![](https://www.dharitri.com/wp-content/uploads/2024/04/fff-16.jpg)
ମାର୍ଶାଘାଇ,୨୪ା୪ (ଶୁଭେନ୍ଦୁ ପ୍ରସାଦ ଚୌଧୁରୀ):କେନ୍ଦ୍ରାପଡ଼ା ଜିଲା ମାର୍ଶାଘାଇ ବ୍ଲକ ଅଞ୍ଚଳରେ ପାନୀୟ ଜଳ ସମସ୍ୟାକୁ ନେଇ ଲୋକେ ତ୍ରାହି ତ୍ରାହି ଡାକିଲେଣି। ପ୍ରଚଣ୍ଡ ରୌଦ୍ରତାପ ସାଙ୍ଗକୁ ନଦୀ ନାଳ ଶୁଖିଲା ପଡିଥିବା ବେଳେ ଗଁାରେ ଥିବା ଜଳାଶୟ ଶୁଖିବାକୁ ବସିଲାଣି। ମଣିଷ ସାଙ୍ଗକୁ ଗୃହପାଳିତ ପ୍ରାଣୀ ଓ ଜୀବଜନ୍ତୁ ବି ପାଣି ମୁନ୍ଦେ ପାଇଁ ଡହଳବିକଳ ହେଉଛନ୍ତି। ସମସ୍ତଙ୍କ ଭରସା ଏବେ ନଳକୂପର ଜଳ। ପ୍ରତି ଗ୍ରାମକୁ ପାଇପ ଯୋଗେ ଯୋଗାଯାଉଥିବା ଜଳ ସମୁଦ୍ରକୁ ଶଙ୍ଖେ ଭଳି ହୋଇଛି।
ମାର୍ଶାଘାଇ ବ୍ଲକର ୨୪ଟି ପଞ୍ଚାୟତରେ ୪୪ଟି ଗ୍ରାମ୍ୟ ପାନୀୟ ଜଳଯୋଗାଣ ପ୍ରକଳ୍ପ ରହିଛି। ସେଥିମଧ୍ୟରୁ ନେମ୍ବରା, ଅଙ୍ଗୁଳାଇ, ଶିଳିପୁର, ଦଶିପୁର, ହାତିଆ, ମାର୍ଶାଘାଇର ପୁରୁଷୋତ୍ତମପୁର, ନାରଣପୁର, ବେରୁହାଁ, ଅନ୍ତେଇ, ରାଘବପୁର, ଡିହବଳରାମପୁର, ମାଣ୍ଡିଆ, ବଉଳାଙ୍ଗ, ଓରିଶବିନ୍ଧା, ଅରିମୂଳ, ଆଖୁଆ, ବଛରାଇ, ବନ୍ଧକଟା, ଗୋଧନ, ମେହେନ୍ଦିନଗର, କରାଣ୍ଡିଆ ପାଟଣା, ଜମପଡ଼ା, ଗୋପେଇ, ରାଇଚାନ୍ଦ, ଆଇତିପୁର, ପକ୍ଷଟ ଭଳି ୨୯ଟି ସ୍ଥାନରେ ଗ୍ରାମ୍ୟ ପାନୀୟ ଜଳ ପ୍ରକଳ୍ପକୁ ଲାଗି ଓଭରହେଡ୍ ପାଣିଟାଙ୍କି ନିର୍ମାଣ କରାଯାଇଛି; ଯାହାକି ଲୋକମାନେ କିପରି ସୁରୁଖୁରୁରେ ପିଇବା ପାଣି ପାଇ ପାରିବେ। ତେବେ ଏହି ଓଭରହେଡ୍ ପାଣିଟାଙ୍କିଗୁଡିକ ସରକାରୀ ଖାତାରେ କାର୍ଯ୍ୟକ୍ଷମ ହୋଇଥିବା ବେଳେ କେତେଗୋଟି କାର୍ଯ୍ୟକାରୀ ହେବାକୁ ବର୍ଷବର୍ଷ ବିତିଗଲାଣି। ଯଦି ଉଦାହରଣକୁ ନେବା ମାର୍ଶାଘାଇ ପଞ୍ଚାୟତର ତହସିଲ କାର୍ଯ୍ୟାଳୟ ନିକଟ ପୁରୁଷୋତ୍ତମପୁରଠାରେ ଥିବା ଓଭରହେଡ୍ ପାଣିଟାଙ୍କି ରଙ୍ଗ ଦିଆ ହୋଇ ଚକଚକ କରୁଛି ସିନା ଏପର୍ଯ୍ୟନ୍ତ କାର୍ଯ୍ୟକ୍ଷମ ହେଇନାହିଁ। ଜମପଡ଼ାରେ ତଦ୍ରୁପ ଅବସ୍ଥା। କେବଳ ମାର୍ଶାଘାଇ ନୁହେଁ କି ଜମପଡ଼ା ବ୍ଲକର ବିଭିନ୍ନ ସ୍ଥାନରେ ଥିବା ଓଭରହେଡ ପାଣି ଟାଙ୍କିକୁ ଜଳ ଯୋଗାଣ ନ ଥାଇ ସିଧାସଳଖ ପାଇପ ଯୋଗେ ପାଣି ଛଡାଯାଉଛି। ଯାହା ଫଳରେ ଲକ୍ଷାଧିକ ଟଙ୍କା ଖର୍ଚ୍ଚ ହୋଇ ନିର୍ମାଣ କରାଯାଇଥିବା ଓଭରହେଡ ପାଣିଟାଙ୍କି କେବଳ ସାକ୍ଷୀ ଭଳି ଛିଡା ହୋଇଛି ସିନା କାମରେ ଲାଗୁନି। ପାଇପ ଯୋଗେ ଯୋଗାଇ ଦିଆଯାଉଥିବା ପାଣି ତଳମୁଣ୍ଡରେ ପହଞ୍ଚୁ ନ ଥିବା ଲୋକମାନେ ଅଭିଯୋଗ କରୁଛନ୍ତି। ଏଥିସହ ବ୍ଲକର ବିଭିନ୍ନ ପଞ୍ଚାୟତରେ ୧୫୪୪ଟି ନଳକୂପ ରହିଛି। ଅଚଳ ନଳକୂପର ସଂଖ୍ୟା କିନ୍ତୁ ବିଭାଗ ନିକଟରେ ନାହିଁ। ବ୍ଲକ ଅଞ୍ଚଳରେ ପାନୀୟ ଜଳ ସମସ୍ୟା ତୀବ୍ରତର ହେଉଛି। ନଳକୂପ କେବଳ ସରକାରୀ ଖାତାରେ ରହିଛି ସିନା ଅନେକ ଜଳସ୍ତର ଖସୁଥିବାରୁ ପାଣି ବ୍ୟବହାର ଯୋଗ୍ୟ ହୋଇପାରୁନି। ଅନ୍ୟପଟରେ ପାଇପ ଯୋଗେ ଯୋଗାଣ ହେଉଥିବା ପାଣି କେଉଁଠି ଯାଉନି ତ କେଉଁଠାରେ ଲୋକମାନେ ଘଣ୍ଟାଘଣ୍ଟା ଧରି ଅପେକ୍ଷା କରି ରହୁଛନ୍ତି। ଯଦି ମାର୍ଶାଘାଇ ପଞ୍ଚାୟତକୁ ଧରାଯାଏ ଏଠାରେ ତୁଳସୀପୁର ଅନୁସୂଚିତ ସାହିରେ ନଳକୂପ ନ ଥିବା ବେଳେ ପାଇପ ଯୋଗେ ପାଣି ଯୋଗାଣ ହୋଇପାରୁନି। ମଣିକୁଣ୍ଡା ପଞ୍ଚାୟତର ପାଲିକୁଦ ସମେତ ବ୍ଲକର ବିଭିନ୍ନ ସ୍ଥାନରେ ବିଶେଷ କରି ପାଇପ ଯୋଗେ ଯୋଗାଇ ଦିଆଯାଉଥିବା ପାଣି ଶେଷମୁଣ୍ଡ ପର୍ଯ୍ୟନ୍ତ ପହଞ୍ଚତ୍ ପାରୁନାହିଁ। ସାମାଜିକ କର୍ମୀ ଶୁଭେନ୍ଦୁ ପ୍ରକାଶ ଦାସ, ବିଶ୍ୱରଞ୍ଜନ ଜେନା, ବିଚିତ୍ରାନନ୍ଦ ବେହେରା, ରଣେନ୍ଦ୍ର ନାୟକ ପ୍ରମୁଖ ଭୂତଳ ଜଳସ୍ତର ହ୍ରାସ ପାଉଥିବାରୁ ନଳକୂପ ଅଚଳ ହୋଇପଡୁଛି। ପାଇପ ଯୋଗେ ଯୋଗାଣ ପାଣି ଉପରେ ଲୋକମାନେ ଅଧିକ ନିର୍ଭର କରୁଥିବାରୁ ଏହାର ପରିଚାଳନା ଠିକ ଭାବେ ହେଉ ନ ଥିବାରୁ ସମସ୍ୟା ଉପୁଜୁଛି। ସରକାର ଲୋକମାନଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦେବାକୁ ଅର୍ଥ ବ୍ୟୟ କରୁଥିଲେ ମଧ୍ୟ ସମସ୍ୟାରେ ସୁଧାର ଆସୁନି। ଅନେକ ଅଞ୍ଚଳରେ ପାନୀୟ ଜଳ ସମସ୍ୟା ତୀବ୍ରତର ହୋଇଛି। ଏ ସମ୍ପର୍କରେ ବିଭାଗୀୟ କନିଷ୍ଠ ଯନ୍ତ୍ରୀ ରାଜେନ୍ଦ୍ର କୁମାର ସିଂଙ୍କୁ ପଚାରିବାରେ ଜଳସ୍ତର କମି ଯାଉଥିବାରୁ ଅନେକ ନଳକୂପ ଅଚଳ ହୋଇପଡିଛି। ତଥାପି ଉପୁଜିଥିବା ପାନୀୟ ଜଳ ସମସ୍ୟାର ସମାଧାନ ପାଇଁ ବିଭାଗ ପକ୍ଷରୁ ଚେଷ୍ଟା ଜାରି ରହିଛି ବୋଲି ସେ କହିଛନ୍ତି।