ଭୁବନେଶ୍ୱର,୨୨।୧୧(ଅନିଲ ଦାସ): ରାଜ୍ୟର ଜଙ୍ଗଲରେ ବନ୍ୟପ୍ରାଣୀ ସୁରକ୍ଷିତ ନାହାନ୍ତି। ରେଳ ଦୁର୍ଘଟଣା, ରାସ୍ତା ଦୁର୍ଘଟଣା, ବିଦ୍ୟୁତ୍ ଆଘାତ, ଶିକାରୀ ଏବଂ ବିଷ ପ୍ରୟୋଗ ଯୋଗୁ ଅଧିକାଂଶ ବନ୍ୟପ୍ରାଣୀଙ୍କ ମୃତ୍ୟୁ ଘଟୁଛି। ବିଭିନ୍ନ କାରଣରୁ ଗତ ୫ ବର୍ଷରେ ରାଜ୍ୟରେ ୨,୮୧୭ ବନ୍ୟପ୍ରାଣୀଙ୍କ ଜୀବନ ଯାଇଛି। ଭାଜପା ସଭ୍ୟ କୁସୁମ ଟେଟେଙ୍କ ଏକ ଲିଖିତ ପ୍ରଶ୍ନର ଉତ୍ତରରେ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ପ୍ରଦୀପ କୁମାର ଅମାତ ମଙ୍ଗଳବାର ବିଧାନସଭାରେ ଏହି ସୂଚନା ଦେଇଛନ୍ତି।
ମନ୍ତ୍ରୀ କହିଛନ୍ତି ଯେ ୨୦୧୮-୧୯ରୁ ୨୦୨୨-୨୩ ମଧ୍ୟରେ ରାଜ୍ୟରେ ୪୩୦ଟି ହାତୀଙ୍କ ମୃତ୍ୟୁ ହୋଇଥିବା ବେଳେ ୪ ବାଘ, ୩୧ କଲରାପତରିଆ ବାଘ ଏବଂ ୨,୩୫୨ ଜଣ ଅନ୍ୟାନ୍ୟ ବନ୍ୟପ୍ରାଣୀଙ୍କ ମୃତ୍ୟୁ ହୋଇଛି। ଢେଙ୍କାନାଳ ଓ ଚିଲିକା ବନଖଣ୍ଡରେ ସର୍ବାଧିକ ବନ୍ୟପ୍ରାଣୀଙ୍କ ମୃତ୍ୟୁ ହୋଇଛି। ଢେଙ୍କାନାଳ ବନଖଣ୍ଡରେ ୨୩୧ ବନ୍ୟପ୍ରାଣୀଙ୍କ ମୃତ୍ୟୁ ହୋଇଥିବା ବେଳେ ଚିଲିକା ବନଖଣ୍ଡରେ ୨୨୦ ବନ୍ୟଜନ୍ତୁଙ୍କ ମୃତ୍ୟୁ ହୋଇଛି। ଏହି ବନ୍ୟଜନ୍ତୁଙ୍କ ମୃତ୍ୟୁ ବିଭିନ୍ନ ରୋଗ, ରେଳ ଦୁର୍ଘଟଣା, ରାସ୍ତା ଦୁର୍ଘଟଣା, ବିଦ୍ୟୁତ୍ ଆଘାତ, ଶିକାରୀ ଏବଂ ବିଷ ପ୍ରକ୍ରିୟାକରଣ ଯୋଗୁ ମୃତ୍ୟୁ ଘଟିଛି ବୋଲି ମନ୍ତ୍ରୀ କହିଛନ୍ତି।
ଅନ୍ୟପକ୍ଷରେ ଏହି ସମୟରେ ଜୀବଜନ୍ତୁଙ୍କ ଆବାସସ୍ଥଳୀ ବଣଜଙ୍ଗଲ ମଧ୍ୟ ଉଜୁଡ଼ି ଯାଇଛି। ମନ୍ତ୍ରୀଙ୍କ ସୂଚନା ଅନୁଯାୟୀ, ଗତ ୫ ବର୍ଷରେ ୧୩,୫୧୧.୧୬୪ ହେକ୍ଟର ଜଙ୍ଗଲ ଜମିରୁ ଗଛ କଟାଯାଇ ଅଣଜଙ୍ଗଲ ଜମିରେ ପରିଣତ କରାଯାଇଛି। ତେବେ ୨୦୧୮ରୁ ୨୦୨୨ ମଧ୍ୟରେ ରାଜ୍ୟ ସରକାର ଜଙ୍ଗଲ କ୍ଷତିକୁ ଭରଣା କରିବା ପାଇଁ ୧୫,୭୪୯.୯୩୦ ହେକ୍ଟର ଜଙ୍ଗଲ ଜମିରେ ବନୀକରଣ କରିଛନ୍ତି। ଏଥିପାଇଁ ସରକାର ୧୧୩.୫୦ କୋଟି ଟଙ୍କା କ୍ଷତିପୂରକ ବନୀକରଣ ବାବଦରେ ଖର୍ଚ୍ଚ କରିଛନ୍ତି। କେବଳ ସେତିକି ନୁହେଁ, ବନ୍ୟପ୍ରାଣୀଙ୍କୁ ସୁରକ୍ଷା ଦେବା ପାଇଁ ଉଦ୍ଦିଷ୍ଟ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗରେ ମଧ୍ୟ ବହୁ ପଦବୀ ଦୀର୍ଘ ବର୍ଷ ଧରି ଖାଲିପଡ଼ିଛି। ବିଜେଡି ସଭ୍ୟ ପ୍ରଶାନ୍ତ ବେହେରା ଜଙ୍ଗଲ ବିଭାଗରେ କେଉଁ ପାହ୍ୟାର କେତେ ପଦବୀ ଖାଲିଥିବା ପ୍ରସଙ୍ଗରେ ମନ୍ତ୍ରୀ କହିଛନ୍ତି, ବିଭାଗର ଗ୍ରେଡ୍-ଏ’ର ୪୯୨ ଅନୁମୋଦନ ପଦବୀରୁ ୨୧୦ ପଦବୀ ଖାଲି ପଡ଼ିଥିବା ବେଳେ ଗ୍ରେଡ୍-ବି’ରେ ଅନୁମୋଦିତ ୭୫୯ରୁ ୪୧୦, ଗ୍ରେଡ୍-ସି’ରେ ୧୦,୩୭୮ରୁ ୪୦୧ ଏବଂ ଗ୍ରେଡ୍-ଡି’ରେ ୯୯୨ରୁ ୪୩୭ ପଦବୀ ଖାଲିପଡିଛି। ସେହିପରି ୨୪ ଜଣ ଆସିଷ୍ଟାଣ୍ଟ ଫରେଷ୍ଟ କଞ୍ଜରଭେଟର ଡେରାଡୁନ୍ରେ ଥିବା ସେଣ୍ଟ୍ରାଲ ଏକାଡେମୀରେ ତାଲିମ ନେଉଛନ୍ତି। ସେହି ଅଧିକାରୀମାନେ ଖୁବ୍ଶୀଘ୍ର କାର୍ଯ୍ୟରେ ଯୋଗଦେବେ। ତେବେ ଖାଲିଥିବା ୪୫ଟି ଆସିଷ୍ଟାଣ୍ଟ ଫରେଷ୍ଟ କଞ୍ଜରଭେଟର ପଦବୀ ଶୀଘ୍ର ପୂରଣ କରିବାକୁ ସରକାର ପଦକ୍ଷେପ ନେଉଛନ୍ତି। ସେହିପରି ୨୯ ଜଣ ଫରେଷ୍ଟ ରେଞ୍ଜର ଅନୁଗୋଳଠାରେ ଥିବା ଓଡ଼ିଶା ଫରେଷ୍ଟ ରେଞ୍ଜର୍ସ କଲେଜରେ ତାଲିମ ନେଉଛନ୍ତି। ଏଥିସହିତ ଆହୁରି ୧୩୧ ନୂଆ ଫରେଷ୍ଟ ରେଞ୍ଜର ପଦବୀ ପୂରଣ କରିବାକୁ ପଦକ୍ଷେପ ନିଆଯାଉଛି ବୋଲି ମନ୍ତ୍ରୀ କହିଛନ୍ତି। ରାଜ୍ୟର ବିଭିନ୍ନ ବନଖଣ୍ଡରେ ୮୦୬ ଫରେଷ୍ଟ ଗାର୍ଡଙ୍କୁ ନିୟୋଜିତ କରାଯାଇଥିବା ବେଳେ ଖାଲିଥିବା ୧,୬୭୭ ଫରେଷ୍ଟ ଗାର୍ଡ ପଦବୀ ପୂରଣ ପାଇଁ ପ୍ରକ୍ରିୟା ଆରମ୍ଭ ହୋଇଛି ବୋଲି ମନ୍ତ୍ରୀ କହିଛନ୍ତି।