ଭୁବନେଶ୍ୱର,୧୧।୩(ସତ୍ୟଜିତ୍ ରାଉତ): ଚଞ୍ଚକତା କରି ୩୫ଟି ମୁଦ୍ରାଋଣ ଉଠାଇ ନେଲେ। ଏହାକୁ ଶୁଝିବାକୁ ପୁରୀ ଜିଲା ପିପିଲି ବିଡିଓ ଅଫିସ୍ ଆକାଉଣ୍ଟରୁ ୩.୭୦ କୋଟି ଟଙ୍କା ହଡ଼ପ କଲେ। ଏହି ମାମଲାରେ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ପିପିଲି ଦାଣ୍ଡମୁକୁନ୍ଦପୁରସ୍ଥିତ ଆଇଡିବିଆଇ ବ୍ୟାଙ୍କ ଶାଖାର ପୂର୍ବତନ ମ୍ୟାନେଜର ସରୋଜ କାନ୍ତ ମହାପାତ୍ରଙ୍କୁ ଗିରଫ କରିଛି। ଏଥିସହ ସରୋଜଙ୍କ ସହପାଠୀ ତଥା ମୁଖ୍ୟ ଷଡ଼ଯନ୍ତ୍ରକାରୀ ଏଞ୍ଜେଲ୍ ମିଶ୍ର ମଧ୍ୟ ଗିରଫ ହୋଇଛନ୍ତି। ଅଭିଯୁକ୍ତଦ୍ୱୟଙ୍କୁ ରବିବାର କଟକ ଓପିଆଇଡି କୋର୍ଟକୁ ଚାଲାଣ କରାଯିବା ପରେ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ପୂର୍ବରୁ ଏହି ଶାଖାର ଆସିଷ୍ଟାଣ୍ଟ୍ ମ୍ୟାନେଜର ତନ୍ମୟ କୁମାର ମହାରଣାଙ୍କୁ ଗତ ବୁଧବାର ଛତିଶଗଡ଼ ରାୟପୁରରୁ ଗିରଫ କରାଯାଇଥିଲା। ଅଭିଯୁକ୍ତ ସରୋଜ ୨୦୨୦ରେ ଭୋପାଳ ଏସ୍ଟିଏଫ୍ର ଏକ ଠକେଇ ମାମଲା ଏବଂ ଏଞ୍ଜେଲ୍ ଭୁବନେଶ୍ୱର ଖଣ୍ଡଗିରି ଥାନାର ୨୦୨୨ର ଏକ ଠକେଇ ମାମଲାରେ ସମ୍ପୃକ୍ତ ଥିବା ଇଓଡବ୍ଲ୍ୟୁ ପକ୍ଷରୁ ସୂଚନା ଦିଆଯାଇଛି। ଆଇଡିବିଆଇ ବ୍ୟାଙ୍କର ଜେନେରାଲ ମ୍ୟାନେଜର ସନ୍ଦୀପ ପଟ୍ଟନାୟକଙ୍କ ଏତଲା ଆଧାରରେ ଫେବୃଆରୀ ୨୯ରେ ଇଓଡବ୍ଲ୍ୟୁ ମାମଲା (ନଂ.୩/ ୨୦୨୪) ରୁଜୁ କରି ତଦନ୍ତ ଚଳାଇଛି। ଅଭିଯୋଗ ଅନୁସାରେ, ୨୦୧୮ରେ ଆଇଡିବିଆଇ ଦାଣ୍ଡମୁକୁନ୍ଦପୁର ଶାଖାରେ ଥିବା ପିପିଲି ବିଡିଓ ଅଫିସ୍ର ଦୁଇଟି ଆକାଉଣ୍ଟରେ ସରକାରଙ୍କ ପକ୍ଷରୁ ୩.୭୦ କୋଟି ଟଙ୍କା ଜମା କରାଯାଇଥିଲା। ତତ୍କାଳୀନ ବିଡିଓ ଉକ୍ତ ଟଙ୍କାକୁ ଫ୍ଲେକ୍ସି ଫିକ୍ସଡ୍ ଡିପୋଜିଟ୍ (ଏଫ୍ଏଫ୍ଡି) କରିଦେବାକୁ କହିଥିଲେ ମଧ୍ୟ ଅଭିଯୁକ୍ତ ଅଧିକାରୀଦ୍ୱୟ ତାହା ନ କରି ହଡ଼ପ ଷଡ଼ଯନ୍ତ୍ର କରିଥିଲେ। ଏଥିପାଇଁ ପ୍ରଥମେ ସେମାନେ ନିଜ ସମ୍ପର୍କୀୟଙ୍କ ନାଁରେ ୧୦ ଲକ୍ଷ ଟଙ୍କା ଲେଖାଏ ୩୫ଟି ମୁଦ୍ରା ଲୋନ୍ କରି ବ୍ୟାଙ୍କର ୩.୭୦ କୋଟି ଟଙ୍କା ନେଇଯାଇଥିଲେ। ଏସବୁ ଟଙ୍କା ସହଯୋଗୀ ଏଞ୍ଜେଲ୍ଙ୍କ ଏସ୍ବିଆଇ ଆକାଉଣ୍ଟରେ ଜମା ହୋଇଥିଲା। ତେବେ ଅଡିଟ୍ବେଳେ ମୁଦ୍ରାଋଣ ବାବଦରେ ଜଣାପଡିଯିବା ଆଶଙ୍କାରେ ଅଧିକାରୀଦ୍ୱୟ ବିଡିଓଙ୍କ ଦୁଇ ଆକାଉଣ୍ଟରେ ଥିବା ସମସ୍ତ ୩.୭୦ କୋଟି ଟଙ୍କାକୁ ହଡପ କରିଥିଲେ। ସମସ୍ତ ଟଙ୍କାରେ ସେମାନେ ମୁଦ୍ରାଋଣ ଶୁଝିଦେବା ସହ ସେସବୁ ଲୋନ୍ ଆକାଉଣ୍ଟକୁ ବନ୍ଦ କରିଦେଇଥିଲେ। ହେଲେ ୨୦୨୨ରେ ବିଡିଓ ଏଫ୍ଏଫ୍ଡିର ତଥ୍ୟ ମାଗିଥିଲେ ବି ତାଙ୍କୁ ଦିଆଯାଇ ନ ଥିଲା। ପରବର୍ତ୍ତୀ ସମୟରେ ବ୍ୟାଙ୍କ ପକ୍ଷରୁ ତଦନ୍ତ କରାଯିବାରୁ ଏହି ଠକେଇ ବିଷୟରେ ଜଣାପଡ଼ିଥିଲା। ଏଥିରେ ସରୋଜ ଓ ତନ୍ମୟଙ୍କ ସମ୍ପୃକ୍ତି ରହିଥିବା ସ୍ପଷ୍ଟ ହେବା ପରେ ସେମାନଙ୍କୁ ଚାକିରିରୁ ନିଲମ୍ବନ କରାଯାଇଥିଲା।