟ ମିଶ୍ର ସୂଚନା ଦେଇଛନ୍ତି। ଉଭୟ ଅଭିଯୁକ୍ତଙ୍କୁ ଗିରଫ କରି ରବିବାର କୋର୍ଟ ଚାଲାଣ କରାଯାଇଛି।
