ବାରିପଦା ଅଫିସ,୨୨ା୯- ଲଘୁଚାପ ଜନିତ ଲଗାଣ ବର୍ଷାରେ ମୟୂରଭଞ୍ଜ ଜିଲା ଶୁଳିଆପଦା ବ୍ଳକ ଅଞ୍ଚଳ ବିଶେଷ ପ୍ରଭାବିତ ହୋଇଛି। ଜମ୍ଭିରା ନଦୀ ଓ ମହାନ୍ତି ନାଳରେ ଜଳସ୍ତର ବୃଦ୍ଧି ପାଇଥିବାରୁ ଦୁଇଟି ସ୍ଥାନରେ ଯୋଗାଯୋଗ ବିଚ୍ଛିନ୍ନ ହୋଇଛି । ମହାନ୍ତି ନାଳର ଉଦବୃତ୍ତ ଜଳ କୋଷ୍ଠା, କଣ୍ଟିସାହି, ବାଘଡ଼ା ଓ ଉପାଲଗଡ଼ିଆ ଅଞ୍ଚଳରେ ପ୍ରବେଶ କରିଛି। ଏହି ଅଞ୍ଚଳରେ ଫସି ରହିଥିବା ୨୮ଟି ପରିବାରକୁ ମଙ୍ଗଳବାର ପ୍ରଶାସନ ଉଦ୍ଧାର କରି ସୁରକ୍ଷିତ ସ୍ଥାନରେ ଆଶ୍ରୟ ଦେଇଛି। ସେମାନଙ୍କୁ ଶୁଖିଲା ଓ ରନ୍ଧାଖାଦ୍ୟ ଯୋଗାଇ ଦିଆଯାଇଛି । ଓଡ୍ରାଫ୍ ଟିମ ଓ ଦମକଳ ବାହାନୀ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି। କଣ୍ଟିିସାହି-କୋଷ୍ଠା ରାସ୍ତାରେ ଘାଇ ସୃଷ୍ଟି ହୋଇ ଯୋଗାଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଛି। ଶୁଳିଆପଦା ତହସିଲଦାର ଏବଂ ବିଡିଓ ବିଭିନ୍ନ ସ୍ଥାନ ପରିଦର୍ଶନ କରି ଲୋକମାନଙ୍କୁ ସଚେତନ କରିବା ସହ ସଜାଗ ରହି ପରିସ୍ଥିତି ପ୍ରତି ନଜର ରଖିଛନ୍ତି। ବର୍ଷା ଲାଗି ରହିଲେ ଜଳବନ୍ଦୀ ପୂର୍ବରୁ ଲୋକମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବ ବୋଲି ବିଡିଓ ପରୀକ୍ଷିତ ଜେନା ପ୍ରକାଶ କରିଛନ୍ତି ।