ଭୁବନେଶ୍ୱର,୧।୭(ଅଭିଜିତ ଦାସ): ଜୁନ୍ ୨ ବାଲେଶ୍ୱର ବାହାନଗାଠାରେ ଘଟିଥିବା ଭୟଙ୍କର ଟ୍ରେନ୍ ଦୁର୍ଘଟଣାର ମୃତ୍ୟୁ ସଂଖ୍ୟା ୨୯୩କୁ ବୃଦ୍ଧି ପାଇଛି। ତେବେ ବିଳମ୍ବ ସତ୍ତ୍ୱେ ଚିହ୍ନଟ ହୋଇପାରି ନ ଥିବା ୮୧ ମୃତଦେହ ମଧ୍ୟରୁ ପ୍ରଥମ ପର୍ଯ୍ୟାୟରେ ୨୯ଟିର ଡିଏନ୍ଏ ପରୀକ୍ଷା ରିପୋର୍ଟ ଆସିଛି। ଏହାପରେ ଏମ୍ସ ଭୁବନେଶ୍ୱରରେ ଶୁକ୍ରବାରଠାରୁ ପୁନଃ ମୃତଦେହ ଚିହ୍ନଟ ଓ ହସ୍ତାନ୍ତର ପ୍ରକ୍ରିୟା ଆରମ୍ଭ ହୋଇଛି। ୨ଟି ମୃତଦେହ ଓଡିଶାର ହୋଇଥିବାବେଳେ ବାକି ୨୭ଟି ପଶ୍ଚିମବଙ୍ଗ, ବିହାର ଓ ଝାଡ଼ଖଣ୍ଡର ବୋଲି ଜଣାପଡିଛି। ତେବେ ରାତି ୯ଟା ସୁଦ୍ଧା ୬ ମୃତଦେହକୁ ପ୍ରକୃତ ପରିବାରକୁ ହସ୍ତାନ୍ତର କରାଯାଇଥିବା ଏମ୍ସ କର୍ତ୍ତୃପକ୍ଷ ସୂଚନା ଦେଇଛନ୍ତି। ସିବିଆଇ ଏହି ଦୁର୍ଘଟଣାର ତଦନ୍ତ କରୁଥିବାବେଳେ ମୃତଦେହ ହସ୍ତାନ୍ତର ସମୟରେ ଏହାର ଅଧିକାରୀମାନେ ଉପସ୍ଥିତ ରହି ତନ୍ନତନ୍ନ କରି କାଗଜପତ୍ର ଯାଞ୍ଚ କରୁଥିବା ଦେଖାଯାଇଛି।
ପ୍ରଥମେ ବିହାର ବେଗୁସରାଇର ୨୩ ବର୍ଷୀୟ ସୁଜିତ କୁମାର ଓ ପୂର୍ଣ୍ଣିଆ ଅଞ୍ଚଳର ୨୧ ବର୍ଷୀୟ ସୁରଜ କୁମାରଙ୍କ ମୃତଦେହକୁ ହସ୍ତାନ୍ତର କରାଯାଇଥିଲା। ପରେ ପଶ୍ଚିମବଙ୍ଗ ମେଦିନାପୁରର ୩୮ ବର୍ଷୀୟ ମାନସ ମାଇତି ଓ ପୁରୁଲିୟା ଅଞ୍ଚଳର ୩୨ ବର୍ଷୀୟ ସମୀର ବାଉରି, ଝାଡଖଣ୍ଡର ୨୪ବର୍ଷୀୟ ଭୀମ ଚୌଧୁରୀ ଏବଂ ଶେଷରେ ଓଡ଼ିଶା ମୟୂରଭଞ୍ଜର ୩୪ବର୍ଷୀୟ ବ୍ରହ୍ମକାନ୍ତ ଚୌଧୁରୀଙ୍କ ମୃତଦେହକୁ ପରିବାର ଲୋକେ ଏମ୍ସରୁ ଗ୍ରହଣ କରି ନିଜ ଗାଁକୁ ନେଇଛନ୍ତି। ଅନ୍ୟପକ୍ଷରେ ଚିହ୍ନଟ ହୋଇଥିବା ବାକି ୨୩ଟି ମୃତଦେହକୁ ନେବା ଲାଗି ସେମାନଙ୍କ ପରିବାର ଲୋକଙ୍କୁ ସୂଚନା ଦିଆଯାଇଛି। ଆଞ୍ଚଳିକ ପରିବହନ ବିଭାଗର ଅଧିକାରୀ ବିକାଶ ଚନ୍ଦ୍ର ଚୌଧୁରୀ କହିଛନ୍ତି, ସମସ୍ତ ଚିହ୍ନଟ ମୃତଦେହଗୁଡିକୁ ସେମାନଙ୍କ ଠିକଣାସ୍ଥଳରେ ପହଞ୍ଚାଇବା ଲାଗି ଓଡ଼ିଶା ସରକାରଙ୍କ ପକ୍ଷରୁ ସମସ୍ତ ପ୍ରକାର ବ୍ୟବସ୍ଥା କରାଯାଇଛି। ୨୯ ମୃତଦେହ ଚିହ୍ନଟ ହୋଇଥିବା ସୂଚନା ଦିଆଯିବା ପରେ ତୁରନ୍ତ ୨୯ଟି ଆମ୍ବୁଲାନ୍ସ ବ୍ୟବସ୍ଥା କରାଯାଇଥିଲା। ଆମ୍ବୁଲାନ୍ସଗୁଡିକର ଫିଟ୍ନେସ ପେପର, ଲାଇସେନ୍ସ ଆଦି ଯାଞ୍ଚ କରାଯିବା ପରେ ମୃତଦେହ ପରିବହନରେ ନିୟୋଜିତ କରାଯାଇଛି।
ଦୁର୍ଘଟଣା ପରେ ୧୬୨ ମୃତଦେହକୁ ଚିହ୍ନଟ ଓ ହସ୍ତାନ୍ତର ଲାଗି ବିଭିନ୍ନ ପର୍ଯ୍ୟାୟରେ ଏମ୍ସକୁ ଅଣାଯାଇଥିଲା। ୮୧ ମୃତଦେହ ଚିହ୍ନଟ ପରେ ସେମାନଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା। ବାକି ୮୧ ମୃତଦେହ ଚିହ୍ନଟ ହୋଇ ନ ପାରିବାରୁ ଓ କେତେକ ମୃତଦେହର ଏକାଧିକ ଦାବିଦାର ବାହାରିବାରୁ ଡିଏନ୍ଏ ପରୀକ୍ଷା ଶେଷ ବିକଳ୍ପ ହୋଇଥିଲା। ତେଣୁ ମୃତଦେହଗୁଡିକ ଏମ୍ସ ପରିସରରେ ୩ଟି କଣ୍ଟେନର ମଧ୍ୟରେ ସଂରକ୍ଷିତ କରି ରଖାଯିବା ସହ ଡିଏନ୍ଏ ପରୀକ୍ଷା ଲାଗି ଉଭୟ ମୃତଦେହ ଓ ଦାବିଦାର ପରିବାର ସଦସ୍ୟଙ୍କ ବାଳ, ଦାନ୍ତ, ହାଡ, ନଖ ଆଦି ଅଙ୍ଗର ନମୁନା ଦିଲ୍ଲୀ ଏମ୍ସକୁ ପଠାଯାଇଥିଲା। ଏବେ ଦିଲ୍ଲୀସ୍ଥିତ ସିବିଆଇ ଫୋରେନ୍ସସିକ୍ ଲାବ୍ରେ ଡିଏନ୍ଏ ପରୀକ୍ଷା ଚାଲିଥିବାବେଳେ ପ୍ରଥମ ପର୍ଯ୍ୟାୟରେ ୨୯ ରିପୋର୍ଟ ଆସିଛି। ଭୁବନେଶ୍ୱର ଏମ୍ସ କର୍ତ୍ତୃପକ୍ଷ ଏହି ଡିଏନ୍ଏ ରିପୋର୍ଟକୁ ଆଧାର କରି ଚିହ୍ନଟ ଓ ହସ୍ତାନ୍ତର ପ୍ରକ୍ରିୟା ଆରମ୍ଭ କରିଛନ୍ତି। ମାତ୍ର କେତେକ ମୃତଦେହର ହାଡ଼, ଦାନ୍ତ ଆଦି ନଷ୍ଟ ହୋଇଥିବାରୁ ସେମାନଙ୍କ ଡିଏନ୍ଏ ମ୍ୟାଚିଂ କରିବାରେ ସମସ୍ୟା ସୃଷ୍ଟି ହେଉଛି। ତେଣୁ ଡିଏନ୍ଏ ରିପୋର୍ଟ ଆସିବାରେ ବିଳମ୍ବ ହେଉଛି ବୋଲି ଭୁବନେଶ୍ୱର ଏମ୍ସ ପକ୍ଷରୁ ସୂଚନା ଦିଆଯାଇଛି।