ପୁରୀ ଅଫିସ,୨୬।୪: ମହାପ୍ରଭୁଙ୍କ ରଥଯାତ୍ରା ଉପଲକ୍ଷେ ପବିତ୍ର ଅକ୍ଷୟ ତୃତୀୟାଠାରୁ ଶ୍ରୀନହରସ୍ଥିତ ଅସ୍ଥାୟୀ ରଥଖଳାରେ ରଥ ନିର୍ମାଣ କାର୍ଯ୍ୟ ଜାରି ରହିଛି। ତିନିରଥର ମୁଖ୍ୟ ବିଶ୍ୱକର୍ମା ମହାରଣାଙ୍କ ନିର୍ଦ୍ଦେଶ ଅନୁଯାୟୀ ପ୍ରାଥମିକ ପର୍ଯ୍ୟାୟରେ ରଥ ନିର୍ମାଣ ପାଇଁ ଆବଶ୍ୟକ ଚକ ପାଇଁ ତୁମ୍ବ ନିର୍ମାଣର କାର୍ଯ୍ୟ ଜାରିରହିଛି। ଶ୍ରୀନଅରସ୍ଥିତ ଅସ୍ଥାୟୀ ରଥ ଖଳାରେ ମହାପ୍ରଭୁଙ୍କ ରଥ ନିର୍ମାଣରେ ନିୟୋଜିତ ଥିବା କାରିଗର ଏବଂ ସେବକମାନଙ୍କ ହାତୁଡି ଏବଂ ନିହଣ ଶବ୍ଦରେ ଅସ୍ଥାୟୀ ରଥଖଳା ବେଶ୍ ଚଳଚଞ୍ଚଳ ହୋଇ ଉଠିଛି। ବିଶ୍ୱକର୍ମା ମହାରଣା, ଭୋଇ ସେବକ ଏବଂ ଓଝା ସେବକମାନେ ନିଷ୍ଠାର ସହ ରଥ ନିର୍ମାଣ କାର୍ଯ୍ୟକୁ ଆଗେଇ ନେଉଛନ୍ତି। ରଥ ନିର୍ମାଣର ପ୍ରାରମ୍ଭିକ ପର୍ଯ୍ୟାୟରେ ତିନି ରଥର ତୁମ୍ବ କାର୍ଯ୍ୟ ଜାରି ରହିଛି। ତିନିରଥରେ ମୋଟ ୪୨ଟି ଚକ ରହିଥାଏ। ତେଣୁ ୪୨ଟି ଚକ ପାଇଁ ୪୨ଟି ତୁମ୍ବ ନିର୍ମାଣ ଚାଲିଛି। ତେବେ ମଙ୍ଗଳବାର ରଥ ନିର୍ମାଣର ଦ୍ୱିତୀୟ ଦିନରେ ରଥ ନିର୍ମାଣକାରୀ ସେବକମାନେ ସକାଳ ୮ଟାରେ ରଥ ଖଳାରେ ପହଞ୍ଚତ୍ କାର୍ଯ୍ୟ ଆରମ୍ଭ କରିଥିଲେ। ମଙ୍ଗଳବାର ସୁଦ୍ଧା ତିନିରଥର ମୋଟ ୯ଟି ତୁମ୍ବର ଗୋଲେଇ କାର୍ଯ୍ୟ ସମ୍ପୂର୍ଣ୍ଣ ହୋଇଛି। ସୋମବାର ରଥ ନିର୍ମାଣର ପ୍ରଥମ ଦିନରେ ବିଶ୍ୱକର୍ମା ମହାରଣାମାନେ ଚିହ୍ନ ଦେବା ପରେ କରତି ସେବକମାନେ କାଠ ଗଡକୁ ଚିରଟ କରି ତିନି ରଥ ପାଇଁ ଦୁଇଟି ଲେଖାଏ ତୁମ୍ବ ଗଡ଼ ଯୋଗାଇଥିଲେ। ମଙ୍ଗଳବାର ତିନି ରଥର ମହାରଣାମାନଙ୍କୁ କରତି ସେବକମାନେ ଆଉ ଦୁଇଟି ଲେଖାଏ ତୁମ୍ବ ଗଡ଼ ଚିରଟ କରି ଯୋଗାଇଥିଲେ। ସେହିପରି ଦୁଇଟି ତୁମ୍ବ ପାଇଁ କାଠ ଚିରଟ ଜାରି ରଖିଛନ୍ତି। ଏଥିସହ ଓଝା ସେବକମାନେ ମଙ୍ଗଳବାରଠାରୁ ଦୋଳବେଦୀସ୍ଥିତ ଅସ୍ଥାୟୀ କମାରଶାଳରେ ରଥ ପାଇଁ କଣ୍ଟା ନିର୍ମାଣ ଆରମ୍ଭ କରିଛନ୍ତି। ପରମ୍ପରା ଅନୁଯାୟୀ ରଥ ନିର୍ମାଣର ପ୍ରଥମ ଦିନରେ ଓଝା ସେବକମାନେ ପୂଜାଚର୍ଚ୍ଚା ସହ ବିଧିବିଧାନ ଅନୁଯାୟୀ ଶାଳ ଅନୁକୂଳ କରିଥିଲେ। ପରେ ମଙ୍ଗଳବାର ତିନିରଥର କମାର ସେବକମାନେ ତୁମ୍ବରେ ଅର ସଂଯୋଗ ପାଇଁ ସର କଣ୍ଟା ନିର୍ମାଣ ଆରମ୍ଭ କରିଛନ୍ତି। ତେବେ ରଥ ନିର୍ମାଣର ଦ୍ୱିତୀୟ ଦିନରେ ତିନିରଥର ମୋଟ ମହାରଣା ୧୭ଜଣ ନିୟୋଜିତ ଥିବା ବେଳେ ତିନିରଥରେ ଭୋଇ ସେବକ ୧୨ଜଣ, ତିନିରଥରେ କରତି ସେବକ ୪ଜଣ, ତିନିରଥରେ କମାର ସେବକ ୬ଜଣ ନିୟୋଜିତ ଥିବାବେଳେ ରଥଖଳା ସହାୟକ ଭାବେ ଜଣେ ନିୟୋଜିତ ରହିଛନ୍ତି। ଏହିପରି ରଥ ନିର୍ମାଣର ଦ୍ୱିତୀୟ ଦିନରେ ମୋଟ ୪୦ଜଣ ସେବାୟତ ଓ କାରିଗର ନିୟୋଜିତ ରହିଥିଲେ।