ନୂଆଦିଲ୍ଲୀ,୨୩।୯ : ନିଖୋଜ ପିଲାଙ୍କ ପ୍ରସଙ୍ଗରେ ମହିଳା ଓ ଶିଶୁ ବିକାଶ ମନ୍ତ୍ରୀ ସ୍ମୃତି ଇରାନୀ ଏକ ବିବୃତ୍ତି ଦେଇଛନ୍ତି। ୨୦୧୫ ମସିହାରୁ ନିଖୋଜ ଥିବା ୪.୪୬ ଲକ୍ଷ ପିଲାଙ୍କ ମଧ୍ୟରୁ ଅଧିକାଂଶ ସେମାନଙ୍କ ପରିବାର ସହିତ ମିଳିତ ହୋଇଛନ୍ତି ବୋଲି ସେ ଶନିବାର କହିଛନ୍ତି।
୨୦୧୫ ରେ ଆରମ୍ଭ ହୋଇଥିବା ମନ୍ତ୍ରଣାଳୟର ଖୋୟା ପାୟା ପୋର୍ଟାଲ ମାଧ୍ୟମରେ ତାଙ୍କୁ ଚିହ୍ନଟ କରାଯାଇଥିଲା ବୋଲି ଜାତୀୟ ବାର୍ଷିକ ହିତାଧିକାରୀ ପରାମର୍ଶର ଉଦଘାଟନୀ ଅଧିବେଶନରେ କ୍ୟାବିନେଟ ମନ୍ତ୍ରୀ ସ୍ମୃତି ଇରାନୀ କହିଛନ୍ତି।
ସେ କହିଛନ୍ତି ୪.୪୬ ଲକ୍ଷ ନିଖୋଜ ପିଲାଙ୍କ ମଧ୍ୟରୁ ୩.୯୭ ଲକ୍ଷ ପିଲାଙ୍କୁ ଚିହ୍ନଟ କରାଯାଇ ସେମାନଙ୍କ ପରିବାରକୁ ହସ୍ତାନ୍ତର କରାଯାଇଛି।
ଶିଶୁ ପୋଷ୍ୟ ଗ୍ରହଣ ପ୍ରସଙ୍ଗରେ ମନ୍ତ୍ରୀ ସ୍ମୃତି ଇରାନୀ କହିଛନ୍ତି ୨୦୨୧ ମସିହାରେ ଜୁଭେନାଇଲ ଜଷ୍ଟିସ ଆକ୍ଟରେ ସଂଶୋଧନ ହେବା ପରେ କୋର୍ଟ ପରିବର୍ତ୍ତେ ଜିଲା ମାଜିଷ୍ଟ୍ରେଟଙ୍କ ମାଧ୍ୟମରେ ପୋଷ୍ୟ ସନ୍ତାନ ଗ୍ରହଣ ପ୍ରକ୍ରିୟା କରାଯାଉଛି। ପ୍ରାୟ ୨,୬୦୦ ପିଲାଙ୍କୁ ପୋଷ୍ୟ ଭାବେ ଗ୍ରହଣ କରାଯାଇଛି ।
ମନ୍ତ୍ରୀ ଇରାନୀ କହିଛନ୍ତି ଶିଶୁ କଲ୍ୟାଣ ପାଇଁ ସରକାରଙ୍କ ବଜେଟ ଆବଣ୍ଟନ ୨୦୦୯-୧୦ ରେ ୬୦ କୋଟିରୁ ଗତ ବର୍ଷ ୧୪,୧୭୨ କୋଟି ଟଙ୍କାକୁ ବୃଦ୍ଧି ପାଇଛି। ୨୦୧୪ ପରଠାରୁ, ଆମେ ଶିଶୁ ଯତ୍ନ ପ୍ରତିଷ୍ଠାନ ମାଧ୍ୟମରେ ସାତ ଲକ୍ଷରୁ ଅଧିକ ପିଲାଙ୍କୁ ସହାୟତା ପ୍ରଦାନ କରିଛୁ।