କଟକ ଅଫିସ,୩।୯: ଜାଲ୍ ଜମିପଟ୍ଟାରେ ଜଣେ ବ୍ୟକ୍ତିଙ୍କଠାରୁ ୧୦ ଲକ୍ଷ ଟଙ୍କା ଠକିନେବା ଅଭିଯୋଗରେ ଲାଲବାଗ ପୋଲିସ ଗୁରୁବାର ୩ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। ସେମାନେ ହେଲେ କଟକ ବାଖରାବାଦ ଅଞ୍ଚଳର ଅଳକା ସେନ୍ଗୁପ୍ତା ଓରଫ ମୋନାଲିସା ଭଗତ, ଗଣେଶଘାଟର ଚଗୁଲି ଓରଫ ଜଗନ୍ନାଥ ସାମଲ ଓ ମଙ୍ଗଳାବାଗ ଘାସିଆ ସାହିରେ ରହୁଥିବା ପଶ୍ଚିମବଙ୍ଗ ମେଦିନପୁର ଅଞ୍ଚଳର କାର ଚାଳକ ତାରା ଓରଫ ତାରାକ ଘୋଷ। ସେମାନଙ୍କଠାରୁ ଜାଲ୍ ଆଧାର କାର୍ଡ, ଜାଲ୍ ଜମିପଟ୍ଟା ଓ ଏଗ୍ରିମେଣ୍ଟ ଆଦି ପୋଲିସ ଜବତ କରିଛି।
ପୋଲିସ ସୂଚନା ମୁତାବକ, କିଛିଦିନ ପୂର୍ବରୁ ସାହେବଜାଦା ବଜାରର ରବୀନ୍ଦ୍ର ସାହୁଙ୍କ ସହିତ ଚଗୁଲିଙ୍କ ଭେଟ ହୋଇଥିଲା। ଜଣେ ମହିଳା କମ୍ ଦାମ୍ରେ ଭଲ ଜମି ବିକିବେ ବୋଲି ଚଗୁଲି ସେଠାରେ ରବୀନ୍ଦ୍ରଙ୍କୁ କହିଥିଲେ। ଏଥିରେ ରବୀନ୍ଦ୍ର ରାଜିହୋଇଥିଲେ। ଦିନେ ଚଗୁଲି କାରରେ ରବୀନ୍ଦ୍ରଙ୍କୁ ନେଇ ଏକ ଜମି ପାଖରେ ପହଞ୍ଚିଥିଲେ। ସେଠାରେ ପୂର୍ବରୁ ଜମି ମାଲିକ ଭାବେ ମୋନାଲିସା ଉପସ୍ଥିତ ଥିଲେ। ତେବେ ମୋନାଲିସା ନିଜର ଅସଲ ପରିଚୟ ଲୁଚାଇ ଜମିର ପ୍ରକୃତ ମାଲିକ ଅଳକା ସେନ୍ଗୁପ୍ତା ଭାବେ ପରିଚୟ ଦେଲେ। ରବୀନ୍ଦ୍ରଙ୍କର ଜମି ପସନ୍ଦ ହେବା ପରେ ୧୦ ଲକ୍ଷ ଟଙ୍କା ଅଗ୍ରିମ ଦେଇ ଏଗ୍ରିମେଣ୍ଟ କରିବାକୁ କୁହାଗଲା। ଏହାପରେ ମୋନାଲିସା ଜମିର ପ୍ରକୃତ ମାଲିକ ଅଳକାଙ୍କ ନଁାରେ ଏକ ଜାଲ୍ ଜମି କବଲା, ଜାଲ୍ ଆଧାର କାର୍ଡ ଆଣି ୧୦ ଲକ୍ଷ ଟଙ୍କା ନେଇ କୋର୍ଟ କାଗଜରେ ଏଗ୍ରିମେଣ୍ଟ କରିଦେଲେ। କିଛି ମାସ ପରେ ବାକି ଅର୍ଥ ପଇଠ କରି ଜମି ପଞ୍ଜୀକରଣ କରିବାକୁ ରବୀନ୍ଦ୍ର ଚାହିଁବାରୁ ମୋନାଲିସା ଓ ଚଗଲି ଧରାଛୁଅଁା ଦେଲେନାହିଁି। ରବୀନ୍ଦ୍ରଙ୍କର ସନ୍ଦେହ ହେବାରୁ ସେ ସବୁ କାଗଜପତ୍ର ପୁନଃ ଯାଞ୍ଚ କରିବାରୁ ସେଗୁଡିକ ଜାଲ୍ ବୋଲି ଜଣାପଡିଲା। ଏ ନେଇ ସେ ଗତ ଏପ୍ରିଲରେ ଲାଲବାଗ ଥାନାରେ ଏତଲା ଦେବା ପରେ ପୋଲିସ ମାମଲା ରୁଜୁ କରିଥିଲା।
