ନୂଆଦିଲ୍ଲୀ, ୭ା୧୧ (ପି.ଟି.)-ଆଥଲେଟ୍ମାନଙ୍କୁ ପ୍ରତାରଣା କରିଥିବା ଅଭିଯୋଗରେ ଉତ୍ତର ପ୍ରଦେଶ ପୋଲିସ ୩ ଜଣଙ୍କୁ ଗିରଫ କରିଛି। ସେମାନଙ୍କ ମଧ୍ୟରେ ଜଣେ ପୂର୍ବତନ କବାଡ଼ି ଖେଳାଳି ଅଛନ୍ତି। ଆସନ୍ତାବର୍ଷ ଖେଲୋ ଇଣ୍ଡିଆ ଗେମ୍ସ ପାଇଁ ସେମାନେ ସୋସିଆଲ ମିଡିଆରେ ଜାଲ୍ ବିଜ୍ଞାପନ ଜରିଆରେ ତୃଣମୂଳସ୍ତରର ଆଥଲେଟମାନଙ୍କଠାରୁ ଦରଖାସ୍ତ ଅହ୍ବାନ କରିଥିଲେ। ଇଭେଣ୍ଟରେ ଅଂଶଗ୍ରହଣ କରାଇବା ପାଇଁ ସେମାନେ ଆଥଲେଟ୍ମାନଙ୍କଠାରୁ ୬,୦୦୦ ଟଙ୍କା ଲେଖାଏଁ ଦାବି କରୁଥିଲେ। ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ତରଫରୁ ଏତଲା ଦିଆଯିବାର ୨ ଦିନ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଆସନ୍ତା ବର୍ଷ ଖେଲୋ ଇଣ୍ଡିଆ ଗେମ୍ସ ପଞ୍ଚକୁଲାରେ ହେବାର କାର୍ଯ୍ୟକ୍ରମ ରହିଛି। ଗିରଫ ୩ଜଣ ହେଲେ ସଞ୍ଜୟ ପ୍ରତାପ ସିଂ, ଅନୁଜ କୁମାର ଏବଂ ରବି। ସେମାନଙ୍କ ମଧ୍ୟରୁ ସଞ୍ଜୟ ହେଉଛନ୍ତି ଆଗ୍ରାର ଜଣେ ପୂର୍ବତନ କବାଡ଼ି ଖେଳାଳି। ସେ ରୁଦ୍ର ପ୍ରତାପ ସିଂ ନାମରେ ଏକ ଜାଲ୍ ପରିଚୟପତ୍ର ତିଆରି କରିଥିଲେ। ଖେଲୋ ଇଣ୍ଡିଆ ଗେମ୍ସରେ ଭାଗ ନେବାକୁ ଆଗ୍ରହୀ ଆଥଲେଟ୍ମାନଙ୍କ ସହ ବାର୍ତ୍ତାଳାପ କରୁଥିଲେ। ଅନ୍ୟପକ୍ଷରେ ଅନୁଜ ଓ ରବିଙ୍କ ନାମରେ ଉତ୍ତର ପ୍ରଦେଶରେ କାନାରା ବ୍ୟାଙ୍କ ଓ ଷ୍ଟେଟ ବ୍ୟାଙ୍କରେ ରହିଥିବା ଆକାଉଣ୍ଟ ନମ୍ବରରେ ଟଙ୍କା ଜମା କରିବା ଲାଗି ଆଥଲେଟମାନଙ୍କୁ କୁହାଯାଇଥିଲା। ଏହି ବ୍ୟାଙ୍କ ଆକାଉଣ୍ଟକୁ ଅଚଳ କରିଦିଆଯିବା ସହ ଘଟଣାର ତଦନ୍ତ ଚାଲିଛି। କେତେଜଣ ଆଥଲେଟ୍ ଠକାମିର ଶିକାର ହୋଇଛନ୍ତି ତାହାର ହିସାବ ହେଉଥିବା ସାଇ କହିଛି। ଗିରଫ ୩ ଜଣ ସେମାନଙ୍କ ବିଜ୍ଞାପନରେ କେନ୍ଦ୍ର କ୍ରୀଡ଼ା ଓ ଯୁବ ବ୍ୟାପାର ମନ୍ତ୍ରଣାଳୟ, ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ ଏବଂ ଖେଲୋ ଇଣ୍ଡିଆର ଲୋଗୋ ବ୍ୟବହାର କରିଥିଲେ। ବହୁ ଆଥଲେଟ ଏହାକୁ ଏକ ସରକାରୀ ବିଜ୍ଞାପନ ବୋଲି ମନେ କରିଥିଲେ। ସୂଚନାଯୋଗ୍ୟ, ଖେଲୋ ଇଣ୍ଡିଆ ହେଉଛି ସରକାରଙ୍କର ଏକ ଯୋଜନା। ତୃଣମୂଳ ସ୍ତରରୁ ପ୍ରତିଭା ଚିହ୍ନଟ କରିବା ଏହାର ମୂଳ ଲକ୍ଷ୍ୟ। ଏଥିରେ ଭାଗ ନେବା ପାଇଁ କୌଣସି ଫି’ ଦେବାକୁ ହୋଇ ନ ଥାଏ।
